Read Lashi EZEKIEL 31 Bible Online

EZEKIEL 31 - Lashi bible

EZEKIEL 31

¹Ngoonu" ri pyoung" shu" nyhid: too" shoug" zi daxe: dazain ein: zain lhammoo" soem" khyab ein: khyab lhoo' xain" nyid" ri ASEING gi ngoo ri dang: tid da:.

²Nyang: tid zigi «Shid: se' da" byu we" Egutu khokham yo' nya: byu dangain" ri tid we'. Nang khayhi' yoem: so' bo la" Nang ri ngoo ci yo' yo" tu: wa la"

³Nang gi Lebanon mo shamu gam yo' du da:. Hau: seiggam gi yung" da:. Seig kung: joem bid shoem: yoeb bue" da:. Hau: zigi jhoemmoug" moo ju" myhi: sho' gye" myhang: da:.

⁴Hau: zi yug gyi loo wa shid re" gyid jo, da:. Houg: lho: hau: ziri zooshug: byid: wa shid re" myid khoug: moo gyid gyung: joem yau da:. Hau: joem gi seiggam yug: gyi: lo nyid da" joyoo moo gyid byid: boem. Houg: lho: seig moo" yoo mo seiggam joem dangain" khyoo: gyid zoo: gyung: joem yau loo" nhang: kaid da:.

⁵Hau: zigi gyid nyeing" za: yoo" yoomo hau: zigi gootu: seiggam joem tho' je youg myhang: lo da:. Hau: da" seiggam mo seig kung: joem gi gyi: lho: sheing: da:.

⁶Ngho' ja: khang" moo" hau: seig kung: joem moo ngho' soid soid ago". Siyoo gougnyhoug lam" joem gi hau: seiggam yoeb moo nyangnu" da" azoo nu" joem ri xang" boem. Mougmyid mo byumyu" yigi hau: seig yoeb khoug: moo theing: no: ago".

⁷Hau: seiggam gi khayhi' yung" la" Houg yhang: ti" sheing: da" seig ko' joem yo' gye" myhang: da:. Nya: da" seig gyi: joem gi myidgung khoug: mo gyid zoo: gyung: joem khyoo: cen" vang lo" boem ago".

⁸Mangso da" khyam: mo kha: shamu gam yo' we' ayo" tu' nghoid da:. Kha: da" shithang: gam we' hougsu" seig kung: adab nghoid da:. Houg: lho: bain: seiggam kha: gam we' hougsu" ako' adab nghoid da:. Mangso da" khyam: mo ce: ja: seiggam we' houg: yhi' ayung" nghoid da:.

⁹Ngoo gi hau: ziri seig kung: joem ko' byo jo, wa khyo" yu" yung" tung" koid too" bye:. Hau: zigi Mangso da" khyam: Eden akhoug: mo seiggam khang" moo" zo no" wa yhang: ti" bue" jo, bye:.

¹⁰Akhid" ngoo yoem: moo" bo ASEING gi hau: jhoemmoug" khyoo: ju" myi: sho' myhang: da" seig moo" gam moo cibue" loo wa ziri nang ri tid kyoo" wa. Hau: zigi je yug myhang: re" ri je nghoid boin: lo da:.

¹¹Houg: yoomo ngoo gi hau: ziri ngeug he: pyam wigi tungbau meing: mo zoug: dayug ri seing: yu nhang: pyam wa. Nyang: gi hau: seiggam ri nyang: nya: akhyeing" ziyo' moin: yi" ziri byid: wa.

¹²Khyi" khyoid da" tungbau byu yigi hau: ziri thug lheing: pyam lho: to" too" khoo' wa. Hau: da" seig kung: joem yo' gyau: byug da" seig ko' joem gi mungdain: khang" moo" khyoo: gyo" jo, boem wa. Hau: seiggam yoeb moo nyid lid: lo da" byumyu" yi dangain" gi phang: lo" byug goo" wa.

¹³Ngho' joem re" wigi leung jo, da" seiggam moo re" thei" zoo: wa. Houg: lho: gougnyhoug lam" joem gi hau: seig kung: joem adang moo so" yen" goo" wa.

¹⁴Houg: lho: akhid" mo gi kha: seiggam nghoid loug we' khayhi' gyid nyeing" za: yoo" nghoid loug we' hau: seiggam yhi' adoem youg gyi: loo wa. Hau: seig phyoo" we' jhoemmoug" khyoo: ju" tain" loo" sho' adoem yo" myhang: loo wa. Hau: joem dangain" gi shid: se' da" byu yi yhang: ti" shid: joem: loo" wa. Moovo moug: khyoo: gyoo" loo" bang: yo' dage" shid: joem: loo" goo" wa» ga: tid.

¹⁵He: zigi yoem: moo" bo ASEING tid zi nghoid. «Hau: seiggam moovo moug: khyoo: gyoo" lo" da" bidnyid moo ngoo gi koug shu: da" asoo" khyo" hau: ziri myidgung khoug: mo gyid yo' nhe' nghoeb pyam nhang: wa. Ngoo gi gyid gyung: joem ri toem' pyam wigi gyid zoo: gyung: joem ri we' ayau nhang: wa. Hau: seiggam shid: byug bye: yoomo ngoo gi Lebanon boem joem da" adang moo moug: coid jo, nhang: wigi seig moo" yoo mo seiggam joem dangain" ri kyug shid: loo" nhang: wa.

¹⁶Ngoo gi hau: ziri moovo moug: khyoo: khyo' kaid da" uri hau: zi leung gyoo" lo" da" thui: gi byumyu" mungdain: ri lhei' nhoin kaid wa. Mougmyid khau khyoo: gyo" vang loo" bye: da" Eden khyam: mo seiggam joem dangain" yo' Lebanon mo gyid goolhoo' yo" wigi khyen yu shoug" da" seiggam dangain" gi houg: seig moo" gam gyoeb gyoo" loo" yoomo nheugdeug nyid boem wa.

¹⁷Nyangnu" gi no' mo gyoo" lo" byug bye: bang: yo' lo" bo shoin" wa shid re" nyang: yo' dage" moovo moug: khyoo: cang gyoo" lo" byug goo" wa. Houg: lho: nya: da" seig yoeb khoug: moo nyid da" bang: dangain" gi byumyu" yi phung: gung khyoo: khaid sain" pyam zi shau" boem goo" wa.

¹⁸«Hau: seiggam gi Egutu khokham yo' nya: da" mung" byu yi dangain" bang: nghoid ago". Eden mo seiggam joem lang" houg: yhi' amung"- houg: yhi' amyhang: nghoid ago". Nghoid loug we' akhid" koem' gi Eden mo seiggam joem yhang: ti" hau: zigi moovo moug: khyoo: gyoo" lo" lho: Mangsoo asi' bang: yo' meing: zain: pui" moo shid: loo" bang: jang lo" shoin" boem goo" wa. Ngoo yoem: moo" bo ASEING tid bye:.