Read Lashi YEREMIA 51 Bible Online

YEREMIA 51 - Lashi bible

YEREMIA 51

¹ASEING tid zigi «Ngoo gi Babelon yo' nya: byumyu" yiri gyi koid phyo' shoin' pyam wa da" lid ri shu" lo.

²Khoo" foo: ri lid wigi hau tang" lo" yhang: ti" Babelon ri phyo' shoin' pyam wa tungbau byu yiri ngoo nhang: kaid wa. Hau: phyo' shoin' pyam da" bidnyid ju" loo lang" nyangnu" shoid khang" moo" khyo" khaid zain: lho: mungdain: ri pyoid pyoid koid too" kho' abye: go".

³Gyizoo yiri nyangnu" da" myoo: ri beig wa ayo, yo' gyi khin: ri koid: void wa ayo, abyid: goo". Zoolu: yiri ateing too" goo". Gyidab goin" ziri said toem" pyam we'.

⁴Nyangnu" gi dam dab lho: nyangnu" voomoo" joem da" fu" moo" khyoo: joem moo shid: lo" boem wa.

⁵Myhang: thang da" ASEING Mangso ngoo gi nyangnu" Israela da" gyeung" shang: da" su: nghoid da" ngoo ri gyi koid sho' nghoid loug we' Israela yo' Yuda ri ngoo ashe: pyam too" wa.

⁶Babelon mo tang" phang: ge'. Nanu" kangso' loid sho' tang we'. Babelon da" yooboo yoomo said pyam ashau" nhang: goo". Nya: moin: yi" ziyo' dayhang: ti" nyang: ri yooboo dam byid: lho: akhid" ngoo latoo: phug byid: bye:.

⁷Babelon gi nga" lo, moo bo da" sheing: khu yo' du. Hau: zigi moug: gyab goin" ri shug yid nhang: da:. Byumyu" yigi hau: zabyid yhid: ri shug wigi ko" lo" byug bye:.

⁸Babelon gi nyeigdain tung" byo, gyo" lo" lho: phyo' shoin' pyam zi shau" da:. Nya: gang mo koug ngau ge'. Nya: dam khoo: shid re" moo cid" shoo: we'. Hau: dam khoo: ge ri ge loo abe.

⁹Houg moo nyid boem da" tungbau byu yi tid zigi «Ngoonu" Babelon ri pang" thoug byid: wa soin' nghoid loug we' soung thang: gyo" byug bye:. Akhid" too" kho' wigi yhoem: byug bye:. Akhid" too" kho' wigi yhoem: khyoo: phang: lo" boem loo shang. Mangsoo gi nya: yoem: so' dangain" yo' Babelon ri yooboo dam byid: wigi hau: ziri bain sho' phyo' shoin' pyam abye:» ga: tid ago".

¹⁰ASEING tid zigi «Nga" byumyu" yi hid su" ga nyho: tid ago". Nyangnu" gi ‹Ngoonu" deingmain" ziri ASEING ci: shug byid: abye:. Yerusalem moo nyid da" bang: ri ngoonu" ASEING Mangsoo koid bye: khyoo: ri yhe: tid kyo" boem shang›» ga: tid da:.

¹¹ASEING gi Media khokham yiri lhu: zhuang" kaid abye:. Ciwim gari nyang: gi Babelon ri phyo' shoin' pyam wa soin' to" da:. He: zigi nya: Noku Yhoem: Moo" ri phyo' shoin' pyam gang mo nyang: latoo: phug zi nghoid. Gyi khaid nyid da" gyizoug: joem gi «Nanu" myoo: ri coin: ge'. Nanu" goo joem ri jen" jen" koid ge'.

¹²Babelon vang joem ri khaid zain: wa avoid asoo" byid: ge'. Zung" bang: ri yoem: lung: ge'. Jooyu" bang: ri nyhid: too" ge'. Gyi phung: yi gau" khau: nyid ge'» ga: amyeing" byid: bye:. Babelon byu yiri nyang: koid wa ga: tid too" bye: ziri ASEING koid bye:.

