Read Lashi EZEKIEL 16 Bible Online

EZEKIEL 16 - Lashi bible

EZEKIEL 16

¹ASEING ngoo ri dang: dalheing: doem tid da:.

²Nyang: gi «Shid: se' da" byu we"- Yerusalem ri nyang: koid da" aco' ajhoid da" moo" joem ri toin" shed we'.

³Yoem: moo" bo ASEING nyang: ri tid nyid ziri Yerusalem ri tid kyoo" we'. «Nang gi Khanan mung" moo khu: re" zi nghoid da:. Re" phoo gi Amori byu nghoid wigi re" myhi' gi Hiti byu nghoid da:.

⁴Nang khu: re" uri hang" dayug wigi we' re" co' tei" ri aphyed byid:. Nang ri hang" acid" pyam byid:. Xoo" yo' we' hang" aboid cid" byid:. Nang ri hang" wigi we' pain" cu' athoeb byid:.

⁵Nang ri he: gu: koid byid: wa yhi' hang" wigi we' nang ri nheig akhyeug nghoid ago". Nang khu: re" uri nang ri hang" ajheddab nghoid ago"- nang ri jang: dam moo she: pyam to" ago".

⁶«Houg: lho: ngoo re" ayam khyo" so" lid: lo" uri nang gi nanya: suid" yo' lhu" nyid ziri shau" myang. Nang gi suid" lhu" ci: loug we' ngoo gi nang ri ashid: nhang: noug.

⁷Ngoo gi nang ri yang" zain: da" seiggam yhang: ti" gyi: loo nhang: nau. Nang gi yoem: bo re" lho: sheing: re" wigi zoomyi: dayug bue" ri" bye:. Re" noug" gi goolhoo' dab re" wigi re" xam: we' sheing: ri" bye:. Nghoid loug we' nang gi gung cen: doem: nghoid da:.

⁸«Ngoo doem so" lid: lo" uri nang gi se' jheddab da" ayo, ju" bye: ziri shau" myang. Ngoo gi re" gung cen: doem: ri nga" byisheing: yo' foid to" lho: nang ri jheddab wa dangsoo" byid: bye:. Nghoid- Ngoo gi nang yo' lo, xo' wa dang: theing to" lho: nang gi nga" byu bue" lo da». He: zigi yoem: moo" bo ASEING tid zi nghoid.

⁹Hau: thang: ngoo gi gyid yu wigi re" suid" ri ci" khyoo' byid: bye:. Ngoo ri re" gung moo zhainloin: xu: doem joid byid: bye:.

¹⁰Ngoo gi nang ri za: yo' thau" tab to" da" byisheing: joem foid wigi ge thang da" shooyid khyid: baid- zin: yung" pain" vhuthoeb yo' soug" khyeing: byisheing: joem ri byid: bye:.

¹¹Ngoo gi re" gung mo phoug" dab lug jonu" nghoid da" lo, theing" yo' yi: joem ri byid: foid bye:.

¹²Ngoo gi nang ri nhooxei" xei" byid: wigi yung" da" bidmug zhung" byid: bye:.

¹³Nang gi sheing: yo' ngei zi joem yo" da:. Houg: lho: nang gi khanham we' zin: yung" pain" thau" byi: yo' byisheing: void da:. Nang gi ge thang da" cen: moin" mo koid da" zooyho' ri zo:- byoo: yhid: yo' zhainloin: xu: zoo: wa shid re" yo" da:. Re" da" yung" zigi yi: yi: bang wigi nang gi khokham myhi' bue" lo da:.

¹⁴Nang gi re" joeb byeung" sho' yung" gang mo mungdain: khang" moo" myeing gyi: lo da:. Ciwim gari nang ri hougsu: soin' shoung: byid: su: ngoo gi nang ri gye" jheddab yoomo nghoid. He: zigi yoem: moo" bo ASEING tid zi nghoid.

¹⁵Nghoid loug we' nang gi re" da" yung" ziri yo' myeing gyi: ziri akho: akhang" yu wigi ju" re" da" yugkhang" moo" yo' yhoeb da:.

¹⁶Nang gi re" byimi dayham" ri noku joyoo joem moo shoung: wa shid re" ci: wigi nang gi shava: myhi' dayug yhang: ti" yugkhang" moo" ri nanya: gung ab byid: pyam da:.

¹⁷Nang gi nang ri ngoo byid: da" ngei yo' sheing: zi joem ri yu wigi yuggi alhoo: joem koid wa shid re" ci: pyam lho: houg: joem yo' myi: shoid lang shoid moo" koid da:.

