Read Lashi EZEKIEL 27 Bible Online

EZEKIEL 27 - Lashi bible

EZEKIEL 27

¹ASEING ngoo ri tid zigi

²«Shid: se' da" byu we"- Turu shid re" mang yang" jikhoin" daloem: khoin" we'.

³Hau: voomoo" gi panglai: gyid yam moo jo, wigi panglai: gyid yam khyi' khang" moo" mo bang yo' moo" zoo" jid: zoo" xo' go" wigi koid nyid da" voomoo" nghoid. Yoem: moo" bo ASEING citid nyid ziri nyang: ri tid kyoo" we'. «Turu we' nang gi re" joeb joeb byeung" byeung" yung" khyoo: ri phau: da:.

⁴Re" yhoem: gi panglai: nghoid da:. Nang ri zhug too" bang: gi nang ri gyid sangphoo daloem: yhang: ti" zhug to" ago".

⁵Nyangnu" gi Hermon boem mo shithang: gam joem ri seig thi" sheig da:. Lebanon boem mo shamu gam ri re" lid kham: pain" ruang: tab zeing koid ago".

⁶Nyangnu" gi lhid ku" nyhabcam" koid wa shid re" Bashan mo Shookhi" gam joem ri yu ago". Nyangnu" gi Kupru mo shithang: ri re" akhoem' koid boem ago" Houg: lho: hau: jang" moo xang: zei yo' agyoo: moo kaid to" da:.

⁷Re" lhid pain" ruang: joem gi zin: yung" pain" wigi koid to" zi nghoid. Hau: da" za: yo' thau" yung" to" da" zin: yung" pain" gi Egutu mo nghoid. Hau: ziri vi: mo lei lei yo" se' yu" xoem" yu da:. Re" da" bangzoo: khoem" atho' mo mau: nghoeb to" da" pain" gi Kupru gugyoo: kang mo khalham" boo" avid pain" nghoid da:.

⁸Re" da" lhid ku" bang: gi Sidon yo' Arvad mo bang: nghoid ago". Lhid ku" bang: gi jhang: da" re" byu yi nghoid da:.

⁹Gyid sangphoo mo lo, moo" zei: bang: gi Biblo mo goolhoo' za: jhau" yu ci: bang: nghoid da:. Panglai: khyoo: so" yen" da gyid sangphoo khang" moo" mo lhid ku" bang: gi Re" kid" sen: joem moo oung” zoo: oung” shug moo" koid ago".

¹⁰«Persi- Ludia yo' Libya mo gyizoo: yigi re" gyidab moo moo" zei: ago". Nyangnu" gi nyangnu" da" goo joem yo' joto' mug joem ri re" gyidab zoem" joem moo lhang" to" ago". Nyangnu" gi re" shid re" phung" yoeb ri oung: yu byid: bang: nghoid ago".

¹¹Aravad mo gyizoo: yigi re" da" vang khyam: joem ri zung" byid: lho: Gamad mo gyizoo: yigi re" da" pyuzung ri zung" byid: ago". Nyangnu" gi nyangnu" da" goo joem ri re" da" vang khyam: joem moo lhang" to" ago". Nyangnu" gi nang ri yung" sho' koid byid: bang: nghoid ago".

¹²Nang gi Spain: mung" moo phaga: ga: wigi ngei- joto'- to' yo' xuid: joem gi re" da" agoin agoo" jonu" joem da" aphoug" nghoid da:.

¹³Nang gi Greek- Tubala- yo' Mesheg moo phaga ga: wigi re" jonu" joem wigi join joem yo' gyid: mid" jonu" joem ri thid yu da:.

¹⁴Nang gi Bed Togarma mo rheing" shi: myang:- gyi khaid myang: yo' loo zei: joem ri qei yu wa shid re" re" jonu" joem ri yhe: oung” da:.

¹⁵Dedan mo byu yigi nang yo' phaga: ga: ago". Panglai: thoem" yam cang nyid boem da" byumyu" yigi re" kid" zi shid re" nang ri xang: zei yo' seig no, ri byid: ago".

¹⁶Suri mo byu yigi re" kid" zi joem yo' nang koid thu da" jonu" joem myoo" sho' ri qei yu ago". Nyangnu" gi re" kid" zi shid re" phoug" dab lug khalham" boo" byimi- za: thau" yung" to" da" pain"- zin: yung" pain" gi panglai: lafuid: yo' patemya" joem byid: ago".

¹⁷Yuda yo' Israela bang: gi re" kid zi shid re" sungsoo:- byoo: yhid:- zhainloin: xu:- yo' shoem: nam pyo: ja: byid: da:.