¹³Hau: mungdain: gi gyid gyung moo" myoo" sho' yo' jonu" myoo" sho' yoo" nghoid loug we' nya: ayo, gi ju" lho: nya: da" kangso' khyeing: thoem" gi phyed pyam byid: zi shoug" bye:.

¹⁴Jhenkhyeug joem yhang: ti" Babelon ri khaid zain: wa byu myoo" sho' ri nyang: shu" ri" wa ga: nya: kangso' ri to" lho: myhang: thang ASEING gi jham' tang: too" bye:. Houg: lho: nyangnu" oung: doid thui: yo' nyho: loo goo" wa.

¹⁵ASEING gi nya: yoem: so' yo' myidgung ri phain" so: wigi Nya: phajhi" yo' mougmyid ri phain" so: lho: Mougkhung: mougdi ri pei: myu" kaid da:.

¹⁶Nya: amyeing" khyo" mougkhung: tho' moo gyid myeing da:. Nyang: gi mougmyid thang: mo jhoemmoug" ci: lo da:. Nyang: gi moug: vo jang" moo lhab' myeig nhang: da:. Houg: lho: nya: khouglhung yab mo lid ri nhang: kaid da:.

¹⁷He: gang mo byu yigi koo" thui: nheig agyeing: thui: gyo: ago". Phara" soolhoo: ri koid bang: gi sho' phu" ago". Ciwim gari nyangnu" koid da" soolhoo: joem gi kangso' abo da" Mangsoo nghoid da:.

¹⁸Nyangnu" ce: phoug" adab wigi aphoug" akhyoid koid eung: ago". ASEING gi nyangnu" yo' byid: goo" yu goo" wa gyoo" re" uri Nyangnu" phyo' shoin' pyam shoug" wa.

¹⁹Yaku da" Mangsoo gi houg: bang: yo' adu: Nyang: gi ja: khang" moo" ri phain" so: su: nghoid da:. Israela byu yigi nya: byu bui" wa. Nyang: khyen: yu to" abye:. Nya: myeing gi Myhang: thang ASEING ga: zi nghoid.

²⁰ASEING tid zigi «Babelon we"- nang gi nga" baid du- gyipui" shid re" nga" gyi jonu" nghoid da:. Ngoo nang ri ci: wigi byumyu" yiri yo' mungdain: ri baid khyoeb pyam wa.

²¹Myang: joem yo' myang: jui: bang: ri khyoeb mhoin' pyam wa. Myang rheing" joem yo' khang" bang: ri khyoeb mhoin' pyam wa.

²²Yuggi yi yo' myiyi: yiri said pyam wa. Pyaid gyi bang: yo' pyaid ngi bang: ri jab khyo' pyam wa. Yuggi nu" yi yo' myiyi: nu" yiri said pyam wa.

²³Yang zung" bang: yo' nyangnu" yang kyung joem ri said pyam wa. Yoo koid bang: yo' nyangnu" yoo phug da" nu: joem ri said pyam wa. vhoeb khang bang: yo' gyizoug: moo" yiri said mhoin' pyam wa» ga: tid.

²⁴ASEING tid zigi «Yerusalem ri nyangnu" koid lo boem da" akhyeing" moo" dangain" shid re" Babelon yo' nya: byu yiri ngoo aphoug" toug" byid: ziri nanu" myang boem wa.

²⁵Babelon we" nang gi mougmyid gyab goin" ri phyo' shoin' pyam da" boem yhang: ti" nghoid da:. Nghoid loug we' ngoo ASEING gi re" gyivoo nghoid. Ngoo gi nang ri koid: yu wigi myidgung khyoo: du" khyo' pyam wa nang ri myimoeb boem" za: teing too" wa.

²⁶Re" da" byo, yoin" jo, jang" mo lug boem daloem ri we' yhoem: zhug jang" moo adoem ci: loo wa. Nanu" gi apyaid atoo: moo dain" pyoid yoo yhang: ti" bue" loo wa. ASEING ngoo tid too" bye:.

