Read Lashi EZEKIEL 37 Bible Online

EZEKIEL 37 - Lashi bible

EZEKIEL 37

¹Ngoo gi ASEING shidkhoin" mo yoem: so' ri shoug" kham zo: lho: nya: da" Venyi: gi ngoo ri shu" lo" wigi myidjang moo shooyoug: byeung" jo, da" lang: khau: moo lo" nyhid: to" da:.

²Nyang: gi ngoo ri lang: khau: goem: sho' shu" so" yen" wigi hau: joyoo moo shooyoug: joem gi gye" kyug jo, ziri shau" myang.

³Nyang: ngoo ri tid zigi «Shid: se' da" byu we" he: shooyoug: joem gi kangso' doem yo" dei loo goo" wa la"› ga: myid:. Ngoo gi «Yoem: moo" bo ASEING we" hau: zigi nang kyeing" dayo" phid: wa» ein: tid bye:.

⁴Nyang: tid zigi «Shooyoug: joem ri lapi: pe: we'. He: shooyoug: joem ri ASEING da" mungdang: tam" gyoo: wa shid re" tid we'.

⁵Nyangnu" ri tid kyoo" we'. Ngoo gi nanu" akhoug: khyoo: so' moid zei kaid lho: nanu" ri kangso' doem dei loo nhang: wa.

⁶Ngoo gi nanu" ri shoogyi: shoomyen joem kaid byid: lho: nanu" ri shooyid yo' thoeb byid: wa. Ngoo gi nanu" akhoug: khyoo: kangso' moid kaid byid: wigi doem dei to' loo nhang: wa. Houg: lang" nanu" gi ngoo ASEING nghoid ziri se' loo goo' wa ga: tid da:.

⁷Hougsu" yoomo ngoo ri tid bye: ziyo' dayhang: ti" Lapi: pe: bye:. Ngoo dang: tid nyid uri khyug khyug khya khya ga: myeing thui: shau" gyo:. Houglho shooyoug: joem dage" xo' go" lo" boem ago".

⁸Ngoo zung" yu" nyid uri shooyoug: joem mo shoogyi: yo' shoomyen joem dab lo wigi hau: thang: shooyid thoeb lo" ago". Nghoid loug we' hau: gung du: joem moo so' aboo nghoid ago".

⁹Mangsoo ngoo ri tid zigi «Shid: se' da" byu we" lid ri Lapi: pe: we'. Hau: lid ri shoid khang" moo" khyo" lo lho: hau: manggung joem akhoug: khyoo: hau' vang lo" wigi nyangnu" ri kangso' doem dei nhang: wa ga: yoem: moo" bo ASEING amyeing" byid: bye ein: tid we'» ga: tid da:.

¹⁰Hougsu" yoomo ngoo ri tid byid: ziyo' dayhang: ti" lapi: pe: bye:. Kangso' gi shid: manggung joem khyoo: vang lo" lho: hau: joem gi kangso' dei wigi to' yab lo ago". Nyangnu" gi gyidab dadab yhi' myo: ago".

¹¹Mangsoo ngoo ri tid zigi «Shid: se' da" byu we"- Israela byu yigi he: shooyoug: joem yo' du ago". Nyangnu" gi kyug byug wigi myid byu jang ayo" ziyo' ju" lo wa ayo, ga: zi ajo, loo ga: tid ago".

¹²Houg: yoomo nga" byumyu" Israela ri lapi: pe: wigi ngoo yoem: moo" bo ASEING gi nyangnu" da" loeb duang: joem ri phang kaid wa ga: ein: tid kyoo" we'. Ngoo gi nyangnu" ri doem shu" yu lho: nyangnu" ri Israela moug: khyoo: shu" tau" yu wa.

¹³Ngoo gi nga" da" byumyu" Israela ri myhoeb to" da" loeb duang: joem ri phang kaid lho: nyangnu" ri shu" tau" yu da" uri nyangnu" gi ngoo ASEING nghoid ziri se' loo goo" wa.

¹⁴Ngoo gi nga" Venyi: kangso' nyangnu" ri kaid byid: lho: nyangnu" ri Venyi: kangso' doem dei nhang: ziyo' nyangnu" nya: mougmyid moo doem nyid nhang: wa. Houg: lang" nyangnu" gi ngoo ASEING nghoid ziri se' loo goo" wa. Ngoo gi he: ziri koid wa ein: dang: so" to" ziyo' dayhang: ti" koid wa. Ngoo ASEING tid bye:.

¹⁵ASEING ngoo ri dang: doem tid da:.

