Read Lashi EZEKIEL 18 Bible Online

EZEKIEL 18 - Lashi bible

EZEKIEL 18

¹ASEING ngoo ri dang: tid da:.

²Nyang: tid zigi «Israela mung" moo byu yi pug gi pug gi tid nyid da" he: dang: zhoem' gi cinghoid la" ‹Myhi' phoo yigi zabyid shi" jhen: zo: ago". Nghoid loug we' zoo: yi zei: kyoem: boem ago"›.

³Yoem: moo" bo ASEING tid zigi «Ngoo gi kangso' dei nyid da" Mangsoo nghoid nyid ziyo' dayhang: ti" nanu" gi he: dang: zhoem' ri Israela moo adoem pug tid loo goo" loo: wa.

⁴Myhi' phoo yi da" kangso'- zooshang: yi da" kangso'- byu yugkhang" moo" da" kangso' ri ngoo seing: da:. Yooboo shoid su: gi shid: ca" da" su: nghoid wa.

⁵Gyeing" nyang: loem: lug su: deingmain" su: yo' phau" myang: nheigloem: boo su: dayug nyid ein: shang

⁶Nyang: gi Israela byumyu" yi da" yu phara" soolhoo: joem ri ano'- toem' to" da" yu phara" phoin: moo ngei" byid: da" xoin" ri azoo:. Nyang: gi sube" gooyug da" yhoem: seing: myhi' ri we' amhid" phyo' yu mi ci: da" myiyi: yo' we' gung shoo" azoem".

⁷Nyang: gi hang" ri we' amhoug zoo: alhoid zoo:- ngei jhid" yu su: kookham: kham: to" da" ziri we' doem tau" byid: da:. Nyang: gi zoo: yoid bang: ri byid: zho" da:. Gung cen: nyid bang: ri byimi byid: foid da:.

⁸Nyang: gi atu" amyaid shid re" ngei ri ajhid" byid:. Nyang: gi akhyeing" moo" koid wa ziri he: pyam lho: cite" myeing" myoo: go" jang" moo nghoid loug goolhoo' za: dang: phyed byid: da:.

⁹Houg: yhang: ti" byu gi nga" amyeing" joem ri tam" gyo: cang yhe: wigi nga" tarha" joem ri goolhoo' za: cang pyeing da:. Nyang: gi deingmain" wigi yo" dei nyid wa. Yoem: moo" bo ASEING tid bye:.

¹⁰«Houg: lho: hau: yug moo lhoid zoo: phyo' zo: wigi byu said lho: nya: phoo khanham we' alhung koid yu" da" moo" hid: yhang: te" ja: joem ri koid da" yug gi zoo: dayug yo" ein: shang

¹¹Nyang: gi khoem to" da" yu phara" phoin: yhoem: joem moo ngei" byid: da" xoem" joem ri zo: wigi sube" da" yhoem: seing: myhi' yiri mhid" phyo' yu da:.

¹²Nyang: gi myung bang: ri mhoug zo: lhoid zo: da:. Nyang: gi ngei jhid" yu su: da" kookham: kham: to" da" ziyoo jonu" ri seing: yu pyam da:. Nyang: gi tungbau yu phara" yhoem: joem khyoo: yhe: lho: aco' ajhoid da" yu soolhoo: joem ri no' da:.

¹³Houg: lho: nyang: gi atu" amyaid yoo" wa shid re" ngei jhid" byid: da:. Nyang: yo" dei nyid wa la". Nyang: yo" dei nyid wa zi anghoid. Nyang: gi he: aco' ajhoid da" moo" dangain" ri koid bye: yoomo shid: wa. Nya: yooboo shid re" nyang: shid: ca" wa.

¹⁴Akhid" he: eig yug ein: yug moo yuggi zoo: dayug nyid ein: boem shang. Nyang: gi nya: phoo koid lid: lo da yooboo dangain" ri myang nghoid loug we' nya: leig ri acang nghoid da:.

¹⁵Nyang: gi Israela byumyu" yi da" yu phara" soolhoo: joem ri ano'- toem' to" da" yu phara" phoin: moo ngei" byid: da" xoin" ri azoo:- nyang: gi sube" gooyug da" yhoem: seing: myhi' ri we' amhid" phyo' yu

¹⁶Hang" dayug ri we' adoin: zeig zoo: hang" dayug ri we' alhoid zoo:. Nyang: gi ngei jhid" yu su: kookham: khyo" to" to" da" ziyoo ri we' ayu seing: pyam. Nyang: gi zoo: yoid bang: ri byid: zho"- gung cen: nyid bang: ri byimi byid: foid da:.

¹⁷Nyang: gi akhyeing" moo" koid wa ziri he: pyam lho: atu" amyaid shid re" ngei ajhid" byid: nghoid da:. Nyang: gi nga" tarha" joem ri cang yhe: wigi nga" amyeing" dang: joem ri tam" gyo: cang yhe: da:. Nyang: gi nya: pho yooboo gang mo shid: wa zi anghoid. Nyang: koem' gi gyeing" nyang: yo" dei nyid wa zi nghoid.

