Read Lashi EZEKIEL 33 Bible Online

EZEKIEL 33 - Lashi bible

EZEKIEL 33

¹ASEING gi ngoo ri dang: tid da:.

²Nyang: tid zigi «Shid: se' da" byu we"- Mungdain: daloem: khyoo: ngoo meing: zain: pui" ju" loo nhang: da" uri ci bui" wa ziri re" byumyu" yiri tid kyoo" we'. Hau: mungdain: mo byu yigi lhoug zung" wa byu dayug khyen: da:.

³Nyang: gi gyivoo tab re" nyid ziri shau" myang lang" yugkhang" moo" ri tid poin" wa shid re" poin" thui: ri kyo" kaid da:.

⁴Dayug yug gi hau: ziri shoug" gyoo: nghoid loug we' cishu: anhang: loo: nyid nyid wigi gyivoo gi nyang: ri re" said pyam rigi nyang: shid: zigi nya: yooboo yoomo nghoid da:.

⁵Nyang: shid: zigi nyang: nya: yooboo nghoid da:. Ciwim gari nyang: gi tid poin" ziri cishu: anhang: gyo: lid: pyam yoomo nghoid. Nyang: goolhoo' tam" gyo: nghoid rigi nyang: yo" phang: loid wa zi za: nghoid da:.

⁶Nghoid loug we' lhoug zung" nyid su: gi gyivoo re" lo nyid ziri myang nghoid loug we' tid poin" thui: abyid: yoomo gyivoo yigi re" wigi yooboo yoo" bang: ri said pyam boem nghoid rigi nyangnu" shid: lo" da" xang: gyoug: gi hau: lhoug zung" nyid su: ri foin: wa zi nghoid.

⁷«Shid: se' da" byu we"- akhid" ngoo gi nang ri Israela byumyu" mungdain: da" lhoug zung" su: khyo" yoovoin foin: too" wa. Nang gi ngo wigi nang ri byid: da" tid poin" dang: joem ri nyangnu" jhang lhid: byid: ca" da:.

⁸Ngoo gi akhyeing" su: dayug shid: wa zi za: danghoid lo: ein: tid fu" nghoid loug we' nyang: nya: kangso' ri yo" khyoid yu wa khyo" nyang: ri nang atid poin" nghoid rigi nyang: gi yooboo voin shi" su: dayug khyo" shid: lo" byug wa. Houg: lang" ngoo gi nyang: shid: lo" gang mo nya: xang: gyoug: ri nang ri voin nhang: wa.

⁹Nang gi akhyeing" su: ri tid poin" nghoid loug yooboo shoid zi atheing: pyam nghoid rigi nyang: gi yooboo voin shi" su: dayug khyo" shid: lo" byug wa. Nghoid loug we' re" kangso' ri khyam" sa: byid: wa.

¹⁰ASEING gi ngoo ri dang: tid da:. Nyang: tid zigi «Shid: se' da" byu we"- Israela byumyu" yi nyangnu" khasu" tid nyid ziri doem cang tid we'. ‹Ngoonu" gi ngoonu" da" yooboo joem yo' ngoonu" nyang: koid da" shoid moo" joem wigi yoovoin lid: nyid boem bye:. Ngoonu" gi nyid joem: lo" nyid abye:. Ngoonu" khasu" yo" dei nyid wa la".

¹¹Ngoo yoem: moo" bo ASEING gi deing deing dei nyid ziyo' dayhang: ti"- yooboo yoo" bang: shid: lo" ziri ayu" gau ein: ziri nyangnu" ri tid kyoo" we'. Nyangnu" gi yooboo shoid ziri theing: pyam lho: kangso' dei nyid ziri ngoo je myid vho: da:. Israela we"- nang koid nyid da" akhyeing" moo" ri theing: pyam we'. Nang ciwim yoomo shid: nau la"

¹²«Shid: se' da" byu we"- akhid" byugi dayug gi yooboo shoid nghoid rigi nyang: koid lid: lo da" ge moo" wigi nyang: ri ayo" khyoid yu wa ein: Israela byumyu" yiri tid kyoo" we'. Akhyeing" su: dayug gi yooboo shoid ziri theing: pyam nghoid rigi nyang: gi yooboo dam byid: zi ashau" wa. Houg: lho: byugi dayug gi yooboo shoid nghoid ri nya: da" kangso' ri ateing too" wa.

¹³Ngoo gi byugi dayug ri kangso' dei wa dang: so' byid: too" nghoid loug we' nyang: gi lid: loo bye: da" ayo, moo nyang: koid da" ge moo" zoo" gi gi" bye: ga: myid shed" lo lho: yooboo shoid nghoid rigi ngoo gi nyang: koid lid: lo da" ge moo" zoo" daja: ri we' amyid boin: byid: loo wa. Nyang: gi nya: yooboo gang mo shid: loo" wa.

¹⁴Ngoo gi akhyeing" su: dayug ri shid: wa ein: tid poin" too" nghoid loug we' nyang: gi yooboo shoid nyid ziri theing: pyam lho: jo ziyo' ge da" khyoo: ri koid lo nghoid ri

¹⁵dangtu'- nyang: gi ngei jhid" byid: to" da" shid re" yu to" da" jonu" ri doem tau" byid: anghoid lang" nyang: khau" yu to" da" jonu" doem tau" byid: nghoid ri nyang: gi yooboo shoid nyid ziri theing: pyam lho: kangso' byid: da" tarha" joem ri cang nghoid ri nyang: gi ashid: loo yo" dei nyid wa.

