Read Lashi EZEKIEL 29 Bible Online

EZEKIEL 29 - Lashi bible

EZEKIEL 29

¹Ngoonu" ri pyoung" she: nyhid: to" zi daxi: zain ein: zain- lhammoo" daxi: khyab daxe: eig nyid" nyid" ri ASEING gi ngoo ri dang: tid da:.

²Nyang: tid zigi «Shid: se' da" byu we"- Egutu khokham ri ngeug he: pyam we'. Nyang: ri nyang: yo' Egutu damung" goin" zi khasu" yooboo dam shoug" kham zoo: wa khyoo: tid kyoo" we'.

³He: zigi yoem: moo" bo ASEING gi Egutu khokham ri tid nyid ziri tid kyoo" we'. Gyid gyung: moo jhang" jo, da" mainjung: khang" se" we"- ngoo gi re" gyivoo nghoid. Nila gyid gyung: gi re" zi nghoid. Hau: ziri nang koid to" ga: nang tid da:.

⁴Ngoo gi re" amcam" moo myhid nghui" tab too" byid: lho: re" gyid gyung: moo wimdo, joem we' nang moo kyen' dab jo, nhang: wa. Hau: thang: ngoo gi nang ri nang moo kyen' dab jo, da" wimdo, dangain" yo' Nila gyid gyung: mo she: thu yu wa.

⁵Ngoo gi nang yo' wimdo, dangain" ri dain" phyoid yoo khyoo: she: pyam kaid wa. Re" gung gi myidgung khyoo: gyoo" lo" wigi hougsu" du" pyam too" khoo' wa. Ngoo gi hau: ziri ngho' joem yo' gougnyhoug joem shid re" zoo: noem khyo" byid: pyam wa.

⁶Houg: lang" Egutu byu yi dangain" gi ngoo ASEING nghoid ziri se' loo goo" wa. ASEING tid zigi «Israela byumyu" yigi pang" thoug yu wa nanu" Egutu byu yiri khau: nghe: nyid nghoid loug we' nanu" gi nham da" voosi" tho' je agi nghoid da:.

⁷Nyangnu" nang ri nghe: kaid lang" nang gyau: gyoo" lo" wigi nyangnu" da" lo, cab khyung" ri thau" kyang pyam da:. Houg: lho: nyangnu" da" nung" khung: lheig byug da:.

⁸Houg: lho: akhid" ngoo yoem: moo" bo ASEING gi shamcoin" ci: da" gyizoo: daphung: nang ri khaid zain: wa. Nyangnu" gi re" byu yi yo' gougnyhoug joem ri said pyam wa ein: tid nyid bye:.

⁹Egutu gi jham" coug: youg da" joyoo bue" loo wa. Houg: lang" ngoo ASEING nghoid ziri nang se' loo wa. Nila gyid gyung: gi re" re" nghoid wigi hau: zi nang koid to" zi nghoid ga: nang tid da gang mo

¹⁰Ngoo gi re" gyivoo yo' re" Nila gyid gyung: da" gyivoo nghoid. Ngoo gi mougzhung: shoid Migdola voomoo" mo zi mougpyi: shoid Asvan voomoo" ju" sho' Etiopi mougkyoo" cang wigi Egutu damung" goin" ri jham" coug: youg joyoo koid pyam wa.

¹¹Byu xangsu: dayug we' gougnyhoug dadu: we' houg: khyo" so" lid: loo" wa anghoid. Myid: xi: zain goin" houg: moo ci anyid wa.

¹²Ngoo gi Egutu ri mougmyid tho' moo jham" coug: youg bue" thang da" joyoo koid pyam wa. Myid: xi: zain goin" Egutu voomoo" joem gi byo, yoin" jo, wa. Hau: byo, yoin" khyoo: gi voomoo" goovoo byo, yoin" tho' je xoo: wa. Ngoo gi Egutu byumyu" yiri phang: khoug: yen" bang: bui" nhang: pyam wa. Nyangnu" gi mungdain: khang" moo" khyoo: phang: byo lo" wigi gootu: byumyu" yi akhoug: moo nyid nyid ca" wa.

¹³Yoem: moo" bo ASEING tid zigi «Myid: xi: zain lid: thang: ri ngoo gi Egutu byumyu" yiri khaid sain" to" da" byumyu" yi da" phung: mo doem shu" yu wigi

¹⁴Nyangnu" ri nyangnu" da" moug: xoug" nghoid da" Egutu mung" mougpyi: shoid moo nyid nhang: wa. Hau: zigi yoem: neing: da" khokham mungdain: bue" loo wa.

¹⁵Khokham mungdain: dangain" jang" moo yoem: neing: thang da" mungdain: bue" lo wigi nyangnu" gi gootu: byumyu" mungdain: joem ri khanham we' ayo" vhoebkhang" loo goo" wa. Ngoo gi nyangnu" ri ce: yhouggyen: anghoid da" byumyu" koid pyam lho: nyangnu" gi gootu: byumyu" yiri nyang: myid vho: da" khyo" ayo" nghue" she: yu wa.

¹⁶Israela byumyu" yigi pang" thoug yu wa shid re" nyangnu" ri khanham we' adoem khoug: nghe: loo wa. Egutu da" vhu" pi: lo, kyo' gi nyangnu" ri khoug: nghe: zi khayhi' shoid ga: khyoo: Israela ri tid poin" da" khyo" bui loo wa. Houg: lang" Israela gi ngoo yoem: moo" bo ASEING nghoid ziri se' loo goo" wa.

¹⁷Ngoonu" ri pyoung" she: nyhid: to" zi eigxe: nyhed zain ein: zain- xang: shi" lhammoo" khyab- xang: shi" nyid" moo ASEING ngoo ri dang: tid da:.

¹⁸Nyang: tid zigi «Shid: se' da" byu we"- Babelon khokham Nebukhadneza gi Turu ri khaid zain: shid" abye:. Nyang: gi nya: gyizoo: yiri nyangnu" da" vhuloem gyoid sho' yo' koo" tho' joid sho' yoovoin lid: voin nhang: nghoid loug we' khokham phoo nyang: we' nya: gyidab we' nyangnu" yau: khi" shoug" jang" mo ci: ashau" yu goo" nghoid da:.

¹⁹Houg: yoomo akhid" he: zigi ngoo yoem: moo" bo ASEING tid nyid zi nghoid. Ngoo gi khokham Nebukhadneza ri Egutu mung" byid: pyam wa. Nyang: gi Egutu mo jonu" dangain" ri lanyhoeb khyo" lhoid yu lo" lho: nya: da" gyidab ri moo" voin aphoug" khyo" byid: pyam wa.

²⁰Ngoo gi nyang: ri nya: da" vhoo" kung: phoug" khyo" Egutu mung" ri byid: pyam wa. Ciwim ga: ri nya: gyidab gi nga" shid re" moo" koid byid: nyid da:. Ngoo yoem: moo" bo ASEING tid bye:.

²¹Hau: zi bue" lo da" uri ngoo gi Israela byumyu" yiri yoem: boo nhang: lho: ngoo ASEING nghoid ziri nyangnu" si' wa joyoo moo nang Ezekela ri tid thu kaid nhang: wa.