Read Lashi EZEKIEL 2 Bible Online

EZEKIEL 2 - Lashi bible

EZEKIEL 2

¹Hau: zigi «Shid: se' da" byu we"- to' yab we'. Ngoo nang ri dang: tid nau» ga: tid.

²Hau: thui: ji nyid uri Mangso Venyi: nga" akhoug: moo vang wigi ngoo ri tu: to' kaid da:. Dang: xo' ji nyid ziri ngoo shau" gyo:.

³«Shid: se' da" byu we"- ngoo gi nang ri Israela byumyu" yi jhang nhang: kaid wa. Nyangnu" phoug" phyid" yi yhang: ti" nyangnu" gi ngoo ri thougtheung wigi ngoo ri gyi phug koid lho: akhid" ju" sho' thougtheung nyid boem shi".

⁴Nyangnu" gi nheigloem: thain: wigi ngoo ri aphoug" myang: nghoid ago". Houg: yoomo ngoo yoem: moo" bo ASEING citid nyid ziri nyangnu" ri yhe: tid kyoo" wa shid re" nang ri ngoo nhang: kaid.

⁵Hau: thougtheung bang: re" dang: ri tam" gyoo: loug- atam" gyoo: loug- nyangnu" phung: khoug: moo lapi: dayug nyid lid: loo bye: nhung: ga: ziri nyangnu" si' goo" baja".

⁶«Nghoid loug we' shid: se' da" byu nang gi nyangnu" ri we' nyangnu" citid ziri we' agyug ca". Nyangnu" gi nang ri aphoug" akhyoid- cishu: anhang: koid boem wa. Hau: zigi gung goug" joem phung: gung moo nyid yhang: ti" nghoid wa. Xo' lho: hau: thougtheung byu yiri yo' nyangnu" tid zi ci: ri we' agyug.

⁷Nyangnu" tam" gyoo: loug- atam" gyoo: loug nyangnu" ri tid kyoo" wa shid re" ngoo nang ri tid gu: ri nang nyangnu" ri tid kyoo" wa zi nghoid. Nyangnu" thougtheung bang: nghoid ziri nang myid boin: we'.

⁸«Shid: se' da" byu we"- nang ri ngoo tid ziri tam" gyoo: we'. Nyangnu" yhang: ti" athougtheung. Re" nhoid ri fo' lho: nang ri ngoo byid: ziri zoo: we'».

⁹Nga" shid moo lo, dalo, yhoin" thu re" zi ngoo shau" myang. Hau: lo, gi mougsoug" deing: zhoeb ci: da:.

¹⁰Hau: lo, gi mougsoug" deing: ri pei: kaid da:. Hougmoo eig shoid goin" lhid" to" ziri ngoo shau" myang. Koug ngau ziri houg moo lhid" to". Ngoug yang" yang" ziyo' noo kyeing" kyeing" zi we' houg: moo bo da:.