¹⁸Nang gi nang ri ngoo byid: to" da" za: thau" byimi joem ri yu wigi hau: joem ri soolhoo: joem atho' moo yhe: ke" to" da:. Houg: lho: nang gi nang ri ngoo byid: to" da" zhainloin: xu: yo' nam pyo: xu: joem soolhoo: joem ri ngei" byid: da:.

¹⁹Ngoo gi nang ri zoo: noem byid:. Ge thang da" cen: moin"- zhainloin: xu:- byoo: yhid: byid: bye:. Nghoid loug we' nang gi hau: joem ri yu soolhoo: joem moo myonhoo: yoo" wa shid re" xoin" ngei" byid: pyam da:. He: zigi yoem: moo" bo ASEING tid zi nghoid.

²⁰Hau: thang: nang ngoo ri khu byid: da" yuggi zoo: yi myiyi: zoo: yiri shu" yu wigi yu soolhoo: joem jhang nyangnu" ri xoin" ngei" byid: pyam da:.

²¹Nga" zooshang: yiri yu soolhoo: joem jhang khyoo: shu" yhe: wigi shugbyid: lho: ngoo ri jhug azug zigi xoo: sho' nyang: age zi gi" bye: anghoid rhe".

²²Nang shava myhi' khyo" aco' ajhoid kangso' dei nyid uri nang gi nanya: suid" moo shoo" cen: doem: nyid da" zooshang: yo, mo apyaid ri khanham dalheing: lang" amyid boin: nghoid da:.

²³Yoem: moo" bo ASEING tid zigi «Nang gi joem: lo abye:- joem: lo" abye:. Nang gi hau: akhyeing" da" moo" dangain" ri koid wigi

²⁴Fu" moo" khyoo khang" moo" da" aqei ayam moo no' wa yu soolhoo: joem ri zhug to" lho: shava myhi' moo" ri koid da:.

²⁵Nang gi re" yung" khyoo: ri thoem" boeb boem" khyo" she: khyoid lid: lo" da:. Nang gi nanya: gung ri ayam mo so" lid: lo" wa yugkhang" moo" ri byid: wigi nang gi nyid" khang" nyid" shava myhi' tho' je lid: da:.

²⁶Nang gi mhain: myid bo da" re" yhoem: kyoo" cang" Egutu byu yiri nang yo' dage" yhoeb yoo vang nhang: wigi nang gi ngoo nheig yoo wa khyo" re" shava myhi' moo" ri koid da:.

²⁷«Akhid" ngoo gi nang ri yooboo dam byid: wa yo' re" shid re" nga" mainkaid jeju" ri yu pyam byid: wa shid re" nga" lo, ri tu: to' kaid bye:. Ngoo gi nang ri Philisti bang: lo, khyoo: ab byid: pyam wa. Houg: bang: gi nang ri ngheing" lho: re" age da" akyang wigi aco' ajhoid bui" bang: nghoid.

²⁸«Nang gi gooji yo' nheig adeig yoomo Asuri bang: da" thang: khyoo: cang tang" yhe: lo" da:. Nang gi nyangnu" da" shava myhi' nghoid da:. Nghoid loug we' nyangnu" we' nang ri nheig atho' deug nghoid da:.

²⁹Nang gi phaga: ga: da" mungdain: Babelon byu yi da" shava myhi' we' nghoid da:. Nghoid loug we' nyangnu" we' nang ri nheig atho' deug nghoid ago".

³⁰He: zigi yoem: moo" bo ASEING tid nyid zi nghoid. «Nang gi sho' ase' da" shava myhi' yhang: ti" he: moo" dangain" ri koid da:.

³¹Khyoo: khaid khang" moo" moo soolhoo: joem ri no' wa joyoo joem ri zhug lho: shava myhi' moo" ri koid da:. Nghoid loug we' nang gi shava myhi' gooji yhang: ti" ngei yoo" wa khyo" thu nyid yen" zi anghoid.

³²Nang gi nyang: nya: yhoem: seing: phoo ri jheddab wa gungthid byu being" yi yo' myi: shoid lang shoid yen" da" myiyi: yo' du da:.

³³Shava myhi' rigi ngei byid: ago". Nghoid loug we' nang gi re" da" zooyam phoo yiri jhungshug byid: wigi nyangnu" khyi' khang" moo" mo re" lho: nang yo' yhoeb wa shid re" khougvhoid jhungshug byid: da:.

³⁴Nang gi gooki" lid da" shava myhi' nghoid da:. Nang ri shava myhi' bui" sho' ga: hang" ajhoin" nghoid da:. Nang ri ngei abyid: nang wigi za: nyangnu" ri ngei byid: da:. Nghoid- nang gi gootu: yo' adu goo" da:.

³⁵Houg: lho: sho' ase' da" shava myhi' Yerusalem nang we"- akhid" ASEING tid nyid ziri gyo: yu" we'.