²⁷«Gyi khaid wa avoid asoo" byid: ge'. Byumyu" yi shoug" gyoo: wa shid re" laboo" ri moid ge'. Babelon ri gyi koid wa shid re" byumyu" yiri nyheing soin' ge'. Ararad- Minni yo' Ahkeneza mungdain: khokham yiri gyi khaid zain: wa tid ge'. Gyi zain: jang" moo vhu" shi: wa gyizoug: dayug ri khyen: soin' too" ge'. Jhenkhyeug joem yhang: ti" myang: joem ri she: loo ge'.

²⁸Babelon ri gyi koid wa shid re" Byumyu" yiri soin' too" ge'. Media khokham yi nyangnu" da" vhujhung: yi gyizoug: yi nyangnu" wigi vhoeb da" mungdain: dangain" mo gyidab joem ri khi: nhang: kaid ge'.

²⁹ASEING gi Babelon ri byu hang" anyid da" dain" pyoid yoo koid pyam wa nyang: soin' to" da" moo" ri koid thu kaid bye: yoomo myidgung gi ko' ko' nain" da:.

³⁰Babelon gyizoo yigi gyi khaid ziri theing: pyam lho: nyangnu" gyidab moo nyid boem ago". Nyangnu" da" voem" koid myid bei: byug wigi asho" ajhen: bue" byug da:. Voomoo" vang khyam: khoem" joem byo, gyo" lo" byug wigi yhoem: joem gi myi: nge" lo" da:.

³¹Nya: voomoo" gi shoid khang" moo" byo, yoin" vang lo da" khyoo: Babelon khokham ri yhe: tid kyoo" byid: wa shid re" lagyoo: dayug thang: dayug tang" yhe: ago".

³²Gyivoo yigi gyid gu: da" gukhuang" ri seing: yu pyam nhang: lho: gyidab joem ri myi nghe' pyam ago". Babelon gyizoo: yi byoo dain yoeb lam" bue" byug ago".

³³Da so' zoo: moo gyivoo yigi thoug khyo' pyam wigi nyangnu" ri gug nang: jang: moo gug ri yhang: ti" nang: nhe" pyam boem wa. Israela da" Mangsoo- myhang: thang ASEING ngoo tid too" bye:» ga: tid.

³⁴Babelon khokham gi Yerusalem ri jab wigi Zo: pyam bye: Nyang: gi voomoo" ri jhuang: yhang: ti" akoem: koid pyam bye: Yu yhang: ti" hau: ziri myhau: pyam bye:. Nyang: vho: da" gu: ri yu yu wigi deing da" gu: ri she: pyam da:.

³⁵«Ngoonu" ri athoug" akhyoug: koid da" shid re" Babelon gi yoovoin yu baja"» ein: Ziun mo byu yiri tid nhang: ge'. «Ngoonu" ri yau: khi" kham zoo: da" shid re" Babelon gi yoovoin yu baja"» ein: Yerusalem mo byu yiri tid nhang: ge'.

³⁶Hau: thang: ASEING gi Yerusalem byu yiri «Ngoo gi re" khyoo: ri shu" vhu" shi: wa wigi nang ri koid bye: da" khyoo: shid re" re" gyivoo yiri aphoug" byid: nhang: wa. Ngoo gi Babelon mung" mo gyid thu' ri kain" loo" nhang: lho: gyid gyung: joem ri kyug hei' loo" nhang: wa.

³⁷Hau: mungdain: gi siyoo gougnyhoug lam" joem nyid da" byo, yoin" boem jo, da" joyoo bui" wa. Hau: zigi yu" gyoug yu" lhung: sho' bue" loo wa. Hougmoo: hang" we' anyid wa. Shau" myang da" bang: gi gyoug dain loo goo" wa.

³⁸Babelon byu yi dangain" gi khangkhyi joem yo' dayhang: ti" myeing wigi khang: khyi nu" joem yhang: ti" kyi: myeing boem wa.

