Read Lashi EZEKIEL 34 Bible Online

EZEKIEL 34 - Lashi bible

EZEKIEL 34

¹ASEING gi ngoo ri dang: tid da:.

²Nyang: tid zigi «Shid: se' da" byu we"- Israela da" vhoebkhang" zoug: yiri tid phue: pyam we'. Nyangnu" ri lapi: pe: byid: wigi ngoo yoem: moo" bo ASEING nyangnu" ri tid nyid khyoo: ri tid kyoo" we'. Israela yang zung" bang: nanu" gi joem: lo" abye: go". Nanu" gi nanu" nya: gung ri yu" goin coung: lho: yang joem ri khanham we' azung" nghoid da:.

³Nanu" gi yang noug" shug- yang moug" yo' koid da" byimi ri void lho: yung" thang da" yang ri said wigi yang shoo" ri zo: ago". Nghoid loug we' yang joem ri khanham we' nanu" azoem: nghoid ago".

⁴Nanu" gi yoem: neing: du: ri alhung goin coung:. No du: ri abyang" byid:. Dam dab du ri athoeb byid:. Nyid lam" yen" du: ri adoem shu" yu. Byug lo" du: ri ashoo: nghoid da:. Hau: gungthid nanu" gi nyangnu" ri akhyi" akhyoid zoem" khau: da:.

⁵Yang joem gi yang zung" su: ayoo" yoomo nyangnu" gi nyid sain" lo" ago". Houg: lho: siyoo gougnyhoug lam" joem gi nyangnu" ri ngaid said zo: pyam da:.

⁶Houg: yoomo nga" da" yang joem gi myhang: da" bouggung joem yo' boem joem khyoo: nyid: lam" lo" ago". Nyangnu" gi mougmyid gyab khyoo: nyid sain" lo" lho: nyangnu" ri hang" wigi we' acang shoo:- nyangnu" ri shoo: wa shid re" hang" yoem: akaid nghoid da:.

⁷Yang zung" bang: we"- akhid" nanu" ri ngoo yoem: moo" bo ASEING tid nyid dang: ri tam" gyoo: ge'.

⁸Ngoo gi kangso' dei da" Mangsoo deing deing nghoid ziyo' dayhang: ti" nanu" gi nga" dang: tam" gyo: ri je gi wa. Nga" da" yang joem gi yang zung" su: anyid yoomo siyoo gougnyhoug lam" joem wigi khaid thung" said pyam wigi nyangnu" ri zo: pyam ago". Nga" da" yang zung" bang: gi hau: yang joem ri shoo: wa shid re" yoem: akaid nghoid ago". Nyangnu" gi nyangnu" da" gung ri za: yu" goin coung: nyid lho: yang ri acoung: nghoid ago".

⁹Hougsu" yoomo yang zung" bang: we"- nga" dang: ri tam" gyo: ge'.

¹⁰Ngoo yoem: moo" bo ASEING gi nanu" da" gyivoo nghoid ein: tid fu" too" bye:. Ngoo gi nga" da" yang joem ri nanu" jang" mo yu pyam byid: wigi nanu" ri nyangnu" da" yang zung" bang: khanham we' adoem koid nhang: loo: wa. Ngoo gi khanham we' nanu" nya: gung ri za: doem yu" goin coung: nhang: loo wa nghoid. Ngoo gi nga" yang joem ri nanu" mo khyoid yu lho: nanu" wigi nyangnu" ri zoo: nhang: loo wa nghoid.

¹¹«Ngoo yoem: moo" bo ASEING nanu" ri tid zigi ngoo gi nga" yang joem ri ngoo nyang: cang sho: lho: nyangnu" ri coung: byid: wa.

¹²Hau: zigi yang zung" su: gi so" lam" sain" lo" da" nya: yang joem ri yu" coung: wigi dage" doem zheing" yu yhang: ti" nghoid wa. Hau: moug: coid wigi byo, yoin da" bidnyid mo ngoo gi nyangnu" ri nyangnu" nyid sain" lo" da" joyoo dangain" mo doem shu" tau" yu wa.

¹³Ngoo gi nyangnu" ri tungbau mungdain: joem mo shu" thu yu lho: nyangnu" ri dage" zheing" foem: too" wa. Houg: lho: nyangnu" nya: moug: khyoo: doem shu" loo" wa. Ngoo gi nyangnu" ri Israela boem joem yo' gyid gyung: zoo: joem khyoo: doem shu" tau" yu lho: nyangnu" ri yung" da" coung" nu" yoo moo zhoo" wa.

¹⁴Ngoo gi nyangnu" ri Israela mougmyid mo boem joem yo' lang: khung" joem nyau young" da" coung" yoo joem moo goem loem tung" zoo: nhang: wa.

¹⁵Ngoo gi: nga" yang joem da" yang zung" su: nghoid. Houg: yoomo ngoo gi nyangnu" shid re" theing: noo: wa joyoo daloem: shoo: byid: wa. Ngoo yoem: moo" bo ASEING tid too" bye:.

