Read Lashi EZEKIEL 23 Bible Online

EZEKIEL 23 - Lashi bible

EZEKIEL 23

²Nyang: tid zigi «Shid: se' da" byu we"- goonham' myiyi: zoo: eig tang: nyid ago".

³Nyang: tang: ngi shi" uri Egutu moo nyid boem ri nya: eig yug da" zoomyi: gyeing" aya: ri ci: phyug pyam wigi shava myhi' bue" lo boem ago".

⁴Nya: be da" myeing gi Ohola ga: zi nghoid. (Nyang: gi Samari da" gungthid nghoid). Nya: nhung" yug da" myeing gi Oholiba ga: zi nghoid. (Nyang: gi Yerusalem da" gungthid nghoid). Ngoo gi nya: eig tang: goin" ziri lo, xo' yu wigi nya: eig tang: ngoo ri zooshang: khu: byid: da:.

⁵Ohola gi ngoo seing: su: bain nghoid bye: thang: ri shava myhi' xo' koid wigi Asuri mung" mo nya: zooyam phoo yi da" jheddab myid ri myid mhain: nyid da:.

⁶Nyangnu" gi khalham" void khin' byimi void ci: da" gyizoo: yi nghoid wigi nheigboo yi yo' aya: myhang: da" gyizoug: ludaid yi nghoid da:. Nyangnu" dangain" bang: gi yung" da" myang: ju: gyizoug: yi nghoid ago".

⁷Nyang: gi Asuri zoug: yi dangain" da" shava myhi' bue" lho: nya: da" myid mhain: zigi Asuri yu soolhoo: joem ri no' khyo" nyang: nya: gung ri ayung" alho' bue" nhang: pyam da:.

⁸Nyang: gi nya: da" zoomyi: gyeing" aya: ri ze" khyoid pyam da" Egutu mo shava myhi' moo" ri xo' koid da:. Nyang: gi ngi shi" da myiyi: nghoid shi" da" ayo, mo nyang: yuggi yigi nyang: yo' yoeb wigi nyang: ri shava myhi' yhang: ti" zoem" khau: ago".

⁹Hougsu" yoomo ngoo gi nyang: ri sung jheddab da" nya: Asuri yuggi yi lo, khyoo: ab byid: bye:.

¹⁰Nyangnu" gi nyang: ri gung cen: khyoid shang: pyam byid: lho: nya: yuggi zoo: yi yo' myiyi: zoo: yiri shu" yu pyam da:. Houg: lho: nyang: ri shamcoin" yo' said pyam da:. Myiyi: yigi khyi' khang" moo" moo nyang: loem zo: da" khyoo: ri gei sang: yen" da:.

¹¹«Nya: nhung" Oholiba gi he: ziri myang nghoid loug we' nyang: gi Ohola koid lid: lo da" tho' je xo: je myoo: sho' shava myhi' moo" zoo" ri koid da:.

¹²Nyang: we' Asuri mo nheigboo yi yo' gyizoug: yi yung" da" khin' byimi void ci: da" gyizoo: yiri yo' myang: ju: zoug: yi yung" da" zoolu: yiri yu" mhain: nyid da:.

¹³Ngoo gi nyang: bain sho' akyang yoin" ziyo' nya: nhung" we' nya: bi: yhang: ti" age khyoo: ri myang byid: da:.

¹⁴«Nyang: gi nya: da" akyang yoin" jang" moo je je gyo" noeb vang lo" da:. Nyang: gi pyiyam joem mo kyung" tab to" da" Babelon gyizoug: moo" yi da" gung du: soolhoo: yo' nyangnu" da" phyid" doem: goem: sho' moo gye" ni sho' xoug" to" da" shooyid phyid" cu" yo' nyangnu" vhuloem joem mo gye" yu" yung" sho' shoung: da" vhuthoeb joem wigi nya: myid ri lang: yu da:.

¹⁵

¹⁶Nyang: gi nyangnu" ri myang yo' dage" yu" mhain: myid bo lo wigi Babelon moo nyid da" nyangnu" jang" khyoo: lagyoo: nhang: kaid da:.

¹⁷Babelon byu yigi nyang: yo' gung shoo" zoem" wa shid re" re" lo ago". Nyangnu" gi nyang: ri ci: wigi gye" ayung" alho' koid boem yoomo lo" thang moo nyang: gi nyangnu" ri co' loo wa.

¹⁸Nyang: gi nya: gung ri byu phung: gung moo ci: shug wigi nyang: gi sho' ase' da" shava myhi' nghoid khyoo: ri yugkhang" moo" ri si' nhang: da:. Ngoo gi nya: bi: ri co' pyam yhang: ti" nyang: ri we' co' pyam bye:.

