Read Lashi EZEKIEL 25 Bible Online

EZEKIEL 25 - Lashi bible

EZEKIEL 25

¹ASEING gi ngoo ri dang: tid da:.

²Nyang: tid zigi «Shid: se' da" byu we"- Amon mung" ri ngeug he: pyam we'.

³Ngoo yoem: moo" bo ASEING tid nyid ziri tam" gyoo: wa shid re" nyangnu" ri tid kyoo" we'. «Nanu" gi nga" Noku Yhoem: Moo" ri aco' ajhoid koid pyam ziri Israela mung" ri lhu: phyo' sain" pyam ziri Yuda byumyu" yiri pyoung" she: loo" shoug" ziri yu" ngei ago".

⁴Nanu" gau boem gang mo ngoo gi bidthu shoid dain" pyoid yoo moo byumyu" yi wigi nanu" ri meing: zain: oung: pyam nhang: wa. Nyangnu" gi nanu" da" mung" moo nyangnu" da" dab joem lo koid wigi nyid lo boem goo" wa. Nyangnu" gi nanu" seing: eung: da" shi" joem ri zo: wigi nunoug" ri shug pyam byid: loo goo" wa.

⁵Ngoo gi Raba voomoo" ri Gola-ug zoem: jang: koid wigi Amon damung" goin" ri yang zoem: jang: koid pyam wa. Houg: lang" nanu" gi ngoo ASEING nghoid ziri se' loo wa.

⁶«He: zigi yoem: moo" bo ASEING tid nyid zi nghoid. Nanu" gi lo, pyug pyug lho: gau yi tung" byam da:. Nanu" gi Israela mung" ri yu" nge da:.

⁷Nanu" koid bye: moo" yoomo nanu" ri lhoid zo: lho: phyo' yu pyam wa da" byumyu" yi lo, khyoo: ab pyam wa. Ngoo gi nanu" ri bain sho' phyo' shoin' pyam wa. Houg: lang" nanu" gi byu damyu" ayo" bui" loo: wa. Nanu" nya: mungdain: ga: zi we' ajo, loo wa. Hau: thang: nanu" gi ngoo ASEING nghoid ziri se' loo goo" wa.

⁸Yoem: moo" bo ASEING tid zigi «Yuda gi gootu: byumyu" yi dangain" yo' dakhyoo" ti" za: danghoid ga: Moba tid gang mo

⁹Moba mougkyoo" ri goem loem da" voomoo" joem ri khaid zain: zi shoug" nhang: wa. Houg: moo reung: thang da" voomoo" joem nghoid da" Bed Yeshimod- Bala Meon yo' Kiriathaim bang: bo da:.

¹⁰Ngoo gi bidthu shoid dain" pyoid yoomo byumyu" joem wigi Moba ri Amon yo' dage" khaid zain: ung: pyam nhang: wa. Houg: lang" Moba gi byu damyu" abui" loo: wa.

¹¹Ngoo gi Moba ri yooboo dam byid: wa. Houg: lang" ngoo ASEING nghoid ziri nyangnu" se' loo wa.

¹²Yoem: moo" bo ASEING tid zigi «Edom byumyu" yigi Yuda ri anoug akhyoid latoo: phug ago". Houg: lho: hau: latoo: phug zigi Edom moo khanham we' dajo, jo, da" yooboo moo" bue" jo, nhang: da:.

¹³Akhid" ngoo Edom ri yooboo dam byid: lho: houg: mo byu yugkhang" moo" yo' gougnyhoug du: khang" moo" ri said pyam wa ein: tid fu" kaid we'. Ngoo gi hau: zigi Teman voomoo" mo Dedan voomoo" ju" sho' jham" coug: youg koid pyam wa. Houg: lho: voo byu yigi gyi khaid pui" moo said pyam zi shoug" wa.

¹⁴Nga" byumyu" Israela yigi nga" shid re" Edom ri latoo: phug loo wa. Nyangnu" gi Edom ri nga" nheig yo: khyoo: ri loem zoo: nhang: loo: wa. Edom gi nga" latoo: phug da" khyoo: ri kham zo: wigi hau: dang: kang: ri se' gyo: loo goo" wa. Yoem: moo" bo ASEING tid.

¹⁵Yoem: moo" bo ASEING tid zigi «Philisti byu yigi nyangnu" da" apyaid atoo: gyivoo xoug" yiri anoug akhyoid latoo: phug wigi nyangnu" ri ngheing" ziyo' phyo' shoin' pyam ago".

¹⁶Ngoo gi Philisti ri khaid zain: wigi nyangnu" ri jhoid shoem" pyam wa ein: ngoo tid fu" bye:. Ngoo gi hau: Philisti janggyoin: moo nyid da" yugkhang" moo" ri said toem" pyam wa.

¹⁷Ngoo gi nyangnu" ri dam xoo: sho' yooboo dam byid: wigi nyangnu" ri bain sho' latoo: phug wa. Nyangnu" gi nga" nheig yo: khyoo: ri kham zo: loo goo" wa. Houg: lang" ngoo ASEING nghoid ziri nyangnu" se' loo goo" wa.