Read Lashi EZEKIEL 32 Bible Online

EZEKIEL 32 - Lashi bible

EZEKIEL 32

¹Ngoonu" pyoung" she: nyhid: too" shoug" zi daxe: eig zain ein: zain lhammoo" daxe: eig khyab xang: shi" nyid" ri ASEING ngoo ri dang: tid da:.

²Nyang: tid zigi «Shid: se' da" byu we"- Egutu khokham ri deing deing tid poin" nyid we'. Nyang: ri he: nga" jang" mo lu dang: ri byid: we'. Nang gi byumyu" yi phung: gung moo khangkhyi dadu: yhang: ti" nyid shug da:. Nghoid loug we' nang gi gyid lang cang lu: leung yen" da" khangse" dadu: yo' daje du da:. Nang gi re" khyid: joem wigi gyid ri thoem" boeb lhu: nhoin: lho: gyid gyung: joem ri dug dug mhei: nhang: da:.

³Byumyu" myoo" sho' zeing: foem: lo uri ngoo gi nang ri nga" da" goin yo' myheig yu lho: hau: goin ri nyangnu" ri gyid yam khyoo: lang: shi: nhang: wa.

⁴Ngoo gi nang ri tunggung moo she: thu' to" wigi mougmyid mo ngho' joem dangain" yo' gougnyhoug joem dangain" wigi nang ri coem' phyo' zoo: nhang: pyam wa.

⁵Ngoo gi boem joem yo' lang: khung" joem ri re" da" shid: boeb manggung wigi nghoeb pyam nhang: wa.

⁶Ngoo gi re" suid" ri boem joem jhu' sho' gyid zoo: gyung: moo byeung" byug sho' foid shoin" kaid wa.

⁷Ngoo nang ri phyo' shoin' pyam uri mougkhung: ri nghoeb to" lho: kyi: joem ri jhoid soid pyam wa. Bid gi jhoemmoug" thei" joem nungthang moo goug" jo, wigi lhammoo" gi bidbang ri abyid: loo: wa.

⁸Ngoo gi mougkhung: moo bidbang dangain" ri said pyam wigi re" mougmyid ri moug: coid khoug: khyoo: du" zei kaid wa. Ngoo yoem: moo" bo ASEING tid too" bye:.

⁹«Ngoo gi re" da" byo, yoin" da" khyoo: lu dang: ri nang khanham we' ashau" gyo: yu" da" mungdain: joem khyoo: fu" pyo: kaid da" uri byumyu" yi myoo" sho' gi yau: khi" shoug" loo goo" wa.

¹⁰Ngo wigi nang ri koid bye: da" moo" yoomo byumyu" myoo" sho' ri dain moug" byug nhang: wa. Ngoo gi nga" shamcoin" ri fue: kaid uri khokham joem gi gyoug dain loo goo" wa. Nang leung lo" da" bidnyid moo nyangnu" dangain" bang: gi nyangnu" da" kangso' shid re" gyoug nain" loo goo" wa.

¹¹Yoem: moo" bo ASEING Egutu khokham ri tid zigi «Nang gi Babelon khokham da" shamcoin" shoug" loem zoo: wa.

¹²Ngoo gi athoug" akhyoug: da" byumyu" yi mo gyizoo: yiri nyangnu" da" shamcoin" joem ri she: yu wigi re" byu yi dangain" ri said pyam nhang: wa. Re" byu dangain" bang: yo' nang nghoid boin: nyid da" ziyoo jonu" gootu: dangain" ri phyo' shoin' pyam wa.

¹³Ngoo gi gyid thoem" khang" moo" moo nyid da" re" gougnyhoug joem ri said pyam wa. Houg: moo gyid ri thoem" boeb lhu: nhoin: wa. Byu we' gougnyhoug we' anyid loo wa.

¹⁴Ngoo gi re" gyid lang ri deing jo, nhang: wa gyeing: jo, nhang: wa re" gyid lang joem ri myen myen yau loo" nhang: wa. Ngoo yoem moo" bo ASEING tid bye:.

¹⁵Ngoo gi: Egutu mung" ri jham" coug: youg joyoo koid pyam lho: houg: moo nyid da" byu dangain" ri phyo' shoin' pyam uri ngoo ASEING nghoid ziri nyangnu" se' loo goo" wa.

¹⁶He: jhug za: tid poin" dang: gi mang yang" jikhoin" bue" loo wa. Mungdain: mo myiyi: yigi hau: ziri Egutu yo' hougmo byumyu" yi dangain" shid re" khoin" loo goo" wa. Ngoo yoem: moo" bo ASEING tid too" bye:.

¹⁷Ngoonu" ri pyoung" shu" nyhid: to" zi daxe: eig zain ein: zain xang: shi" lhammoo" khyab daxe: wim: nyid" moo ASEING gi ngoo ri dang: tid da:.

¹⁸Nyang: gi «Shid: se' da" byu we' Egutu mo byu myoo" sho' shid re" koug ngoug we'. Nyangnu" ri yoem: so' bo da" gootu: byumyu" yi yo' dage" moovo moug: khyoo: khyo' kaid we'.

¹⁹Nyangnu" ri hid: su" ein: tid we'. «Nang gi nanya: gung ri gootu: yugkhang" moo" tho' je yung" ein: jho: rhe". Nang gi moovo moug: khyoo: gyoo" lo" wigi Houg: moo Mangsoo asi' bang: yo' dage" jhang" jo, wa.