³⁶He: zigi yoem: moo" bo ASEING tid zi nghoid. «Nang gi re" byimi joem ri khyoid pyam wigi shava myhi' yhang: ti" nang nya: gung ri re" zooyam phoo yi yo' re" aco' ajhoid da" yu soolhoo: joem dangain" jhang khyoo: byid: pyam da:. Houg: lho: yu soolhoo: joem ri ngei" byid: wa shid re" re" zooshang: yiri said pyam da:.

³⁷He: gang mo ngoo gi shid phyang" mo nang jheddab ziyo' nang ngheung" da" re" zooyam phoo yi dangain" ri khe: zheing" yu wa. Ngoo gi nyangnu" ri re" lheing khoem moo shu" nyhid: to" lho: re" byimi joem ri khyoid pyam byid: wigi nyangnu" wigi nang ri shoo" cen: doem: shau" myang nhang: wa.

³⁸Ngoo gi nang ri myi: shoid lang shoid ziyo' byu said moo" khyo" dang: phyed wigi nga" nheig yo: ziyo' nheigloem: yoin zi wigi nang ri shid: ziyo' yooboo dam byid: wa.

³⁹Ngoo gi nang ri nyangnu" yoem: so' khoug: moo nyhid: to" wigi nyangnu" gi nang shava myhi' moo" koid wigi yu soolhoo: joem ri no' da" joyoo joem ri phyo' khyo' pyam byid: boem wa. Nyangnu" re" byimi joem yo' phoug" dab lug zi joem ri yu pyam byid: wigi nang ri shoo" cen: doem: nyhid: too" khoo' goo" wa.

⁴⁰«Nyangnu" gi nang ri lug boem yo' du" wa shid re" byu daphung: ri lhu: zhuang" to' kaid wa. Houg: lho: nyangnu" gi nyangnu" da" sham: wigi nang ri adu atoem koid pyam wa.

⁴¹Nyangnu" gi re" yhoem: joem ri nghe' pyam wigi re" yooboo dam loem zo: ziri myiyi: yiri shau" myang nhang: loo wa. Ngoo gi nang ri shava myhi' bui jang" mo theing: pyam nhang: lho: re" zooyam phoo yiri jhungshug joem gam byid: ziri toem' pyam wa.

⁴²Houg: lang" nga" nheig yoo bei: byug wigi ngoo gi yo loo" wa. Ngoo gi nheig we' ayoo: loo: wa. Myid we' amyoo: loo: wa.

⁴³Nang gi nang ngi shi" uri nang ri ngoo khasu" khu: gyi: kaid ziri to" myhid pyam lho: nang koid lo da" moo" joem dangain" wigi ngoo ri nheig yoo: nhang: da" khyoo: koid abye:. He: zigi nang nyangnu" dangain" ri doem xab byid: wa shid re" ngoo koid zi nghoid. Nang gi nang koid lid: lo da" gootu: aco' ajhoid moo" joem dangain" adang moo ciwim gain: tho' zung moo" ri pug lung: kaid la". Yoem: moo" bo ASEING tid bye:.

⁴⁴ASEING tid zigi «Yerusalem we"- subi" gi re" khyoo: ri ‹Ngikyi: nya: zoo: ngikyi:› ga: dang: zhoem' zhoem' da:.

⁴⁵Nang gi gyeing" nyang: re" myhi' da" myiyi: zoo: nghoid da:. Nyang: gi nya: yhoem: seing: phoo yo' nya: zoo: yiri gye" ngheing" da:. Nang gi nyang: nya: yhoem: seing: phoo yiri yo' nya: zoo: yiri gye" ngheing" da" nya: bi nya: nhung" bang: yo' du da:. Nang yo' re" bi re" nhung" voomoo" joem gi nya: myhi' Hiti yo' nya: phoo Amori yo" da:.

⁴⁶Re" bi: gi mougzhung: shoid mo Samari yo' nya: voogung joem nghoid da:. Re" nhung" gi mougpyi: shoid mo Sodom yo' nya: voogung joem nghoid da:.

⁴⁷Nang gi nyangnu" da" khyid: khoo: moo cang wigi nyangnu" da" aco' ajhoid moo" ri cang koid lho: nheugshid: nyid rhe". Anghoid. Khamyhang akyoo: shi" ri za: nang gi nang koid da" ja: khang" moo" gi nyangnu" koid tho' je xoo: sho' nghoid da:.

⁴⁸Yoem: moo" bo ASEING tid zigi «Ngoo gi kangso' dei nyid da" Mangsoo nghoid ziyo' dayhang: ti" re" nhung" Sodom yo' nya: voogung joem gi nang yo' re" voogung joem koid lid: lo da" akhyeing" ashoeb khyoo: khanham we' alhung koid nghoid ago".

