Read Lashi EZEKIEL 28 Bible Online

EZEKIEL 28 - Lashi bible

EZEKIEL 28

¹ASEING gi ngoo ri dang: tid da:.

²Nyang: tid zigi «Shid: se' da" byu we"- Ngoo yoem: moo" bo ASEING wigi Turu mo vhoebkhang" su: ri tid nyid ziri nyang: ri tid kyoo" we'. Nang gi yu phara" nghoid ga: tid fu" wigi nghoid boin: khyoo: gi myung: dau byug bye:. Nang gi panglai: joem lheing khoem to" da" khokham zhungtang moo yu phara" daloem: ti" zhung: jo, ga: tid da:. Nang gi yu phara" daloem: yhang: ti" nghoid goin koid loug we' anghoid wa. Nang gi shid: se' da" byu danghoid. Agyeungshang: nghoid da:.

³Nang gi Danela tho' phajhi" je bo wigi ce: daja: we' nang moo ayo" nghoeb shoung: too" ga: myid da:.

⁴Re" da" phajhi" yo' lasi phajhi" gi nang ri sheing: yo' ngei phoug" dab zi jonu" yoo" nhang: da:.

⁵Nang gi phajhi" bo da" phaga: moo" koid lho: atu" amyaid xo' sho: nyid da:. Nang gi re" jonu" ziyoo atho' moo khayhi' nghoid boin: nyid la".

⁶Akhid" he: zigi ngoo yoem: moo" bo ASEING tid nyid zi nghoid. Nang gi yu phara" yo' dayhang: ti" phajhi" bo ga: myid yu da" gang mo

⁷Ngoo gi nang ri khaid zain: wa shid re" akhyeing" da" gyivoo yiri shu" loo wa. Nyangnu" gi re" da" phajhi" yo' lasi phajhi" wigi nang yo" sho: yu to" da" yung" da" zi joem dangain" ri phyo' shoin' pyam byid: loo wa.

⁸Nyangnu" gi nang ri said pyam wigi gyid loeb khoug: khyoo: du" zei kaid pyam wa.

⁹Nyangnu" nang ri said pyam wa ga: re" boem da" uri nang gi yu phara" daloem: nghoid ein: datid nyid shi" wa la". Nang ri said wa bang: yo' shoug" go" uri nang gi shid: se' da" byu nghoid wigi ce: agyeungshang: zi danghoid wa.

¹⁰Nang gi Mangsoo abo da" tungbau byu yi lo, moo lakhuid" dadu: yhang: ti" shid: loo" wa. Ngoo yoem: moo" bo ASEING amyeing" byid: too" bye:.

¹¹ASEING ngoo ri dang: dalheing: doem tid da:.

¹²Nyang: gi «Shid: se' da" byu we"- Turu khokham ri lang" nyid da" vhu" pi: lo, kyo' shid re" koug we'. Ngoo yoem: moo" bo ASEING tid nyid ziri nyang: ri tid kyoo" we'. Nang gi goonham' dalheing: joeb byeung" da" khooshid: bui" lid: loo bye:. Nang gi khayhi' phajhi" bo lho: khayhi' yung" su: nghoid la".

¹³Nang gi Mangso da" khyam: Eden moo nyid lho: phoug" dab lug zi aja: ja: ri void ci: da:. Hau: joem gi patemya"- sen- utaphaya- myed yue"- jhaung:- nagathue'- nila- mya- lug ni joem nghoid da:. Nang gi shoung: yhoung ci: wa shid re" sheing: zi joem yo" da:. Hau: joem ri re" shid re" nang ri phain" so: kaid uri nyang: koid too" byid: gu nghoid bye:.

¹⁴Ngoo gi nang ri lhoug zung" wa shid re" yu" gyoug yu" lhung: sho' da" moug: lagyoo: dayug ri nyhid: too" byid: bye:. Nang gi nga" gyeung" shang: da" boem joem moo nyid wigi yi: yi: wim da" phoug" dab lug joem atho' moo so" yen" khoo' bye:.

¹⁵Nang gi nang ri phain" so: kaid to" da" bidnyid mo akyeing" moo" ri koid shid" da" bidnyid ju" sho' re" lo, moo" joem gi joeb byeung" lid: loo bye:.