²⁰Egutu byu yigi gyipui" moo said pyam shau" da" bang: yo' dage" leung gyoo" lo" boem wa. Shamcoin" daloem: gi nyangnu" dangain" ri said pyam wa jen" jen" nghoid jo, abye:.

²¹Bue" thang da" sarhi' yi yo' Egutu byu yi shoid khyo" gyi bo zain: bang: gi Egutu byu yiri moovo moug: khyoo: gyoo" loo" wa lhoem: tau' yu boem da:. Nyangnu" gi ‹Gyipui" moo said pyam shau" da" Mangsoo asi' bang: gi hid: khyoo: gyoo" re" lho: nyangnu" hid: moo jhang" jo, ago".

²²«Asuri gi houg: moo nya: gyizoo: yi da" loeb joem dangain" wigi vang: lheing to" da:. Nyangnu" dangain" gi gyipui" moo said pyam shoug" ago".

²³Houg: lho: nyangnu" da" loeb joem gi moovo moug: mo no, thang da" joyoo moo jo, jo, ago". Nya: da" gyizoo: yi dangain" bang: gi gyipui" moo shid: byug wigi nyangnu" da" loeb joem gi nya: loeb ri lheing khoem to" da:. Nghoid loug we' nyangnu" gi shid phyang" dalheing: dei nyid bang: moug: ri kyug tain' lid: loo bye:.

²⁴«Elam gi hau: joyoo moo nya: gyizoo: yi da" loeb joem wigi lheing khoem to" jang" moo jo, jo, da:. Nyangnu" dangain" gi gyipui" moo said pyam shau" boem wigi nyangnu" gi shooyid thang: ayham" loo: za: moovo moug: khyoo: gyo" vang lo" abye: go". Dei nyid shi" uri nyangnu" gi joyoo khang" moo" kyug tain' lid: lo ago". Nghoid loug we' akhid" nyangnu" gi shid: leung jo, wigi ngi: yoem" jo, ago".

²⁵Elam gi gyipui" moo said pyam shoug" bang: yo' dage" jhang" jo, da:. Houg: lho: nya: gyizoo: yi da" loeb joem gi nyang: ri lheing khoem to" da:. Nyangnu" dangain" gi shooyid thang: ayham" loo za: gyipui" moo dangain" ziri said pyam shau" da:. Dei nyid shi" uri joyoo khyi' khang" moo" moo kyug tain' boem ago". Nghoid loug we' akhid" nyangnu" gyipui" moo said pyam shoug" bang: da" vhu" pi: lo, kyo' ri bo gam yu khyo" dangain" shid: leung jo, wigi ngi: yoem" abye: go".

²⁶«Mesheg yo' Tubala gi nya: tang: da" gyizoo: yi loeb wigi lheing khoem to" jang" moo jo, jo, da:. Nyangnu" dangain" gi shooyid thang: ayham" loo: za: gyipui" moo said pyam zi shau" abye: go". Nghoid loug we' nyangnu" gi shid phyang" dalheing: dei nyid bang: moug: ri kyug tain lid: loo bye:.

²⁷Nyangnu" gi goonham' pyaid mo sarhi' yiri gyi jonu" joeb joeb yo' dage" nyangnu" da" shamcoin" joem ri nyangnu" da" vhuloem vhoo: moo nyangnu" da" goo joem ri nyangnu" da" gung tho' moo ke" wigi moovo moug: khyoo: myhoeb pyam yhang: ti" ngi: bo da" khyo" myhoeb zi nyangnu" ashau" kham yu nghoid da:. He: sarhi' yigi shid phyang" dalheing: dei nyid bang: ri yo' kyug nhain' wa yhi' yoem: so' gyi: bang: nghoid ago".

²⁸«He: zigi gyipui" moo said pyam shau" da" shooyid thang: ayham" bang: phung: gung moo Egutu byu yi khasu" gyoeb leung jo, boem wa khyoo: nghoid da:.

²⁹Edom gi nya: khokham yi nya: vhoebkhang" zoug: yi yo' dage" houg: moo jo, jo, da:. Nyangnu" gi yoem: so' gyi: da" gyi: zoo: yi bue" lid: lo abye: go". Nghoid loug we' akhid" nyangnu" gi gyipui" moo shid: lo" da" shooyid thang: ayham" bang: yo' dangain" moovo moug: moo jhang" jo, da:.

³⁰Mougzhung: shoid mo khokham nu" yi dangain" houg: moo nyid nyid wigi Sidon byumyu" yi we' houg: moo nyid nyid da:. Goonham' dalheing: nyangnu" yoem: so' gi khyi' khang" moo" cang kyug tain' yen" boem. Nghoid loug we' akhid" nyangnu" gi gyi khaid pui" moo said pyam shoug" bang: yo' dage' ngi: yoem" tung" gyoo" lo" wigi shooyid thang: ayham" lho: jhang" jo, ago". Nyangnu" gi moovo moug: khyoo: gyoo" loo" bang: yo' dayhang: ti" za: ngi: bo yoem" ago".

³¹«Gyipui" moo said pyam zi shau" da" he: bang: ri shau" myang yoomo Egutu khokham yo' nya: gyidab gi nheig teing khyoo: shoug" yu goo" wa ga: yoem: moo" bo ASEING tid bye:.

³²«Ngoo gi Egutu khokham wigi dei nyid bang: ri kyug tain' nhang: bye:. Nghoid loug we' nyang: yo' nya: gyidab dangain" gi gyipui" moo shid: lo" da" shooyid thang:- ayham" bang: yo' dage" said pyam shau" wigi jhang" jo, loo goo" wa. Yoem: moo" bo ASEING tid too" bye:.