Read Lashi EZEKIEL 36 Bible Online

EZEKIEL 36 - Lashi bible

EZEKIEL 36

¹ASEING tid zigi «Shid: se' da" byu we"- Israela boem joem ri dang: tid wigi nyangnu" shid re" ngoo yoem: moo" bo ASEING da" mungdang: ri tam" gyo: boem wa shid re" tid kyoo" we'. Israela da" gyivoo yigi gau" myid gau wigi ‹Hau: goonham' mo boem joem gi akhid" ngoonu" da" zi nghoid bye:› ga: tid boem.

³«Lapi: pe: wigi ngoo yoem: moo" bo ASEING tid nyid ziri tid fu" we'. Yhoem: kyoo" cang" byumyu" mungdain: yigi Israela boem joem ri seing: yu wigi phyo' sain" pyam uri nyangnu" dangain" bang: gi Israela ri coem' juang" ago".

⁴Hougsu" yoomo akhid" boem joem yo' boug: gung joem nanu" ri gyid zoo: gyung: yo' lang: khung" joem nanu" ri byo, yoin" jo, da" joyoo nanu" ri phyo' shoin' pyam wigi aqei: ayam mo byumyu" mungdain: joem dangain" wigi coem' juang" lho: she: pyam too" shau" da" voomoo" joem nanu" ge'. Ngoo yoem: moo" bo ASEING tid ziri tam" gyoo: we'.

⁵«Ngoo yoem: mo" bo ASEING gi nheigloem: lung ziyo' aqei: ayam mo byumyu" yi je wigi Edom ri tid too" bye:. Nyangnu" atho' tid gau ziyo' yu" juang" lho: nga" da" mougmyid ri lhoid seing: yu lho: houg: mo coung" yoo ri we' seing: yu pyam bye:.

⁶«Hougsu" yoomo Israela mougmyid ri lapi: pe: byid: we'. Boem joem bouggung joem gyid zoo: gyung: joem yo' langkhung" joem ri byumyu" yi wigi coem' rue" lho: yu" nge boem da" gang mo ngoo yu" nheig yo: myid zo ziyo' tid ziri tid kyoo" we'.

⁷Ngoo yoem: moo" bo ASEING gi aqei ayam mo byumyu" yigi yu" nge pyam zi shoug" goo" wa ein: deing deing za: dangsoo" koid too" bye:.

⁸Nghoid loug we' Israela mung" mo boem joem moo gi nga" byumyu" yi nanu" shid re" seiggam joem doem yug lo lho: ashi" doem zei: byid: loo wa. Nanu" gi khamyhang amyang" ri yhoem: moug: khyoo: doem shoug" loo" goo" wa.

⁹Ngoo gi nanu" shoid moo nghoid. Nanu" da" mougmyid ri doem phug lho: houg: mo shivoo: doem yo" shoo" zoo: sho' ngoo koid wa.

¹⁰Ngoo gi nanu" ri byu myo: je: loo sho' koid wa. Nanu" gi voomoo" joem moo nyid boem wigi byo, yoin" jo, da" ja: khang" moo" ri doem tu: zhug loo: wa.

¹¹Ngoo gi byu joem yo' gougnyhoug joem ri myo: je: loo nhang: wa. Nanu" gi shid phyang" tho' je myo: lo wigi nanu" gi zooshang: myoo" sho' yo" loo goo" wa. Ngoo gi nanu" ri hau: joyoo moo nanu" lhung nyid lid: lo kho' ziyo' dayhang: ti" nyid nhang: wa. Houg: lho: ngoo gi nanu" ri shid phyang" tho' je nyid gi yab ge nhang: wa. Houg: lang" ngoo ASEING nghoid ziri nanu" se' loo goo" wa.

¹²Ngoo gi nga" byumyu" Israela nanu" ri doem shu" yu wigi hau: mougmyid moo doem nyid nhang: wa. Hau: zigi nanu" mougmyid nyang: nghoid loo wa. Houg: lho: hau: mougmyid gi nanu" da" zooshang: yiri khanham we' zoo ayoid nhang: wa.

¹³«Ngoo yoem: moo" bo ASEING tid bye:. Mougmyid gi byu ri zo: wigi hau: byumyu" yiri nya: zoo: yi lhoid yu pyam byid: da" moug: nghoid da: ga: byumyu" yi tid zi deingmain" da:.