¹⁸Da shoid khyo" doem yu" ri nya: phoo gi mhoug zo: wigi lhoid zo: phyo' zo: da:. Houg: lho: yugkhang" moo" ri akhyeing" moo" koid da:. Nyang: gi nyang: nyang: koid shoid lid: lo da" yooboo joem gang mo shid: lo" da:.

¹⁹«Nghoid loug we' nanu" myid: boem zigi ‹Ciwim yoomo yuggi zoo: gi nya: pho da" yooboo gang mo shid: noo ashau" la"›. Dang: phuid: gi hau: yuggi zoo: gi jo ziyo' ge moo" ri koid abye:. Nyang: gi nga" tarha" joem ri zoem: ci: lho: hau: joem ri goolhoo' za: cang nyid da:. Houg: yoomo nyang: gi gyeing" nyang: dei nyid wa.

²⁰Yooboo koid su: gi shid: wa su: nghoid da:. Yuggi zoo gi nya: pho da" yooboo joem gang mo shid: noo ashau" kham zoo: wa. Nya: phoo we' nya: yuggi zoo: yooboo joem gang mo shid: noo akham zoo: ca" wa. Byu yigi ge zi koid gang mo aphoug" jhungshug byid: zi shoug" wa. Houg: lho: akhyeing" su: gi nyang: koid da" akhyeing" moo" shid re" shid: noo dayam dayoo: kham zoo: ca" wa.

²¹«Akhyeing" su: dayug gi yooboo shoid ziri theing: pyam lho: nga" tarha" joem ri cang wigi nyang: gi jo ziyo' ge ziri koid nghoid rigi nyang: ashid: wa nyang: gi gyeing" nyang: dei nyid wa.

²²Nyang: gi jo ziri koid da" gang mo nya: yooboo dangain" ri khyoid pyam byid: lho: nyang: gi dei nyid wa.

²³«Akhyeing" su: shid: ziri" ngoo yu" gau nyid ein: nanu" jhoo: go" rhe"» ga: Yoem: moo" bo ASEING myid:. «Anghoid- nyangnu" nheigloem: thid wigi dei nyid ziri je da myang nau.

²⁴«Nghoid loug we' tarha" deingmain" su: dayug ge ziri akoid loo za: theing: pyam wigi akhyeing" bang: koid da" akhyeing" moo" yo' aco' ajhoid moo" dangain" ri koid shid" lo nghoid rigi nyang: hougsu" yo" xo' dei nyid wa la". Ayo" dei nyid wa Nyang: koid bye: da" ge khyoo: daja: ri we' axoem" too" byid: wa. Nyang: gi shid: loo" wa. Ciwim gari nyang: jhug azug ziyo' nya: yooboo joem: yoomo nghoid.

²⁵«Nghoid loug we' nanu" gi ‹ASEING koid zi ajoo nghoid da› ga: tid ago". Israela nanu" we" nga" dang: ri tam" gyoo: we'. Ngoo koid ziri ajoo ein: myid jho: nyid go" rhe". Ajo zigi nanu" da" khyoo: nghoid boem ago".

²⁶Tarha" deingmain" su: dayug ge zi akoid loo: theing: pyam wigi akhyeing" moo" koid wigi shid: lo" uri nyang: gi nyang: koid lid: loo bye: da" akhyeing" moo" gang mo shid: lo" zi nghoid.

²⁷Akhyeing" da" byu dayug gi yooboo shoid nyid ziri theing: pyam wigi jo ziyo' ge ziri koid uri nyang: gi nya: kangso' ri khyoid yu da:.

²⁸Nyang: gi nyang: koid nyid ziri boin: so" wigi yooboo koid shoid ziri theing: pyam da:. Houg: yoomo nyang: gi ashid: loo: deing deing yo" dei nyid wa.

²⁹Houg: lho: Israela byu yi nanu" gi ‹ASEING koid zi ajoo› ga: tid ago". Ngoo koid zi ajoo ga: nanu" myid jho: boem anghoid goo" rhe" ajo zigi nanu" danghoid.

³⁰«Akhid"- ngoo yoem: moo" bo ASEING gi Israela byumyu" nanu" yugkhang" moo" ri nyang: nyang: koid da" moo" shid re" dang: phyed wa ein: tid nyid bye:. Nanu" koid nyid da" akhyeing" moo" dangain" mo lheung: loo ge'. Nanu" da" yooboo wigi nanu" ri aphyo' shoin' nhang: goo".

³¹Nanu" koid loo bye: da" akhyeing" moo" ri asoem" byid: pyam we'. Nanu" nyang: nanu" myid aseig- nheigloem: aseig kham: yu ge'. Israela byumyu" nanu" gi ciwim shid: nau boem ago" la".

³²Yoem: moo" bo ASEING tid zigi «Ngoo gi hang" dayug ri we' ashid: nhang: nau. Nanu" yooboo mo lheung: tau" lo wigi kangso' dei nyid ge» ga: tid.