³⁹Nyangnu" myo, no, so' kho' ago" rhe". Nyangnu" ri ngoo zooshug pui" koid byid: wigi shoug yed nhang: lho: pyoo: nhang: wa. Nyangnu" yhoeb lo" wigi khanham we' adoem to' loo loo: goo" wa.

⁴⁰Ngoo gi nyangnu" ri yang nu" joem coidbaid joem yo' yang loo: joem ri yhang: ti" said pyam wa shid re" she: yhi: wa. Ngoo ASEING tid too" bye:» ga: tid da:.

⁴¹Babelon yo' sen: wigi ASEING tid zigi «Mougmyid gyab goin" wigi coung" boem da" voomoo" gi seing: yu pyam zi shau" abye:. Byumyu" joem shid re" Babelon gi gyoug dain pho" zi bue" lo abye:.

⁴²Panglai: gi Babelon adang moo nhe' pyam wigi myeing da" being: lhung" joem wigi hau: ziri nhe' pyam ago".

⁴³Voogung joem gi gyoug dain pho" myo, jang bue" re" lho: hang" we' anyid- hang" we' gyung: aso" lid: da" joyoo- gyid ajo, da" dain" pyoid yoo yhang: ti" bue" lo" da:.

⁴⁴Ngoo gi Babelon yu phara" Bela ri yooboo dam byid: wa. Nya: da" khau" to" da" zi joem ri to" pyam nhang: wigi byumyu" yi we' nyang: ri ano' loo wa «Babelon vang joem gi byo, gyo" byug bye:.

⁴⁵Israela byumyu" yi we"- hau: joyoo mo tang" phang: ge'. Thain: da" nga" nheig joem: yo: jang" mo nanu" kangso' loid sho' tang" phang: ge'.

⁴⁶Nanu" shau" gyo: da" ajo lid dang: yoomo seing" anain" goo"- agyug goo". Zain khang" moo" azhung" da" lid dang: nghoid da" mungdain: moo athoug" akhyoug: lid dang:- khokham dayug yo' dayug gyi zain: go" da" lid dang: fu" pyo: ago".

⁴⁷Babelon mung" da" yu phara" soolhoo: joem ri ngoo dang: phyed wa ayo, ju" lo nyid da:. Mungdain: goin" gi sho' phu" wa. Hau: da" byu yi dangain" gi said pyam zi shoug" goo" wa.

⁴⁸Babelon ri phyo' shoin' pyam wa shid re" moug zhung: shoid mo ju" ri" bang: lo khyoo: Babelon gyo" vang loo" lang" mougmyid tho' moo jo, gu: dangain" yo' mougkhung: moo jo, gu: dangain" gau wigi nyho: loo goo" wa.

⁴⁹Babelon gi mougmyid gyab goin" mo byu yiri shid: nhang: lho: Israela byu yi gye" myoo: sho' ri shid: nhang: pyam bye: yoomo Babelon gi gyoeb gyo" lo" byug wa». Ngoo ASEING tid too" bye:.

⁵⁰ASEING gi Babelon moo nyid da" nya: byu yiri dang: tid zigi «Shid jang" mo nanu" phang: loid abye: go". Akhid" loo" loo ge'. Alang" nyid goo". Nanu" gi yhoem: moug: yo' ve: jang" moo nyid boem loug we' nanu" da" ASEING ngoo ri myid boin: ge'. Yerusalem ri myid boin: ge'.

⁵¹Nanu" tid zigi «Ngoonu" sho' phu" wigi ngi: yoem" bye:. Tungbau byu yigi Noku Yhoem: Moo" mo gyeung" shang: da" joyoo joem khyoo: shu" loo" shau" wigi ngoonu" bain sho' asho" ajhen: kham zoo: bye:» ga: tid.

⁵²Houg: yoomo Babelon yu phara" soolhoo: joem: ri ngoo dang: phyed wa ayo, ju" re" nyid bye:. Houg lho: dam dab bang: gi mungdain: jang: sho' noo kyeing" kyeing" wa ein: ngoo tid bye:.