¹⁶Ngoo gi nyang: shoid lid: loo bye: da" yooboo joem ri khyoid pyam byid: lho: nyang: gi kangso' dei nyid wa. Ciwim gari nyang: gi jo ziyo' ge ziri koid yoomo nghoid.

¹⁷Re" byu yigi ngoo koid zi ajoo ga: tid ago". Anghoid- nyangnu" da" khyoo:- za: ajoo nghoid da:.

¹⁸Deungmain" da" byu dayug gi ge moo" koid ziri theing: pyam lho: akhyeing" moo" koid shid" lo nghoid ri nyang: gi hau: gang mo shid: wa zi nghoid.

¹⁹Akhyeing" su: dayug gi yooboo shoid ziri to" pyam lho: jo ziyo' ge moo" zoo" ri koid nghoid rigi nyang: gi nya: da" kangso' ri khyoid yu abye:.

²⁰Nghoid loug we' Israela we"- nang gi ngoo koid ziri ajoo nghoid da ga: tid da:. Ngoo gi nang koid da" moo" wigi nang ri dang: phyed wa.

²¹Ngoonu" ri pyoung" she: nyhid: to" zi daxe: eig zain ein: zain lhammoo" daxi: khyab- wim: nyid" nyid" ri Yerusalem mo phang: loid lo" da" byu dayug ju" re" wigi hau: voomoo" byo, gyoo" loo" bye: khyoo: ngoo ri tid kyo" da:.

²²Nyang: ju" re" da" shid vhu" myen" thang: zoo" ri ASEING da" shidkhoin" mo yoem: so' ri ngoo shoug" kham zo:. Thang: nyid" nab soin:- hau: byu ju" re" uri ASEING gi ngoo ri dang: tid wa yoem: so' doem tau" byid: da:.

²³ASEING gi ngoo ri dang: tid da:.

²⁴Nyang: tid zigi shid re" da" byu we"- Israela moug: mo byo, yoin" jo, da" voomoo" joem moo nyid bang: gi hid: su" ga: tid nyid ago". ‹Abraham gi dayug kyeing" nghoid loug we' nyang: ri damung" goin" byid: to" da:. Ngoonu" gi myoo" sho' bang: nghoid. Houg: yoomo hau: mougmyid akhid" ngoonu" da" zi nghoid bye:›.

²⁵Ngoo yoem: moo" bo ASEING tid nyid ziri nyangnu" ri tid kyoo" we'. Nanu" gi shoo" moo suid" boo shi" ziri zo: ago". Nanu" gi yu phara" soolhoo: joem ri no' ago". Nanu" gi byu said ago". Hau: mougmyid ri nanu" seing: ein: kha: khyo" yo" myid yu boem goo" la".

²⁶Nanu" gi nanu" nya: sham: coin" joem moo khau: nghe: da:. Nanu" da" avoid gi aco' ajhoid nghoid da:. Yugkhang" moo" gi myi shoid lang shoid ago". Hau: mungdain: gi nanu" da" mung" nghoid ein: khasu" yo" myid go" la".

²⁷Ngoo gi dei nyid da" Mangsoo deing deing nyang: nghoid ziyo' dayhang: ti" hau: byo, yoin" jo, da" voomoo" joem moo nyid nyid bang: gi said pyam zi shau" boem goo" wa ein: nyangnu" ri tid poin" kyoo" we'. Siyoo voogung moo nyid bang: ri siyoo gougnyhoug lam" joem wigi zo: pyam wa. Boem joem yo' lug ug joem moo phang: gau" nyid yen" bang: gi noo shau" wigi shid: loo" goo" wa.

²⁸Ngoo gi mungdain: ri jham" coug: youg da" mougmyid koid pyam wa. Houg: lho: nyangnu" gye" nghoid boin: da" yoem: so' thang lo" byug wa. Israela mung" mo boem joem gi no, seing: kyid: da" siyoo bue" wigi hau: joem khyo" hang" we' gyung: ayo" so" lid: loo wa.

²⁹Ngoo gi byumyu" yiri nyangnu" da" yooboo joem shid re" yooboo dam byid: lho: mungdain: joem ri jham" coug: youg koid pyam da" uri nyangnu" gi ngoo ASEING nghoid ziri se' loo goo" wa.

³⁰ASEING tid nyid zigi «Shid: se' da" byu we"- re" byumyu" yigi voomoo" vang khyam: joem moo anghoid lang" nyangnu" yhoem: joem da" khoem" duang: joem moo shoug" go" lang" re" khyoo: ri lhung tid ago". Nyangnu" nyang: cang" ‹Akhid" ASEING jang mo ce: mungdang: ju" ziri yhe: tam" gyo: boem shang› ga: tid boem.

³¹Hougsu" nga" byu yigi nang tid wa da" dang: ri tam" gyoo: wa shid re" zeing: foem: yhe: boem nghoid loug we' nyang: nu" gi nyangnu" koid wa khyoo: nang tid khyoo: ri akoid nghoid ago". Nyangnu" da" nhoid moo jheddab dang: tid da:. Nghoid loug we' nyangnu" gi nyangnu" da" myid vo: lau khyoo: ri xo' koid da:.

³²Nyangnu" shid re" nang gi jheddab jikhoin" joem khoin" da" shapyoo: su: anghoid lang" teing baid su: tho' ci: ajain" nghoid da:. Nyangnu" gi re" dang: dangain" ziri tam" gyo: wigi hau: gu: mo dakhoin" ri we' aphoug" cang nghoid da:.

³³Nghoid loug we' re" da" dang: khoin" joem dangain" deingmain" lo uri nyangnu" deingmain" lo uri nyangnu" gi nyangnu" phung: gung moo lapi: dayug nyid lid: loo bye: khyoo: ri se' loo goo" wa.