⁴⁹Nyang: yo' nya: da" voogung joem gi nyangnu" moo zoo: noem agoin ago" jo, ziyo' yug yoo myenjham" tung" shoug" nyid yoomo nghoid boin: ago". Nghoid loug we' nyangnu" gi myung bang: yo' akho: akhang" ayoo" bang: ri ayu" coung: nghoid ago".

⁵⁰Nyangnu" gi nghoid boin: ziyo' nheigloem: thain: boem lho: ngoo ngheing" da" moo" ri koid boem ago". Houg: lho: nang goolhoo' si' bye: ziyo' dayhang: ti" nyangnu" ri ngoo phyo' shoin' pyam bye:.

⁵¹«Samari gi nang shoid da" yooboo da" agung dayi" lang" akoid shoid nghoid da:. Nang gi nyang: lhung koid lid: lo da" tho' je wigi aco' ajhoid moo" ri koid da:. Re" akyang byo, ziri tu: kaid yu" ri re" bi: re" nhung" tang: gi ce: yooboo ayoo" yhang: ti" nghoid da:.

⁵²Houg: lho: akhid" nang gi re" ngi: yoem" khyoo: ri kham zoo: ca" abye:. Re" yooboo gi re" bi re" nhung" tang: yooboo joem tho' je sung xoo: yoomo re" nam moo nya: eig yug gi yooboo ayo" yhang: ti" nghoid ago". Akhid" myo, ni nuni re" asho' ashid: akhyoo: ri kham zoo: we'. Ciwim gari: nang gi re" bi: re" nhung" tang: ri gyeung" shang: yhang: ti" yu" bui" nhang: bye:» ga: tid.

⁵³ASEING Yerusalem ri «Ngoo gi Sodom yo' nya: voogung joem Samari yo' nya: voogung joem ri doem nyid gi yab ge nhang: wa. Nghoid bye:- ngoo gi nang ri we' doem nyid gi yab ge nhang: wa.

⁵⁴Nang gi nanya: gung ri myid sho' loo wa. Houg: lho: re" ngi: yoem" zigi re" bi: re" nhung" tang: khayhi' nyid gi yab ge ziri nya: tang: ri ci: shug byid: loo wa.

⁵⁵Nya: eig tang: gi doem nyid gi yab ge yoo" zoo: yoo" shug loo wa. Nang yo' re" voogung joem ri we' doem zhug too" wa.

⁵⁶Nang nghoid boin: da" ayo, yo' nang koid da" akhyeing" moo" ri apau: thu kaid shi" ayo, moo Sodom ri nang yinoug lhung tu' anghoid rhe". Akhid" nang gi nyang: yo' dayhang: ti" za: nghoid nyid abye:. Edom byu yi Philisti byu yi yo' nang ri ngheing" da" re" yhoem: kyoo" cang" gootu: byumyu" yi shid re" nang gi yinoug tu' ei" wa bue" jo, abye:.

⁵⁷

⁵⁸Nang gi nang koid lid: lo da" anyoin: athung" moo" yo' aco' ajhoid moo" joem da" gang mo kyi" khyeug kham zo: nyid ca" abye:» ASEING tid bye:.

⁵⁹Yoem: moo" bo ASEING tid zigi «Ngoo gi nang loem zoo: eung: ziyo' dayhang: ti" koid wa ciwim gari nang gi re" dangsoo" ri byam to" myhid wigi dang: theing ri phyo' shoin' yoomo nghoid.

⁶⁰Nghoid loug we' ngoo gi nang ngi shi" uri nang yo' to" da" dang: theing ri ngoo ngi: shab wigi ngoo gi apyaid atoo: moo geing: teing jo, wa dang: teing ri nang yo" koid too" wa.

⁶¹Nang gi nang khasu" koid lid: loo byid: ziri myid boin: wigi re" bi yo' re" nhung" tang: ri nang doem yo" yu uri hau: joem gang mo nang myid sho' loo wa. Nang yo' koid to" da" dang: theing moo abo boo nghoid loug we' nya: eig tang: ri re" myiyi: zoo: tang: yhang: ti" nyang: bui" nhang: wa.

⁶²Ngoo gi nang yo' to" to" da" dang: theing ri aseig doem koid lho: nang gi ngoo ASEING nghoid ziri se' loo wa.

⁶³Ngoo gi nang koid shoid lid: lo da" shoid moo" dangain" ri yooboo khyoid pyam byid: wa. Nghoid loug we' nang gi hau: joem ri myid boin: wigi re" nhoid ri ayo" foo' loo: sho' myid sho' loo wa» yoem: moo" bo ASEING tid too" bye:.