¹⁶Nyang: tid zigi «Shid: se' da" byu we" voosi" daloem koid: yu lho: hau: adang moo ‹Yuda khokham mungdain: ein: lhid" tab too" we'. Hougthang: gootu: voosi" daloem: doem koid: yu lho: hau: adang moo ‹Israela khokham mungdain: ein: lhid" tab too" we'.

¹⁷Houg: lho: hau: voosi" eig loem: goin" athang: thang: moo zei: ci: we'. Houg: lang" nyangnu" gi voosi" dakhaid kyeing" ti" yu" thu da:.

¹⁸Re" byumyu" yigi nang ri ‹He: zi ce: dang: kang: nghoid ga: myid: boem lang"

¹⁹Nyangnu" ri ngoo yoem: moo" bo ASEING gi Israela ri gungthid koid da" voosi" ri yu lho: Yuda ri gungthid koid da" voosi" yo' xo' too" wa. Ngoo gi hau: voosi" eig khaid ri dakhaid za: koid pyam lho: hau: ziri nga" lo, moo: zei: ci: wa.

²⁰«Hau: voosi" eig khaid ri re" lo, moo zei: ci: lho: byumyu" yiri myang nhang: we'.

²¹Hau: thang: ngoo yoem: moo" bo ASEING gi nga" da" byumyu" dangain" bang: ri nyangnu" nyid sain" lo" byug boem bye: da" byumyu" yi khoug: mo shu" tau" yu lho: nyangnu" ri khe: zheing" to" lho: nyangnu" da" mougmyid khyo: doem shu" tau" loo" wa.

²²Ngoo gi nyangnu" ri Israela boem joem atho' hau: mougmyid moo byumyu" damyu" za: shoin" pyam wa. Houg: lho: nyangnu" gi nyangnu" ri vhoeb wa khokham dayug za: yoo" goo" wa. Houg: lho: nyangnu" gi byumyu" eig ja: khyo" akho' loo: goo" wa. Khokham mungdain: eig loem: khyo" we' abyo, gang: loo goo" wa.

²³Nyangnu" gi nyangnu" da" gung ri aco' ajhoid yu soolhoo: joem khyo" ayung" alho' bui" nhang: loo: wa anghoid. Nyangnu" nya: gung ri yooboo wigi we' byo, yoin" nhang: loo wa anghoid. Ngoo gi nyangnu" ri nyangnu" yooboo shoid da" khyoo: dangain" mo yo' ngoo ri gyi koid jang" mo loid byoin nhang: wa. Ngoo gi nyangnu" ri kyeing sain' yu wa. Nyangnu" gi nga" da" byumyu" yi bue" lho: ngoo gi nyangnu" da" Mangsoo nghoid wa.

²⁴Nga" da" dei zoo: David yhang: ti" da" khokham dayug gi nyangnu" da" khokham nghoid loo wa. Nyangnu" dangain" bang: gi vhoebkhang" zoug: dayug akhoug: moo zeing: foem: nyid lho: nga" da" tarha" joem ri jhug zug tung" tam" gyo: cang yhe: loo goo" wa.

²⁵Nyangnu" gi nga" da" dei zoo: Yaku ri ngoo byid: to" da" mougmyid- nyangnu" da" phoug" phyid" yi nyid lid: lo da" mougmyid tho' moo nyid lo boem goo" wa. Nyangnu" gi houg: moo apyaid atoo: nyid lo boem goo' wa. Nyangnu" da" zooshang: yi yo' amyed ashen yi dangain" we' hougsu" koid loo goo" wa. Nga" dei zoo: David yhang: ti" da" khokham dayug gi nyangnu" da" atho' moo apyaid atoo: vhoeb nyid wa.

²⁶Ngoo gi apyaid atoo: moo nyangnu" goem loem wa khyoo: dang: theing daloem: ri nyangnu" yo' koid too" wa. Ngoo gi nyangnu" ri nyhid: to" lho: myo: lug je: loo nhang: wa. Houg: lho: nyangnu" da" mougmyid moo apyaid atoo: jo, jo, wa shid re" nga" da" Noku Yhoem: Moo" ri to" too" byid: wa.

²⁷Ngoo gi houg moo nyangnu" yo' dage" nyid wa. Ngoo gi nyangnu" da" Mangsoo nghoid wa wigi nyangnu" gi nga" byumyu" yi nghoid wa.

²⁸Ngoo gi nga" da" Noku Yhoem: Moo" ri houg: moo apyaid atoo: jo, jo, wa shid re" nyangnu" da" phung: gung moo to" too" byid: uri byumyu" yigi ngoo ASEING wigi Israela byumyu" ri nga" da" byumyu" bui" wa shid re" khyen: yu ziri se' loo goo" wa.