¹⁸Damasku mo byumyu" yigi re" kid" zi yo' nang koid thu da" zi joem shid re" Helbon mo zabyid yhid: yo' Sahara mo soug" goug" aphoug" byid: wigi qei yu da:. Nyangnu" gi joto' joem yo' shoem: nam pyo: ja: ri re" kid" zi joem yo' thid qei boem ago".

²⁰Dedan mo byumyu" yigi re" kid" zi joem ri myang: too: pain" cu' byid: wigi qei yu ago".

²¹Arabia byu yi yo' Kedara moug: mo vhoebkhang" zoug: yigi re" kid" zi joem ri yang nu" joem yang joem coidbaid joem yo' thid go" da:.

²²Re" kid" zi qei wa shid re" Sheba yo' Rama mo phaga: byu yigi phoug" dab da" lug zi joem sheing: joem yo' ge thang da" shoem: nam pyo: ja: joem ri byid: da:.

²³Haran- Kanne yo' Eden voomoo" joem Sheba mo phaga: byu yi Ashura voomoo" yo' Khilmad voomoo" joem gi nang yo' phaga: ga: ago".

²⁴Nyangnu" gi nang ri phoug" dab da" byimi joem khalham" boo" void pain" joem za: toug" yung" to" pain" joem avid gye" bang yung" da" phyang" myu" joem goolhoo' koid to" da" khyeing: thei" joem yo' tei" joem ri oung” byid: ago".

²⁵Re" da" kid" zi joem ri gyi: thang da" zi thoo' sangphoo joem mo tho' de" ago". «Nang gi panglai: mo lid: da" zi thoo' sangphoo yo' du da:.

²⁶Re" lhid ku" bang: gi nang ri panglai: khyoo: shu" thu yhe: lo" da" uri Bid thu shoid mo lid gi nang ri mougmyid yo' ve: jang" moo phyo' shoin' pyam da:.

²⁷Re" da" kid" zi joem dangain" re" da" sangphoo ku" bang: dangain" Re" sangphoo mo lo, moo" zei: bang: yo' re" phaga: byu yi Sangphoo khoug: mo gyizoo: yi yugkhang" moo"- Dangain"- dangain" bang: gi Re" sangphoo byo, yoin" lo" uri panglai: moo byug lo" byug ago".

²⁸Gyid moo noeb shid: lo" nyid da" sangphoo ku" bang: da" nyhoo: thui: gi Panglai: gyid yam moo lang: thang: tei" da:.

²⁹‹Sangphoo khang" moo" gi akhid" jham" coug: youg bue" jo, bye:. Lhid ku" bang: yugkhang" moo" gi panglai: gyid yam khyoo: lo" byug bye:.

³⁰Nyangnu" dangain" bang: gi re" shid re" nheig khoo" sho' koug boem ago" Nyangnu" vhuloem joem cang pheilhoug: geig gyoin: lho: myiyab moo lu: leung yen" da:.

³¹Nyangnu" gi re" shid re" nyangnu" vhuloem vhudung: dung: pyam da:. Houg: lho: nyangnu" nya: gung moo jid: moo" byimi void ci: ago". Nyangnu" ngau zigi nyangnu" da" nheigloem: khoo" sho' nghoid ago".

³²Nyangnu" gi re" shid re" mang yang" jikhoin" khoin" ago". ‹Turu yo' hang" ri yo" tu' yu" wa la" Akhid" panglai: moo sam: zoo: tam" jo, da" Turu yo' hang" ri yo" tu' yu" wa la"

³³Re" kid" zi joem panglai: kyo: da" jang" khyoo: yhe: lo" da" uri Nang gi byumyu" khang" moo" moo ca" nyid ziri pyeing byid: da:. Khokham yi we' re" jonu" ziyoo yoomo yoo" zoo: yoo" shug nyid da:.

³⁴Akhid" nang gi panglai: moo byo, yoin" byug bye: Nang gi Nammugdara thoem" thi" khyoo: noeb vang loo" bye:. Re" ziyoo jonu" joem yo' re" jhang moo" zei: bang: dangain" gi Panglai: khoug: moo nang yo' dage" byug lo" boem abye:.

³⁵«Panglai: gyid yam cang nyid boem da" yugkhang" moo" gi re" vhu" pi: lo, kyo' ri myang boem wigi dain mo, byug bye:. Nyangnu" da" khokham yi lang" gyoug dain boem ago". Houg: lho: nyangnu" da" myonhoo: joem moo gyoug zi di: di: myang da:.

³⁶Nang gi lo" byug abye:- apyaid atoo: moo lo" byug abye:. Houg: lho: mougmyid gyab goin" mo phaga: byu yigi re" vhu" pi: lo, kyo' ri nyangnu" bo loem kham zoo: wa ziri gyoug dain boem ago".