¹⁴Nghoid loug we' akhid" mo thang: phyang" hau: mougmyid gi byu zo: da" mougmyid- nanu" da" nya: zoo: yiri lhoid yu pyam byid: da" mougmyid anghoid loo wa. Ngoo yoem: moo" bo ASEING tid too" bye:.

¹⁵Hau: mougmyid gi byumyu" yi wigi coem' juang" zi sube" wigi coem' yu" nge lho: nyhab' dang: ri ashau" gyoo: loo: wa. Hau: mougmyid gi hau: byumyu" yi mo nya: zoo: yiri alhoid yu pyam loo wa. Ngoo yoem: moo" bo ASEING tid too" bye:.

¹⁶ASEING gi ngoo ri dang: tid da:.

¹⁷Nyang: gi «Shid se' da" byu we". Israela byumyu" yigi nyangnu" da" mougmyid moo nyid boem uri nyangnu" gi nyangnu" nyid da" avoid yo' nyangnu" koid da" lo, moo" khyo" hau: mougmyid ri ayung" alho' bui" nhang: da:. Ngoo gi nyangnu" da" akyang" ri mi ci: da" ayo, mo myiyi: yhang: ti" laloem: lakhoug: thung" khyo" ayung" lhoo' ein: myid byid: da:.

¹⁸Nyangnu" ri nga" nheig yo: khyoo: ri kham: zoo: nhang: bye:. Ciwim gari nyangnu" hau: mougmyid moo byu said moo" shoid ziyo' yu soolhoo: ri no' khyo" hau: mougmyid ri aco' ajhoid koid pyam yoomo nghoid.

¹⁹Nyangnu" nyid da" avoid yo' koid da" moo" zoo" shid re" nyangnu" ri ngoo dang: phyed bye:. Houg lho: ngoo gi nyangnu" ri tungbau meing: joem khyoo: khaid sain" kaid bye:.

²⁰Nyangnu" khakhyoo: yhi: nghoid loug we' nga" da" gyeung" shang: myeing ri ngi: yoem" nhang: ago". Ciwim gari subi" goobang: hid su" ga: tid da:. ‹Hid: bang: gi ASEING da" byumyu" yi nghoid ago"- nghoid loug we' nyangnu" gi nyangnu" da" mougmyid mo phang: yen" ago"› ga: tid boem.

²¹Hau: zigi ngoo ri nga" da" gyeung" shang: myeing shid re" myid yu" nhang: da:. Ciwim gari Israela byumyu" yigi nyangnu" yhe: lo" da" khyi' khang" moo" moo ngoo ri ngi: yoem" nhang: ago".

²²«Houglho: akhid" gi Israela byumyu" yi shid re" Ngoo yoem: moo" bo ASEING da" mungdang: nyangnu" ri byid: we'. Ngoo koid wa ein: zigi Israela byumyu" nanu" akyu" shid re" anghoid. Nanu" ju" yhe: lo" da" mungdain: khang" moo" moo nanu" wigi ngi: yoem" nhang: da" nga" gyeung" shang: myeing shid re" koid wa zi danghoid.

²³Byumyu" yiri nyangnu" da" phung: moo nanu" ngi: yoem" nhang: pyam da" nga" gyeung" shang: gyi: sheung: da" myeing ri lho: shug lang" nyangnu" gi ngoo ASEING nghoid ziri se' loo goo" wa. Ngoo yoem: moo" bo ASEING tid too" bye:. Ngoo gyeung" shang: khyoo: ri byumyu" yiri ci: shug wa shid re" ngoo gi nanu" ri ci: yhung: wa.

²⁴Ngoo gi nanu" ri byumyu" ja: khang" moo" yo' mungdain: khyi' khang" moo" moo shu" yu lho: nanu" nya: moug: khyoo: shu" tau" loo wa.

²⁵Ngoo gi nanu" da" jang" moo gyid gyeing: yo' pyi: sain" wigi nanu" ri nanu" da" yu soolhoo: joem dangain" mo yo' nanu" ri ayung" alho' bui" nhang: da" gootu: ja: khang" moo" mo younglho' loo nhang: wa.

²⁶Ngoo gi nanu" ri nheigloem: aseig yo' myid aseig kaid byid: wa. Ngoo gi lugzeing su" thain: da" nheigloem: ri yu pyam byid: lho: tam" gyo: cang yhe: da" nheigloem: ri kaid byid: wa.