¹⁶«Ngoo gi byug byug da" yang ri cang shoo: wa. Lam" byug da" yang ri doem shu" tau" yu wa. Dam dab du: ri dam noo thoeb byid: wa. Noo bang: ri macid" byang" byid: wa. Nghoid loug we' xu: wigi yoem: bo bang: rigi said pyam wa. Ciwim gari ngoo gi jo ziri koid da" yang zung" su: nghoid.

¹⁷«Houg: lho: nga" gougnyhoug phung: we"- akhid" ngoo yoem: moo" bo ASEING nanu" ri tid zigi ngoo gi nanu" yugkhang" moo" ri dang: phyed wa. Ge ziyo' age ziri kho' wa. Yang ri coidbaid joem mo kho' yu wa.

¹⁸Nanu" mo dayham" bang: gi ge thang da" vufu" ri shoug" zo: nyid ziri nheig adeug nghoid da:. Nanu" gi nanu" azo: rilang" nang: nhe" pyam ago". Nanu" gi gyid gyeing: ri shug lho: nanu" ashug ziri thoem" boeb lhu: nhoid: pyam ago".

¹⁹Nga" da" yang gootu: gu: gi nanu" nang: nhe" pyam bye: da" mhain" ri zoo: ca" ago". Houg: lho: nanu" thoem" boeb lhu: nhoin: pyam bye: da" gyid ri nyangnu" shug ca" ago".

²⁰«Hougsu" yoomo ngoo yoem: moo" bo ASEING akhid" nanu" ri tid zigi «Ngoo gi nanu" yoem: bo da" yang yo' yoem: neing: da" yang joem agyoo: moo dang: phyed wa.

²¹Nanu" gi no da" yang dadu: du: ri ayam' khyoo: keing" shu" pyam lho: hau: yang phung: mo khaid tang" pyam da:.

²²Nghoid loug we' ngoo gi nga" yang joem ri khyoid yu wigi nyangnu" ri anoug akhyoid akoid nhang: loo wa. Ngoo gi nga" da" yang du: khang" moo" ri dang: phyed lho: ge da" yang yo' age da" yang ri kho' pyam wa.

²³Nyangnu" da" dayug kyeing" da" yang zung" su: bui" wa shid re" nga" dei zoo: David yo' du da" khokham dayug ngoo nyangnu" ri byid: wa. Houg: lho: nyang: gi nyangnu" ri yu" goin coung: loo wa.

²⁴Ngoo ASEING gi nyangnu" da" Mangsoo nghoid wigi nga" da" dei zoo: David yo' du da" khokham dayug gi nyangnu" da" vhoebkhang" zoug: nghoid loo wa. Ngoo tid too" bye:.

²⁵Ngoo gi nyangnu" da" goem loem khyoo: shid re" loem ge" da" dang: theing daloem: ri nyangnu" yo' koid too" wa. Ngoo gi hau: mougmyid mo gyoug ca" ja: gougnyhoug joem dangain" ri shoem" yu pyam wa. Houg: lang" nga" yang joem gi coung" yoo moo goem loem tung" yo" nyid wigi siyoo khoug: moo yo" yhoeb loo wa.

²⁶«Ngoo gi nyangnu" ri mainkaid byid: wigi nyangnu" ri nga" da" gyeung" shang: bouggung goem sho' moo nyid nhang: wa. Hau: joyoo moo ngoo gi nyangnu" ri nyangnu" ca" da" uri jeju" moug: voo byid: wigi mainkaid byid: wa.

²⁷Seiggam joem gi ashi" zi: loo wa. Mougmyid gi gug shi" mei: shi" thu byid: wa. Houg: lho: yugkhang" moo" gi nyang: nya: mougmyid moo goem loem tung" yo" nyid loo wa. Ngoo gi nga" byumyu" yi da" jangcoo" joem ri phyed pyam byid: lho: nyangnu" ri join koid bang: da" lo, mo loid byoin nhang: kaid da" uri ngoo ASEING nghoid ziri nyangnu" se' lo boem goo" wa.

²⁸Yu soolhoo: no' bang: gi nyangnu" ri alhoid zoo: loo goo" wa. Houg: lho: gougnyhoug lam" joem gi nyangnu" ri angaid said zoo: loo goo" wa. Nyangnu" gi goem loem tung" yo" nyid wa. Nyangnu" ri hang" wigi we' akyug tain' loo goo" wa.

²⁹Ngoo gi nyangnu" ri myidxu: ge da" yoothung" joem ri byid: wigi hau: mougmyid moo zooyoid khyoo: ajo, loo: wa. Gootu: byumyu" yigi nyangnu" ri ayu" ngi loo goo" wa.

³⁰Israela byumyu" yiri ngoo goem loem byid: ziyo' nyangnu" gi nga" da" byumyu" nghoid ziri yugkhang" moo" se' loo goo" wa. Ngoo yoem: moo" bo ASEING tid too" bye:.

³¹«Ngoo khu: myhu: nyid da" nga" gougnyhoug kyung- nga" yang joem nanu" gi nga" byumyu" nghoid lho: ngoo gi nanu" Mangsoo nghoid. Yoem: moo" bo ASEING tid bye:.