¹⁶Nang gi qei qei oung” oung" moo" myo: nyid wigi hau: ze wigi nang ri athoug" akhoug: khyoo: yo' yooboo khyoo: shu" yhe: lo" da:. Hougsu" yoomo ngoo gi nang ri nga" gyeung" shang: da" boem mo agyoo: atho' khaid thu kaid lho: nang ri lhoug zung" lid: lo da" moug: lagyoo: gi nang ri yi: yi: wim da" phoug" dab lug joem jo, jang" mo vi: khyoo: khaid pyam abye:.

¹⁷Nang gi yung" yoomo nghoid boin: bye:. Re" myeing fu" zigi nang ri koodoug: dayug yhang: ti" bui" nhang: bye:. He: gang mo ngoo gi nang ri myidgung khyoo: she: pyam wigi gootu: khokham yi shid re" tid poin" asoo" khyo" nang ri to" too" wa.

¹⁸Nang gi hougsu" qei qei oung” oung” koid jang" moo akhyeing" zi koid yoomo re" noku coung" joyoo gi byo, yoin" byug bye:. Hougsu" yoomo ngoo gi hau: voomoo" ri myi: nghe' kaid wigi hau: ziri myidgung khyoo: nghe' khyo' pyam bye:. Nang ri yu" nyid bang: dangain" gi akhid" nang myimoeb bue" ziri shau" myang ago".

¹⁹Nang gi bei: byug bye:. Apyaid atoo: moo bei: byug bye:. Nang gyoug dain shoug" nyid ziri se' lo da" byumyu" yi dangain" gi re" vhu" pi: lo, kyo' ri nyangnu" bo shoug" loem zoo wa ziri gyoug nyid boem ago"» ga: tid.

²⁰ASEING ngoo ri dang: tid zigi

²¹«Shid: se' da" byu we". Sidon voomoo" ri ngeug he: pyam we'.

²²Nyangnu" da" khyoo: ri ngoo yoem: moo" bo ASEING tid ziri houg: moo nyid da" byumyu" yiri tid kyoo" we'. Sidon we"- ngoo gi re" gyivoo nghoid. Nang ri ngoo koid da" moo" zoo" gang mo byumyu" yigi ngoo ri coung" byid: loo wa. Nang moo nyid da" bang: ri ngoo yooboo dam byid: da" khyo" wigi ngoo khayhi' gyeung" shang: da" khyoo: ri ci: shug da" uri ngoo ASEING nghoid ziri nyangnu" se' loo goo" wa.

²³Ngoo gi re" adang moo noo phyoo" ri nhang: kaid wa wigi re" khyoo: khaid khang" moo suid" youg nhang: wa. Nang gi shoid khang" moo' khyo" khaid zain: zi shau" wigi re" byu yiri said pyam zi shoug" wa. Hau: thang: nang gi ngoo ASEING nghoid ziri se' loo wa.

²⁴ASEING tid zigi «Israela byumyu" yiri yu" juang" nyid da" aqei: ayam mo byumyu" kha: ja: we' Israela ri dam tab da" zu: kyin: yoo zugam joem yhang: ti" khanham we' adoem bui" loo goo" wa. Houg: lho: nyangnu" gi ngoo yoem: moo" bo ASEING nghoid ziri se' loo goo" wa» ga: tid.

²⁵Yoem: moo" bo ASEING tid zigi «Ngoo gi Israela byumyu" yiri byumyu" yi phung: gung khyoo: khaid sain" to" jang" mo nyangnu" ri doem zheing" yu wa. Houg: lho: byumyu" yi dangain" gi ngoo gyeung" shang: ziri se' loo goo" wa. Israela byumyu" yigi nyangnu" nya: mougmyid nghoid da" nga" dei zoo: Yaku ri ngoo byid: to" da" mougmyid moo nyid lo boem goo" wa.

²⁶Nyangnu" gi hau: joyoo moo goem loem tung" shoug" nyid goo" wa. Nyangnu" gi yhoem: joem koid lho: zabyid khyam: joem yo" koid zo: nyid boem goo" wa. Ngoo gi nyangnu" ri coem' juang" da" nyangnu" yhoem: kyoo" cang" mungdain: dangain" ziri yooboo dam byid: wa. Houg: lho: Israela gi goem loem nyid loo wa. Hau: thang: nyangnu" gi ngoo nyangnu" Mangsoo ASEING nghoid ziri se' loo goo" wa.