²⁷Ngoo gi nanu" akhoug: moo nga" da" Venyi: ri kaid byid: wigi nanu" ri ngoo byid: too" bye: da" tarha" joem ri cang wigi amyeing" dang: ri zoem: ci: boem ziri myang wa zi nghoid.

²⁸Hau: thang: nanu" gi nanu" da" phoug" phyid" ri ngoo byid: to" da" mougmyid moo nyid lo boem goo" wa. Nanu" gi nga" byumyu" nghoid wigi ngoo gi nanu" da" Mangsoo nghoid wa.

²⁹Ngoo gi nanu" ri ayung" alhoo' bui" nhang: da" ja: khang" moo" mo khyoid yu wa. Ngoo gi shivoo: agoin agoo" yoo" wa shid re" amyeing" byid: wa. Houg: lang" nanu" gi phang" khoug agyoo" loo: wa.

³⁰Ngoo gi nanu" da" shi" khyam: joem yo' yoo joem ri ashi" myoo" sho' zei: nhang: wigi byumyu" yi da" phung: gung moo nanu" ri ngi: yoem" nhang: da:. Phang" khoug" ajo, loo wa.

³¹Nanu" gi nanu" nyang: shoid lid: lo da" akhyeing" ashoeb da" avoid joem yo' nanu" koid shoid da" joem ri myid boin: lho: nanu" gi nanu" da" yooboo joem yo' youg: noo dam joem gang mo nanu" nya: gung ri co' lo boem goo" wa.

³²Israela we"- ngoo gi he: gu: dangain" ri re" akyu" shid re" koid zi anghoid ein: ziri si nhang: nau. Nang koid da" sho' ja: yo' ngi: yoem" khyoo: nang ri kham zoo: nhang: nau yoomo koid zi danghoid. Ngoo yoem: moo" bo ASEING tid too" bye:»

³³Yoem" moo" bo ASEING tid zigi «Ngoo gi nanu" ri nanu" da" yooboo dangain" mo bain younglho' yu lang" ngoo gi nanu" ri nanu" da" voomoo" joem moo doem nyid nhang: lho: byo, yoin" jo, ziri nanu" ri doem zhug nhang: wa.

³⁴Nanu" da" yoothung" joem khyo" so" lid: lo" da" yugkhang" moo" gi hau: yoothung" joem khayhi' myo, se: lho: mougmyid gang: bue" jo, ziri shau" myang abye: go". Nghoid loug we' ngoo gi nanu" ri hau: yoo joem moo doem phug zoo: nhang: wa.

³⁵Yugkhang" moo" gi shid phyang" dalheing: dain" pyoid yoo bue" jo, da" he: mougmyid gi Eden khyam: yhang: ti" bue" loo bye: ziyo' phyo' khyo' pyam- lhoid yu pyam bye: lho: byo, yoin" jo, bye: da" he: voomoo" joem gi akhid" khasu" byu doem nyid lho: gyidab voomoo" bue" lo khyoo: ri tid loo goo" wa.

³⁶Houg: lang" ashid: loo: nyid deing da" aqei: ayam mo yhoem: kyoo" cang" byumyu" yigi byo, yoin" loo" bye: da" voomoo" joem ri ngoo ASEING doem zhug to" lho: se: coid da" yoothung" joem ri doem phoug zhung" to" ziri se' loo goo" wa. Ngoo ASEING gi hid: su" koid wa ein: dangsoo" byid: too" bye:. Houg: lho: ngoo gi koid nyang: koid wa.

³⁷Yoem: moo" bo ASEING tid zigi «Ngoo gi Israela byumyu" yiri ngoo mo pang" thoug yu khyoo: dalheing: doem mho' nhang: wa. Houg: lho: ngoo gi nyangnu" ri yang kyung dakyung yhang: ti" je: loo nhang: wa.

³⁸Akhid" byo, yoin" jo, da" voomoo" joem gi goonham' dalheing: Yerusalem moo byeung" sho' nyid uri nghe' ngei" xoin" khyo" shugbyid: to" da" yang joem byeung" jo, ziyo' dayhang: ti" byeung" jo, boem goo" wa. Houg: lang" nyangnu" gi ngoo ASEING nghoid ziri se' loo goo" wa.