Read Lashi YEREMIA 9 Bible Online

YEREMIA 9 - Lashi bible

YEREMIA 9

¹Nga" da" vhuloem gi gyid thung" Houg: lho: nga" da" myojid" gi ngau byid gyid cu" nghoid yoo: o". Houg: lang" said pyam shau" da" nga" byumyu" yi shid re" myen" ri nyid" ri yo" ngoug wa nghoid.

²Ngoo gi nga" byumyu" mo yo" phang: nyid yen" wa shid re" Dain" pyoid yoo joyoo daloem: yoo" yoo we". Nyangnu" dangain" gi jhug azug da" bang: phug lheig lo" da" bang: kyeing" nghoid.

³Nyangnu" gi mhau' tid wa shid re" khanham we' jen" jen" nghoid ago". Adeingmain" zigi deingmain" da" gungthid hau: mougmyid ri vhoeb da:. ASEING tid zigi «Nga" byumyu" yigi akhyeing" da" moo" daja: bain thang: daja: koid ago". Houg: lho: ngoo ri nyangnu" Mangsoo khyo" asoin: yu nghoid ago"» ga: tid da:.

⁴Yugkhang" moo" gi nya: byencang" yiri goolhoo: zung" yu" ca" da:. Hang" we' nya: mang: nhung" yiri age' loem nghoid da:. Ciwim gari yugkhang" moo" gi Yaku yhang: ti" mhoug fain" da:. Houg: lho: yugkhang" moo" gi nya: byencang" yiri mhid" zo: da:.

⁵Nyangnu" dangain" bang: gi nyangnu" byencang" yiri khyoo: vhang: shu" vhang: wigi hang" we' deingmain" da" dang: atid goo" nghoid da:. Nyangnu" gi nyangnu" da" yhoo: ri mhau' tid wa jhau" to" abye:. Houg: lho: yooboo shoid ziri to" pyam wa anghoid. Nyangnu" gi athoug" akhyoug: moo" daja: bain daja: koid thu nyid boem ago". Houg: lho: moug fain" khyoo: daloem bain daloem koid ago". ASEING gi hau: byumyu" yi nyang: ri ngeug pyam abye: ga: tid da:.

⁷He: gang mo myhang: thang ASEING tid zigi «Ngoo gi nga" byumyu" yiri to' joem ri yhang: ti" kyeing shang: pyam wa. Houg: lho: nyangnu" ri jham" ca: yu" wa. Nga" byumyu" yigi akhyeing" ashoeb khyoo: koid bye:. Ngoo gi nyangnu" ri gootu: khasu" yo" koid shi" wa la".

⁸Nyangnu" da" yhoo: joem gi se' shid: nhang: da" myoo: joem yo' du. Houg joem gi khanham we' mhoug tid nyid boem. Yugkhang" moo" gi nya: yhoem: kyoo" cang" ri jheddab zoem" khoug: nau wa dang: joem tid ago". Nghoid loug we' gyeing" nyang: gari nyangnu" shid re" lhid' thung: to" ago".

⁹Ngoo gi nyangnu" ri he: gu: gang mo yooboo dam abyid: wa ga: rhe". Ngoo gi hid yhang: ti" byumyu" yiri latoo: aphug wa rhe". ASEING tid too" bye:.

¹⁰Ngoo gi «Boem joem shid re" koug ngau wa. Coung" yoo shid re" ngau wa. Ciwim gari hau: joem gi kyug byug wigi hau: joem dang khyo" gyung: hang" asoo" nghoid da:. Yhoem: khu: gougnyhoug thui: ashau" gyoo: loo wa. Ngho' joem yo' gougnyhoug lam" joem dangain" phang: byug abye: go"» ein: tid.

¹¹ASEING tid zigi «Ngoo gi Yerusalem ri byo, yoin" jo, nhang: wa. Khuidkoo" joem nyid da" joyoo koid pyam wa. Yuda voomoo" joem gi hang" anyid da" joyoo Dain" pyoid yoo bue" loo goo" wa» ga: tid da:.

¹²Ngoo gi «ASEING we"- hau: mougmyid gi ciwim yoomo byu alid: da" dain" pyoid yoo yhang: ti" jham" coug: youg bue" byug loug la". He: ziri yo" se' gyoo: sho' hang" phajhi" se' la". Subi gootu: ri doem yo" xo' tid kyoo" wa shid re" hang" ri nang tid kyo" yu" la"» ein: myid: bye:.

