Read Lashi EZEKIEL 19 Bible Online

EZEKIEL 19 - Lashi bible

EZEKIEL 19

¹Israela yi da" khokham nu" eig yug shid re" he: jikhoin" ri khoin" wa shid re" ASEING ngoo ri tid da:.

²Nanu" nya: myhi' gi khangkhyi myhi' danghoid nhung: la". Nyang: gi nya: da" khangkhyi nu" tang: ri gye" nheigloem: thain: da" khangkhyi loo: joem phung: gung moo khu: gyi: kaid da:.

³Nyang: gi anu" dadu: ri khu: gyi: kaid wigi shoo" khaid phajhi" jhau" byid: da:. Nyang: gi byu shoo" se' zo: re" da:.

⁴Byumyu" yigi nya: khyoo: ri shau" gyo: wigi nyang: ri duang: khuang" daloem: moo kuang yu ago". Nyangnu" gi nyang: ri langhui" daloem: wigi Egutu mung" khyoo: she: khyoid lo" da:.

⁵Nyang: (khang: khyi myhi') gi myid byu jang: thang sho' lang" nyid da:. Hau: thang: nyang: gi khangkhyi nu" dadu: doem khu: gyi: kaid wigi Hau: du: gi gye" akhyeing" da" khangkhyi dadu: bue" re" da:.

⁶Hau: du: gi gyi: loo lang" nyang: gi gootu: khangkhyi joem yo' vhoeb jo, da:. Nyang: we' shookhaid phajhi" jhau" yu wigi byu shoo" se' zo: re" da:.

⁷Nyang: gi gyi pyuzung joem ri mhoin' pyam wigi voogung joem ri phyo' shoin' pyam da:. Nyang: myeung kaid khang" moo" hau: mougmyid moo nyid bang: gyoug boem ago".

⁸Byumyu" yigi nyang: ri khaid zain: wa shid re" zeing: foem: nyid ago". Byu yigi khyi' khang" moo" mo re" lo ago". Nyangnu" gi nyangnu" da" shoo" khaid goin joem ri myu" kaid lho: nyang: ri nyangnu" lhid mo myhi' yu da:.

⁹Nyangnu" gi nyang: ri khoem: khoug: moo kaid to" wigi nyang: ri Babelon khokham jhang shu" lo" da:. Nyangnu" gi nyang: ri lhoug zung" nyid ago". Hougsu" yoomo Israela bau gung joem moo nyang: myeing thui: khanham we' adoem shau" gyoo: loo: nghoid da:.

¹⁰Re" myhi' gi gyid zoo: gyung: nam moo sho" to" da" zabyid nei yo' du da:. Hau: joyoo moo gyid myoo" sho' jo, yoomo zabyid nei moo afu' yo' ashi" byeung" jo, da:.

¹¹Hau: akung: joem gi kyung: wigi khokham lhamdung: youg: bue" lo da:. Zabyid nei gi jhoemmoug" thei" joem khyoo: ju" sho' yug myhang: do, lo" da:. Hau: zigi khayhi' afu' mung" wigi khayhi' myhang: do, lo" ziri yugkhang" moo" shau" myang da:.

¹²Nghoid loug we' nheig yo: da" lo, joem wigi hau: ziri agyi: mo lang: phoin' pyam lho: Myid gung khyoo: she: pyam khyo' pyam ago". Bid thu shoid mo lid gi hau: ziri hau' kyug pyam da:. Hau: da" akung: joem gi gyau: gyoo" lo" ago". Hau: joem gi kyug lo" wigi nghe' pyam zi shoug" ago".

¹³Akhid" hau: ziri kyug hei' lho: gyid ajo, da" dain" pyoid yoo moo sho" kaid da:.

¹⁴Zabyid gam moo myi: dab lo da:. Myi: gi hau: akung: yo' ashi" ri nge" pyam da:. Akung: joem gi khanham we' yoem: adoem boo loo wa. Hau: zigi khokham lhamdung: khanham we' abui" loo wa. He: zigi koug ngau da" jikhoin" nghoid. He: ziri doem pug khoin" khoin" koid ago".