Read Lashi NGOUG JI: 4 Bible Online

NGOUG JI: 4 - Lashi bible

NGOUG JI: 4

¹Ngoonu" da" lo, lo, doug bang da" sheing: gi shoem: loo" bye:. Noku Yhoem: Moo" mo lugzeing joem gi voogung fu" moo" khyoo: cang lhu: sain" to" boem abye:.

²Ziun mo zoolu: zoo: yigi ngoonu" shid re" sheing: yo' dakhyoo" ti" phoug" dab, nyid ago". Nghoid loug we' akhid" nyangnu" gi myid oug" yo' dakhyoo" ti" nau khyo" zheung: koid ago".

³Zeigni myhi' lang" ri nya: zoo: noug" nu" ri noug se' jhug nghoid loug we' nga" byumyu" yigi ngho' goola ug yo' dakhyoo" ti" nyangnu" da" zooshang: yiri gi akoid nghoid da:.

⁴Nyangnu" gi nyangnu" da" zoonu" yiri zooyoid gyid shed zi shoug" nhang: boem lho: to" said pyam ago". Zooshang: yigi hang" abyid: wa da" zoo: shug joem ri cang mho' yen" ago".

⁵Shid phyang" ngham" thang da" zoo: noem ri zo: nyid mo, gi fu" moo" khyoo: joem moo: zooyoid shid: jo, boem ago". Ngi: boo tung" zo: shoug lho: khu: kaid mo, gi pho kyug boem moo: zoo: noem ri byeug sho: yen" ago".

⁶Nga" mung" byu yigi Mangso lo, khoug: moo: nyeigdain tung" gyoeb, gyo" lo" da" Sodom voo moo: nyid mo, tho' re" je" gyi: dam xo: yooboo dam ri loem zo: ago".

⁷Ngoonu" da" khokham zoomyi: nu" yigi: noo aboo- gyu: yhang: ti" young" gyeing" jo, ziyo' yang" zain" yoem: bo nyid ago".

⁸Akhid" koem gi fu" moo" khyoo: joem moo nyangnu" ri hang" we' ase' zi leung jo, ago". Nyangnu" da" myonhoo: joem gi shid: yoomo ceig ceig no, byoug boem bye:. Seig kug su" kyoug byoug da:. Nyangnu" shooyid joem gi shooyoug: joem moo: kyoug dab, pyam ago".

⁹Meing: zain: jang: moo shid: loo" mo, gi kangso' dei nyid wa shid re" zoo: noem ayoo" wigi zo" re zooyoid shid: loo" mo, tho' moo: je" ge nyid.

¹⁰Nga" byumyu" yi jang" moo bue" lo da" yau: khe" khyoo: gi gyoug dain pho" zi nghoid. Jheddab myid bo da" myhi' zeing yigi nyangnu" da" zooshang: yiri zoo: noem khyo" poo" zo: pyam boem da,.

¹¹ASEING gi nya: nheig yo: khyoo: ri yoem: byeung" sho' phain" thu' kaid. Ziun ri myidgung ju" sho' nghe' jhoem" pyam da" myi: ri tab kaid da:.

¹²Khayo hang" we' tungbau meing: mo zoug: yi lang" ri Yerusalem voomoo" khoem" khyoo: ayo" jhen" vang yhi: ga: myid loem ago".

¹³Nghoid loug we' nya: lapi: yigi yooboo shoid nyid boem ziyo' nya: khainjung yigi ce: yooboo we' ayoo" mo, ri shid: shoug" nhang: da" gang mo hougsu" bue" lo" boem bye:.

¹⁴Nya: vhujhung: yigi fu" moo" khyoo: joem moo: myo, jed, bang: yhang: ti" nyid lam" yen" ago". Nyangnu" gi suid" yo' lhu" ci: boem yoomo dayug we' nyangnu" avoem" yhe: tain" nghoid ago".

¹⁵Byumyu" yigi phang: loo" ge'. Nanu" gi dam dab abye: go". Ngoo ri atain" goo" ga: nyho: ago". Houg: yoomo nyangnu" gi damung" mo zi damung" khyoo: hang" alhoem: tau yu zi nyid yen" ago".

¹⁶ASEING gi nyangnu" shid mo ce: gung ayoug loo: nghoid da:. Nyang: gi nyangnu" ri khaid sain" pyam bye:. Nyangnu" da" khainjung yiri we' vhujhung: yiri we' cisoin: loo: wa zi anghoid.

¹⁷Ngoonu" gi khanham we' ngoonu" jang" moo: aju" re" yu" shi" da" pang" thoug su: ri ayo" lang" loo: sho' yu" bye:. Ngoonu" ri pang" yu wa ayo" da" mungdain: daloem: moo: pang" thoug wa ziri xo' lang" nyid boem.

¹⁸Gyivoo joem gi ngoonu" ri lang" yu" nyid da:. Ngoonu" gi fu" moo" khyoo: moo: lang" atho' yo" so" yen". Ngoonu" da" bidnyid joem gi thang byug bye:. Lo" thang da" ayo, we' ju" loo bye:.

¹⁹Nyangnu" gi mougkhung: mo dang: lho: gyo" re" da" zoin bung: tho' moo: je" myab, khyo" ngoonu" ri cang khaid lo ago". Nyangnu" gi ngoonu" ri bouggung joem moo ju" sho' cang khaid ago". Nyangnu" gi ngoonu" ri dain" pyoid yoo: moo nyeigdain tung" lhoem: myheug yu ago".

²⁰Nyangnu" gi ngoonu" da" kangso' apoem: ayang: ri to" da" Khokham phoo ri jhen" vang lo da" yugkhang" moo" mo, ngoonu" ri goem loem byid: wa ein: ngoonu" myid loem too" su: ASEING wigi: khyen: to" su: ri myheug yu pyam byed: boem ago".

²¹Edom yo' Uza voobyu yi we"- yi nyid ge'. Nanu" yo" ngei pyo: uri ngei pyo: nyid ge'. Nanu" da" yau: khe" kyi" khyeug khyoo: gi ju" lo nyid bye:. Nanu" gung cen: so" leung baid yen" ziyo' sho' thu' goo" wa.

²²Ziun gi nya: yooboo jhen: xab abye:. ASEING gi ngoonu" ri pyoung" nyhid: to" jang" mo myang" sho' atoo" loo. Nghoid loug we' Edom we" ASEING gi nang ri yooboo dam byid: wa nghoid. Nyang: gi re" yooboo moo" zoo" joem ri phang shug wa zi nghoid.