¹³ASEING gi «Nga" byumyu" yigi nyangnu" ri ngoo jhau" byid: to" da" khyoo: ri she: pyam yoomo he: zi bue" lo zi nghoid da:. Nyangnu" gi ngoo ri atam" gyoo:- nyangnu" ri ngoo tid to" da" ziri akoid nghoid ago".

¹⁴Hau: gungthid nyangnu" gi nheigloem: thain: wigi nyangnu" da" phoug" phyid" yi wigi jhau" byid: too" kho' ziyo' dayhang: ti" Bala soolhoo: joem ri no' ago".

¹⁵Houg: yoomo ngoo myhang: thang ASEING- Israela da" Mangsoo koid wa ziri tam" gyoo: ge'.- Ngoo gi nga" byumyu" yiri kho" da" shivoo gam byid: zho" lho: myoono, byid: jhug wa.

¹⁶Ngoo gi nyangnu" yo' nyangnu" phoug" phyid" yi we' agyo: yu" da" byumyu" yi jhang khaid sain" kaid lho: nyangnu" ri yo" phyo' shoin' toem: pyam sho' khaid zain: wa gyidab joem ri nhang: kaid byid: wa» ga: phug tid da:.

¹⁷Myhang: thang ASEING tid zigi «Cibue" nyid ziri myid yu" ge'. Byu shid: mang yang" nyid da" myiyi: yi shid re" koug ngau wa byu yiri khe: kaid ge'» ga: tid.

¹⁸Byumyu" yigi «Nyangnu" gi myab myab re" lho: ngoonu" da" myojid" moo ngau byid: byeung" byug wigi Ngoonu" da" myo, yid moo ngau wigi jhu' byug sho' Ngoonu" shid re" byu shid: mang yang" byid: la» ga: tid.

¹⁹Ziun mo nyho: ngau nyid da" thui: ti" tam" gyoo: ge'. «Ngoonu" gi byo, yoin" byug bye:. Ngoonu" gi bain sho' ngi yoem" byug bye:. Ngoonu" gi ngoonu" moug: ri too" kho' lho: Ngoonu" da" yhoem: joem ri phyo' pyam shoug" bye:- ga: ngau nyid ago".

²⁰Ngoo gi «Myhi' zeing yi nanu" we"- ASEING dang: ri tam" gyoo: ge'. Nya: mungdang: ri tam" gyoo: ge'. Nanu" da" myiyi: zoo: yiri khasu" koug ngau wa jhau" byid: ge'. Houg: lho: nanu" da" byencang" yiri byu shid: mang khasu" yang" wa ziri jhau" byid ge'.

²¹Shid: khyoo: gi ngoonu" yhoem:- bangzoo: khoem" joem khyo" vang lo wigi Ngoonu" da" khokham kho" joem khyoo: vang loo bye:. Hau: zigi fu" moo" khyoo: moo nyid da" zooshang: yiri yo' Kid" jang: moo nyid da" zoolu: yiri said pyam bye:.

²²Byu shid: mang joem gi yoo joem mo myidxu: jen" yhang: ti" Gug yham" bang: wigi thang: moo yham" khyo' to" lho: hang" we' akoid: zheing" yu da" gug gyoo" yhang: ti" Khyi' khang" moo" moo jo, sain" boem ago". He: zigi ngoo ri ASEING wigi tid nhang: zi nghoid da» ein: tid bye:.

²³ASEING tid zigi Phajhi' boo bang: gi nyangnu" da" phajhi" shid re" age phoug:- Yoem: boo bang: gi nyangnu" da" yoem: moo age phoug: tid. Jonu" yoo" bang: we' nyangnu" da" jonu" yoomo age phoug:-

²⁴Byu dayug yug phoug: nau nghoid rigi Nyangnu" gi ngoo ri se' ziyo' se' gyo: khyoo: moo phoug: eung: da:. Ciwim gari nga" da" jheddab myid gi abei: abyo, geing: teing jo, da:. Houg: lho: ngoo gi tarha" deungmain" ziyo' jo ziri koid da:. Hau: joem gi ngoo ri vho: ngei nhang: da:. Ngoo ASEING tid too" bye:.

²⁵ASEING tid zigi «Xam: leung" phyid da" Egutu byu yi Yuda byu yi Edom byu yi Amon byu yi Moba byu yi yo' dain" pyoid yoo mo byu yiri ngoo yooboo dam byid: wa ayo, ju" lo nyid bye:. He: byu yi dangain" bang gi athang: yham" nghoid loug we' hau: ziri asoo" ci: shug da" dang: theing ri acang nghoid ago". He: byumyu" mo dayug we' houg: lho: Israela byumyu" mo dayug we' nga" dang: theing ri acang nghoid ago"» ga: tid da:.