¹⁹Nyang: gi zoomyi: nghoid uri Egutu moo shava myhi' bue" lid: lo yhang: ti" avoid ci: shug lho: shava myhi' dayug tho' je xo: byug da:.

²⁰Nyang: gi loo zei: joem anghoid lang" myang: loo joem da" mhain: myid dangain" bo da" lid: sho' nyam da yuggi yiri mhain: myid byeung" jo, da:.

²¹(Oholiba we"- nang gi Egutu moo zoomyi: nghoid shi" uri yuggi yi re" noug" ri ze" phyug ayo, mo akhyeing" moo" ri doem pug koid nau da:.)

²²Oholiba we"- akhid" ngoo yoem: moo" bo ASEING nang ri tid nyid. Nang ri re" jheddab bang: gi ngheing" byug abye:. Nghoid loug we' nyangnu" gi nang ri nheig yo: wigi nang ri lheing khoem too" sho' ngoo koid nhang: wa.

²³Ngoo gi Babelon byu yi dangain" yo' Khalde byu yi dangain"- Pekod- Shoa- Koa mo bang:- Asuri byu yi dangain" ri shu" loo wa. Ngoo gi hau: yung" da" zoolu: nheigboo yi yo' gyizoug: yi dangain"- yhouggyen: da" zoug: yi yo' myang: dab mo aya: myhang: da" zoug: yi dangain" khe: zheing" too" wa.

²⁴Nyangnu" gi myang: rheing" joem pang" thoug rheing" yo' gyidab moo" shu" lho: mougzhung: shoid khyo" re" khaid zain: goo" wa. Nyangnu" gi goo joem joto' mug joem ci: lho: nang ri re" lheing khoem too" wa. Ngoo gi nang ri nyangnu" lo, khyoo: ab byid: pyam lho: nyangnu" gi nang ri nyangnu" da" tarha" joem ri ci: wigi dang: phyed loo goo" wa.

²⁵Ngoo gi nang ri nheig yo: da" gang mo ngoo gi nyangnu" da" nheig yo: zi khyo" wigi nang ri yhen nhang: wa. Nyangnu" gi nanu" da" nhoo: yo' nukhyab joem ri yham" pyam byid: wigi re" zoo: yiri said pyam boem wa. Nghoid- nyangnu" gi re" yuggi zoo: yi yo' myiyi: zoo: yiri nang mo lhoid yu pyam lho: nyangnu" ri adei nyang: nghe' pyam boem wa.

²⁶Nyangnu" gi re" byimi joem ri lang: ceig pyam lho: re" phoug" dab lug joem ri yu pyam byid: wa.

²⁷Ngoo gi re" da" mhain: khyoo: yo' nang Egutu moo nyid shi" uri shoid lid: lo da" aco' ajhoid moo" joem ri toem' pyam byid: wa. Nang gi yu soolhoo: joem ri ayu" loo wa. Egutu da" khyoo: ri we' amyid loo wa».

²⁸He: zigi yoem: moo" bo ASEING tid zi nghoid. Ngoo gi nang ri nang ngheing" lho: co' da" byumyu" yi lo, khyoo: ab byid: pyam wa.

²⁹Houg: lho: nyangnu" gi nang ri ngheing" boem yoomo nyangnu" gi nang moo" zei: wigi yo" to" da" ja: dangain" ri yu pyam byid: lho: nang ri gung cen: khyoid shang: pyam wigi shava myhi' yhang: ti" ci: shug too" wa. Re" da" mhain: myid yo' shava myhi' moo" zoo" gi

³⁰nang ri hougsu" bui" nhang: wa. Nang gi byumyu" yi da" shava myhi' bue" lid: lo wigi nyangnu" da" yu soolhoo: joem yo' nanya: gung nanyang: ayung" alho' bui" nhang: loo wa.

³¹Nang gi re" be da" khyid: byi moo cang yoomo ngoo gi nang ri daja: za: da" yooboo dam koem: ri shug nhang: wa.

³²Yoem: moo" bo ASEING tid «Nang gi re" be da koem: mo shug loo wa. Hau: zigi gyi: wigi no, da:. Yugkhang" moo" gi nang ri juang" wigi coem' nyhab' loo wa. Koem: gi byeung" jo, abye:.

³³Re" bi Samari shug da" koem: nghoid da" Gyug ci' ziyo' byo, yoin" da" koem: gi Nang ri nheigloem: amyen akhyoid bui" nhang: lho: yed nhang: loo wa.

³⁴Nang gi hau: ziri shug wigi kyug sho' zhain: hei' pyam loo wa. Houg: lho: hau: zi baid khyoeb da" ajab amhoin' joem gi re" noug" ri lang: khyam" pyam wa. Ngoo yoem: moo" bo ASEING tid too" bye:.

