Read Lashi EZEKIEL 10 Bible Online

EZEKIEL 10 - Lashi bible

EZEKIEL 10

¹Dei noem joem da" vhuloem tho' moo mougkhung: khyoo: ngoo yu" kaid. Hau: joem jang" moo Nila lug yo' koid to" da" zhungtang te" zi daja: jo, da:.

²Mangsoo gi zin: yung" pain" byimi void ci: da" byu ri «Hau: dung dab dei noem joem da" agyid" khoug: mo rheing" cab joem agyoo: khyoo: yhe: wigi re" lo, wigi nge" nyid da" myigyu: byeung" sho' kaid yu lho: hau: myigyu: joem ri hau: voomoo" khyoo: du" sain" kaid we» ga: tid da:. Nyang: yhe: to" ziri ngoo zung" yu" kaid.

³Nyang: vang yhe: lo" da" uri dei noem joem gi Noku Yhoem: Moo" da" mougpyi: shoid moo yab jo, da:. Houg: lho: jhoemmoug" dathei" gi vang akhoug: shoid moo byeung" jo, da:.

⁴ASEING shidkhoin" mo yi: yi: bang da" bidbang gi dei noem joem mo bang to' thu lo wigi Noku Yhoem: Moo" khyoo: vang yhe: da" khoem" duang: khyoo: yu: lo" da:. Hau: thang: jhoemmoug" gi Noku Yhoem: Moo" byeung" byug wigi vang khoug: moo bidbang bo" bang jo, da:.

⁵Dei noem joem da" dung joem myeing thui: gi tunggung shoid vang" mo lang" shau" gyo: da:. Hau: thui: gi myhang: thang Mangso da" thui: yo' du da:.

⁶ASEING gi zin: yung" pain" byimi coid su: ri rheing" cab joem agyoo: mo myi: ri yu wa shid re" amyeing" byid: kaid lang" hau: su: gi vang yhe: lho: rheing" cab dacab ayam moo yhe: yab jo, da:.

⁷Dei noem joem mo da du: gi nyangnu" phung: gung moo jo, da" myikhyoem khoug: khyoo: nya: lo, yhoin" kaid lho: myigyu: joem ri koid: yu wigi zin: yung" pain" byimi void su: da" lo khoug: moo kaid byid: da:. Hau: su: gi myigyu: ri yu ci: wigi thu lo" da:.

⁸Dei noem du: khang" moo" moo xangsu: byu lo, yo' du da" lo, nyangnu" du: khang" moo" da" dung vhoo: moo dab ziri ngoo myang.

⁹Ngoo gi du go" da" rheing" cab myid: cab gi dei noem du: khang" mo" da" anam moo jo, ziri we' shau" myang. Rheing" cab joem gi phoug" dab da" lug joem yhang: ti" bang wigi rheing" cab cab khang" moo" gi dacab akhoug: moo gootu: dacab pyi: veing" tab to" da:.

¹¹Dei noem so" loo" lang" nyangnu" alheing: loo: za: shoid khang" moo" khyoo: yo" lo" da:. Nyangnu" dangain" bang: gi alheing: loo: za: nyangnu" yhi: nau shoid khyoo: dage" yo" yhe: da:.

¹²Nyangnu" da" gung joem nung" khung: joem lo, joem dung joem yo' rheing" cab' joem moo myojid" joem yo' thoeb to" da:.

¹³«Lheing: nyid da" rheing" cab' joem» ga: tid nyid da" thui: dathui: ri ngoo shoug" gyoo: bye:.

¹⁴Dei noem du: khang" moo" moo myonhoo: myid: loem: dab. Xang: shi" loem gi nulo: myonhoo:- eig loem: ein: loem: gi xangsu: byu myonhoo:- soem" loem: ein: loem: gi khang: khyi: myo, noo:- myid: loem: ein: loem: gi zoin bung: myonhoo: nghoid.

¹⁵(Nyangnu" gi ngoo Kheba gyid gyung: yam moo myang kho' bye: da" dei noem joem nyang: nghoid da:.) Dei noem joem moug: khyoo: do, wigi

¹⁶dang: lo" uri rheing" cab joem gi nyangnu" yo' dage" bo lo" da:. Dang: wa shid re" nyangnu" da" dung joem ri pyo: kaid khang" moo" rheing" cab joem gi nyangnu" yo' dage" dalo" nyid ashi"

¹⁷Dei noem joem theing: lang" rheing" cab joem theing: ago". Houg: lho: dei noem joem dang: lo" uri rheing" cab joem we' nyangnu" yo' dage" bo cang lo" da:. Ciwim gari dei noem joem gi nyangnu" ri khang" nyid da:.

¹⁸Hau: thang: ASEING shidkhoin" mo yi: yi: bang da" bidbang gi Noku Yhoem: Moo" khoem" moo" mo thu lo" wigi dei noem joem da" atho' khyoo: lo" nyid da:.

¹⁹Ngoo zung" yu" nyid ri nyangnu" dung joem ri pyo: kaid wigi mougmyid tho' mo dang: to' lo" da:. Hau: rheing" cab' joem we' nyangnu" yo' dage" lo" ago". Nyangnu" gi Noku Yhoem: Moo" bidthu shoid khoem" moo" duang: moo theing: wigi yi: yi: bang da" bidbang gi nyangnu" da" atho' moo jo, jo, da:.

²⁰Ngoo gi nyangnu" ri Kheba gyid gyung: moo Israela da" Mangso da" vhoo: moo myang khoo' bye: da" dei noem joem nghoid boem ziri yo" se' yu" kaid bye:.

²¹Nyangnu" du: khang" moo" moo myonhoo: myid: loem: loem:- dung myid: loem: loem: yo' nyangnu" da" dung loem: khang" moo" da" agyid" moo xangsu: byu lo, yhang: te" zi dalo, lo, dab da:.

²²Nyangnu" da" myonhoo: joem gi Kheba gyid gyung: nam moo ngoo shau" myang khoo' bye: da" ziyo' jhug nyang: yu" du da:. Dei noem du: khang" moo" gi shidkhoin" shoid khyoo: veing" veing" za: so" yu: lo" ago".