⁵³Babelon gi mougkhung: khyoo: yo" do, lo" wigi houg: geing: da" gyidab yo" zhug sho' nghoid loug we' hau: ziri phyo' pyam wa byu yiri ngoo nhang: kaid shi" wa. Ngoo ASEING tid too" bye:.

⁵⁴ASEING tid zigi «Babelon mo kyi: ngau thui: ri yo' mungdain: moo phyo' shoin' pyam yoomo koug ngau thui: ri tam" gyoo: ge'.

⁵⁵Ngoo gi Babelon ri phyo' shoin' pyam nyid wigi jham" coug: youg bui" nhang: nyid. Gyidab gyiphung: yigi being: lhung" myeing yhang: ti" gei boem wigi nyho: zi tung: ga: gyi khaid nyid boem ago".

⁵⁶Babelon ri phyo' shoin' pyam wa nyangnu" ju" re" ago". Nya: da" gyizoo: yi myheig yu pyam shau" wigi Nyangnu" da" lid: joem gyau: byug abye:. Ngoo gi akhyeing" ziri yooboo dam byid: su: Mangsoo nghoid. Nyang: moin: yi" ziyo' dayhang: ti" Babelon ri ngoo koid wa.

⁵⁷Ngoo gi nyangnu" da" vhoebkhang" bang: ri phajhi" boo bang: ri vhujhung: yiri yo' gyizoo: yiri yhid: yed nhang: wa. Nyangnu" yhoeb lo" wigi khanham we' ato' loo loo: goo" wa. Ngoo khokham tid too" bye:. Ngoo gi myhang: thang ASEING nghoid.

⁵⁸Reung: thang da" Babelon vang joem gi myidjang khyoo: du" khyo' pyam zi shau" boem wa. Hau: pyuzung khoem" moo" joem we' nghe' khyo' pyam wa. Babelon byumyu" yi da" moo" zoo" gi akoem: nghoid da:. Nyangnu" yoem: kaid to" zigi myiyham: moo bo do, lo" byug da:. Ngoo myhang: thang ASEING tid bye:.

⁵⁹Khokham Zedekia da" gung cang zoug: gi Masea da" myid: zoo:- Neria da" yuggi zoo: Seraia nghoid da:. Zedekia Yuda khokham koid zi myid: zain ein: zain moo Seraia gi nyang: yo' dage". Babelon khyoo: yhe: lo" wigi ngoo gi nyang: ri jhau" shid dang: dayham" ri byid: kaid bye:.

⁶⁰Babelon yo' sen: wigi he: gootu: dangain" yo' dayhang: ti" phyo' shoin' pyam khyoo: dangain" gi Babelon dang moo ju" re" wa nghoid da" khyoo: mougsoug" dapug moo ngoo lhid" too" bye:.

⁶¹Ngoo Seraia ri «Nang Babelon khyoo: ju" yhi: lang" hid: moo lhid" to" khyoo: ja: khang" moo" ri shava byu yiri thui: zeing yo' nghab khyoo" ca" khyoo: ri myid boin: we'.

⁶²Hau: thang: ‹ASEING we"- byu we' gougnyhoug we' houg: moo hang" we' anyid lho: apyaid atoo: moo dain" pyoid yoo yhang: ti" bui" wa shid re" he: joyoo ri phyo' shoin' pyam zi nghoid ga: nang tid to" abye:› ein: akyu" mho' ge'.

⁶³Seraia we' shava byu yiri he: mougsoug" pug nang bain nghab kyoo" lang" hau: ziri lug boem tei" tab lho: Uphrad gyid gyung: khyoo: du" zei pyam ge'.

⁶⁴Houg: lho: hid su" ein: tid ge'. He: zigi Babelon ri bue" loo nhang: wa zi nghoid. ASEING wigi hau: dang moo phyo' shoin' zi bui" nhang: wa zi nghoid wigi hau: zigi noeb vang lo" lho: khanham we' adoem to' ri" loo wa». Yeremia mungdang: gi hid: moo thang bye:.