³⁵Akhid" he: zigi yoem: moo" bo ASEING tid nyid zi nghoid. «Nang gi ngoo ri to" myhid pyam lho: ngoo ri nungthang phug pyam boem yoomo nang gi re" mhain: myid yo' shava myhi' moo" zoo" gang mo yau: khe" kyi" khyeug zi shoug" wa.

³⁶ASEING gi ngoo ri tid zigi «Shid: se' da" byu we"- nang gi Ohola yo' Oholiba tang: ri dang: phyed wa jen" bye: rhe". Nya: eig tang: ri nya: eig tang: koid lid: lo da" akhyeing" moo" zoo" wigi yooboo zhug we'.

³⁷Nya: tang: gi myi: shoid lang shoid moo" yo' byu said moo" shoid boem ago". Yu phara" soolhoo: joem yo' myi: shoid lang shoid wigi nya: tang: ngoo ri khu: byid: da" zooshang: yiri said da:. Nyang: tang: gi nga" zooshang: yiri nyangnu" da" yu phara" soolhoo: joem jhang xoin" ngei" pyam da:.

³⁸Houg: lho: hau: zigi nya: eig tang: koid zi dangain" anghoid shi". Nya: tang: gi nga" Noku Yhoem: Moo" ri aphoug" myang:. Ngoo to" to" da" Dougno: Bidnyid ri phyo' pyam da:.

³⁹Yu phara" soolhoo: joem shid re" xoin" khyo" zooshang: yiri nya: tang: said ngei" byid: da" bidnyid gyoo: moo nyang: tang: gi nga" Noku Yhoem: Moo" khyoo: re" wigi hau: ziri ce: phoug" atab' koid pyam da:.

⁴⁰«Nya: tang: gi moug: vi: mo yuggi yiri khe: yu wa shid re" lagyoo: alheing: lheing: nhang: kaid lho: hau: yuggi yi ju" re" boem ago". Nya: eig tang: gi gung cid" pyam- myo, mei: xau" pyam- phoug" dab lug joem ri void ci: ago".

⁴¹Nya: eig tang: gi yung" da" yhoeb cuang tho' moo zhung: jo, wigi nya: eig tang: shidkhoin" moo ngo wigi nya: tang: ri byid: to" da" zhainloin: xu: yo' shoem: nam pyo: ja: xu: bo bo wigi ge da" zi joem byeung" shoin: loo" sho' lhung boem to" da:.

⁴²Nau khyo" nyho: yen" da" byu daphung: da" thui: ri shau" gyo:. Nyangnu" gi dain" pyoid yoomo ju" lo da" yuggi yi nghoid. Nyangnu" gi myiyi: myhi' yi da" lo, moo lo, theing" foid byid: wigi nyangnu" vhuloem moo yung" da" bidmug zhung" byid: da:.

⁴³Houg: lho: ngoo gi ngoonya: gung ri nyangnu" gi lang shoid wigi yoem: neing: byug bye: da" myiyi: dayug ri shava myhi' khyo" ci: nyid boem ago" ein: tid zoo: bye:.

⁴⁴Nyangnu" gi he: shava myhi' tang: jhang doem yhi: yhi: koid ago". Nyangnu" gi hau: akyang yoin" da" myiyi: Ohola yo' Oholiba jhang doem tau" yhe: nyid ago".

⁴⁵Tarha" deingmain" da" yuggi yigi nya: eig tang: ri lang do, moo" yo' byu said moo" khyo" dang: phyed wa. Ciwim gari nya: eig tang: gi lang do, moo" koid lho: nya: eig tang: da" lo, joem moo suid" dab da:.

⁴⁶He: zigi yoem: moo" bo ASEING tid zi nghoid. «Nya: eig tang: ri kyug nhain' wa yo' lhoid zoo: wa shid re" byu daphung: ri shu" loo we'.

⁴⁷Byu phung: yiri nya: eig tang: ri lug boem yo' du" nhang: we'. Houg: lho: nya: eig tang: ri shamcoin" joem yo' khaid zain: nhang: ge'. Nya: tang: da" zooshang: yiri said pyam nhang: we'. Nya: tang: da" yhoem: ri nghe' khyo' pyam nhang: we'.

⁴⁸Myiyi: yi yugkhang" moo" gi nyangnu" lhung koid lid: lo boem da" lang do, moo" ri adoem koid loo wa shid re" tid poin" da" khyo" ngoo gi dameing: goin" mo akhyeing" moo" ri toem' pyam wa.

⁴⁹Houg: lho: re" tang: we' re" eig tang: da" akhyeing" moo" yo' yu phara" soolhoo: ri no' nyid da" yooboo gang mo ngoo re" eig tang: ri yooboo dam byid: wa. Houg: lang" ngoo yoem: moo" bo ASEING nghoid ziri re" eig tang: se' loo wa.