Read Lashi EZEKIEL 4 Bible Online

EZEKIEL 4 - Lashi bible

EZEKIEL 4

¹Mangsoo tid zigi «Shid: se' da" byu we"- zhoothung" da thung" yu wigi re" shidkhoin" moo too" we'. Houg: lho: hau: adang moo thau" khyeing" wigi Yerusalem voomoo" lhid" tuang we'.

²Hau: thang: hau: ziri vang: lheing to" asoo" khyo" hau: lheing khoem dangain" ri gadug joem myid boem" joem dab joem seig thung" moo" zeing joem ri we' lhid" tuang to" we'.

³Jo, to' pyi" dapyi" ri yu wigi nang yo' voomoo" agyoo: moo vang yhang: ti" zhug too" we'. Voomoo" shoid khyoo: myonhoo: shu: we'. Hau: ziri vang: to" wigi nang gi hau: ziri vang: lheing too" su: nghoid. He: zigi Israela byumyu" yi shid re" alhoo: nghoid.

⁴«Hau: thang: re" lo, kung" shoid khyo" leung jo, we'. Houg: lho: ngoo gi re" adang moo Israela byumyu" yi da" yooboo ri foin: too" wa. Nang gi houg moo 390 nyid" nyid nyid wa wigi kyi" khyeug kham zoo: wa. Ciwim gari nyangnu" yooboo gang mo nghoid. Ngoo nang ri dang: phyed too" bye: da" nyangnu" yooboo gi neing: thang danyid" gi dazain nghoid wa.

⁶Nang hau: ziri bain lang" re" lo, yo shoid khyo" doem jhang" to" wigi kyi" khyeug kham zoo: we'. Ciwim gari myid: xi: nyid" shid re" Yuda da" yooboo dam nghoid. Danyid" shid re" nyangnu" yooboo dazain nghoid.

⁷«Yerusalem vang: lheing to" ziri zhug yu" nyid we'. Voomoo" moo re" lo, zhoeb lhei" shug wigi hau: ziri thougtheung lapi: pi: we'.

⁸Ngoo nang ri tei" to" wigi vang: lheing to" zi abei: atho' dashoid mo zi dashoid khyoo: ayo" lheing: phug wa.

⁹Akhid" sungsoo:- Yoono,- shi" gyang:- nug- nhoo" yo' vhoo" dajhi ri yu we'. Hau: joem dangain" ziri dage" lheig lho: zooyho' koid we'. Hau: zigi nang lo, kung" shoid khyo" yhoeb jo, da" 390 nyid" gu: moo zoo: wa zi nghoid.

¹⁰Nang gi danyid" ri zooyho' 5 rung yo" zoo: wa. Hau: zigi thang: nyid" ju" sho' shid re" nghoid.

¹¹Nang gi gyid ri we' danyid" ri eig koem: tu' lho: shug ca" wa zi nghoid.

¹²Nang gi yugkhang" moo" yo" myang da" joyoo moo byu xangsu: khyid" kyug yo' myi: moid wigi hau: myi: moo zooyho' ri kang: lho: zoo: we'.

¹³ASEING gi «He: alhoo: gi ngoo Israela byumyu" yiri tungbau mung" khyoo: khaid sain" kaid uri tarha" yo' toem' to" da" zoo: noem ri Israela byumyu" yi zoo: ca" da alhoo: nghoid.

¹⁴Nghoid loug we' ngoo doem phug tid zigi «Anghoid wa yoem: moo" bo ASEING we"- ngoo gi ngoonya: gung ri aco' ajhoid akoid yu". Ngoo zooshang: yo, mo nyang: za: shid: lo" da" gougnyhoug shoo"- gougnyhoug lam" wigi ngaid said da" gougnyhoug shoo" ri azo: lo yu". Ngoo gi ayung" alho' ein: myid jho: da" zoo: noem ci: ri we' khanham we' azo: yu"» ein: tid bye:.

¹⁵Houg: yoomo Mangsoo gi «Gi bye: ngoo gi hau: gungthid nukhyid" ri ci: nhang: wa. Hau: adang moo nang zooyho' kang: zoo: wa zi nghoid» ga: tid.

¹⁶Nyang: gi xo' lho: «Shid: se' da" byu we"- ngoo gi Yerusalem shid re" zoo: yho' pang" thoug ziri phyed pyam byid: loo: wa. Houg: moo nyid da" byumyu" yigi nyangnu" zo: da" zoo: noem yo' nyangnu" shug da" gyid ri leug uri nheigloem: thang wigi seing" kho" loo goo" wa.

¹⁷Nyangnu" zooyho' yo' gyid thang lo" byug goo" wa. Nyangnu" nheigloem: thang loo goo" wa. Houg: lho: nyangnu" yooboo gang mo nyangnu" she: pyam pyam zi shoug" wa.