Read Lashi EZEKIEL 40 Bible Online

EZEKIEL 40 - Lashi bible

EZEKIEL 40

¹Ayo, gi ngoonu" ri pyoung" shu" loo" shoug" thang: eig xe: wim: zain ein: zain- Yerusalem ri lhoid yu pyam thang: daxe: myid: zain ein: zain- zain seig khyab lhammoo" xain" daxi: nyid" nyid" nghoid da:. Hau: bidnyid moo ngoo gi ASEING shidkhoin" mo yoem: so' moo" boo thui: ri shoug" kham' zo: wigi nyang: gi ngoo: ri shu" yhe: lo" da:.

²Yoeb myang daloem: moo: Mangsoo gi ngoo ri Israela mougmyid khyoo: shu" lo" lho: ngoo ri myhang: da" boem daloem moo lo" nyhid: to" da:. Ngoo gi nga" shidkhoin" mo voomoo" yo' du da" yhoem: joem ri shau" myang.

³Nyang: gi ngoo ri je tab tab shu" yhe: wigi gyid: mid" yhang: ti" bang jo, da" byu dayug ri myang. Nyang: gi zin: yung" pain" laki tei" dakhaid yo' laki' dayang: daloem: ci lho: khoem" moo" yam moo yab jo, da:.

⁴Nyang: gi ngoo ri «Shid: se' da" byu we"- zung" yu nyid we'. Goolhoo' za: tam" gyo: wigi nang ri ngoo toin" shed da" ja: khang" moo" ri tab za: yu" ci: we'. Ciwim gari he: zi shid re" nang ri hid: khyoo: shu" lo zi nghoid. Nang gi Israela byumyu" yiri nang shau" myang zi ja: khang" moo" ri tid kyoo" ca" wa nghoid da» ga: tid da:.

⁵Ngoo shau" myang zigi Noku Yhoem: Moo" nghoid da:. Hau: aqei: ayam goem sho' moo vang khyam: kyam' to" da:. Hau: byu gi 10 pi: sheing: da" laki ri yu wigi vang ri ke' yu" da:. Hau: zigi 10 pi: myhang: wigi 10 pi: thu: da:.

⁶Hau: thang: nyang: gi bidthu shoid khyoo: myonhoo: shu: to" da" khoem" moo" khyoo: yhe: lo" da:. Nyang: gi zoem" lhang: khyo" do, lo" wigi atho' mo vang khoem" moo" duang: ri ke' yu" da:. Hau: zigi 10 pi: no, da:.

⁷Hau: zi lid thang: ri so" lid: wa khyoo: dakhaid duang da:. Hau: khyoo: eig shoid goin" moo lhoug zung" bang: da" yab soem" loem: loem: jo, da:. Yab khang" moo" gi myid: jhoin: bo lho: shoid khang" moo" 10 pi: bo da:. Hau: joem dayab yo' dayab agyoo: mo pyiyam joem gi 8 pi: thu: da:. Lhoug zung" bang: yab joem mo lid: lo" ri 10 pi: bo da" khyoo: dakhaid jo, da:. Hau: khyoo: gi Noku Yhoem: Moo" khyoo: myonhoo: shu: to" da" vang loo" yab khyoo: yhe: da" khyoo: nghoid.

⁸Nyang: gi hau: yab ri ke' yu" wigi hau: zi 14 pi: myhang: ziri shau" myang da:. Hau: zigi Noku Yhoem: Moo" yo' jhang thang da" shoid mo khoem" duang: nam moo jo, wigi goo" thang: shoid mo pyi yam gi 4 pi: thu: da:.

⁹

¹⁰(Hau: khyoo: eig shoid goin" moo: jo, da" lhoug zung" yab joem gi dayi" za: nghoid wigi hau: yab joem da" agyoo: mo pyiyam joem we' dayhang: ti" za: thu: ago")

¹¹Hau: thang:- hau: yug gi vang khyam: khoem" mo lid: nyid khyoo: ri apyi: khyo" doem ke' da:. Hau: zi gi 22 pi: rua wigi khoem" duang: agyoo: moo gi 16 pi: rua da:.

¹²Lhoug zung" bang: yab loem: khang" moo" da" shidkhoin" moo lo, 20 shi" myhang: wigi lo, 20 shi" thu: da" pyiyam nyhoem: daloem: loem: yam to" ago". (Hau: yab joem gi shoid khang" moo" 10 pi: bo wigi myid: khyoug: nghoid da:.)

¹³Hau: thang: nyang: gi yab dayab da" nungthang shoid pyiyam mo zi khyoo: dashoid moo jo, da" yab nungthang shoid pyiyam ri ke' yu" da:. Houg: lho: hau: zigi 42 pi: sheing: da:.

¹⁴Lo" thang yab gi shava jang: khyoo: thu lo" da" joyoo moo jo, da:. Nyang: hau: yab ri ke' yu" wigi 34 pi: lam ziri shau" myang yu da:.

¹⁵Khoem" moo" tung: gung shoid pyiyam mo zi lo" thang yab ve: thang da" shoid moo ju" sho' hau: khoem" moo" khyoo: dangain" gi 84 pi: bo da:.

¹⁶Yab joem dangain" da" tung: gung shoid pyiyam joem moo duang: ngi joem dab da:. Houg: lho: akhoug: shoid yab joem agyoo: mo pyiyam joem moo we' dab ago". Lid: phyid lo" da" khyoo: shoid shu: da" akhoug: shoid mo pyiyam joem moo thab gam soolhoo: joem kyung" thuang" tab to" ago".

¹⁷Byu hau: yug gi ngoo ri vang khyam: khoem" khyo" zi shava jang: khyoo: shu" yhe: lo" da:. Tunggung shoid pyiyam yo' nungthang phug wigi yab soin" koid to" da:. Houg: lho: hau: yab joem shidkhoin" moo gi lug myhu" da" joyoo daloem: jo, da:.

¹⁸Hau: joyoo gi shava jang: lheing khoem ju" sho' xo' lo" da:. Tunggung shoid mo shava jang: gi yab khoug: shoid shava jang: tho' je nyhoem: da:.

¹⁹Akhoug: shoid shava jang: khyoo: yhe: da" khoem" duang: gi je: myhang: da" ke' moo jo, da:. Hau: yug gi khoem" duang: eig loem: agyoo: moo ke' yu" da:. Hau: zigi 168 pi: kyoo: go" da:.

²⁰Hau: byu gi mougzhung: shoid moo jo, da" khoem" moo" ri ke' yu" da:. Hau: khoem" moo" gi shava jang: tunggung shoid khyoo: yhe: zi nghoid.

²¹Houg khyoo: lid: yhe: da" khyoo: eig shoid goin" moo lhoug zung" yab soem" loem: loem: jo, da:. Hau: yab joem dangain" agyoo: moo pyiyam joem bo da:. Vang lo" da" khoem" duang: nam mo yab dangain" gi bidthu shoid vang khyam: khoem" mo yab yo' dakhyo" za: nghoid da:. Vang khoem" duang: sheing: khyoo: dangain" zi 84 pi: sheing: wigi pyi: khyoo: 42 pi: bo da:.

²²Vang lo" yab- bangzoo: khoem" joem yo' thab gam soolhoo: thuang" tab to" khyoo: gi bidthu shoid moo khoem" moo" yo' dakhyoo" kyeing" za: nghoid da:. He: joyoo moo khoem moo" ju" shoid zoem" lhang: nyhed khoem: dab da:. Hau: vang lo" shoid mo yab gi shava jang: shoid khyoo: yeing to" da" lo" thang joyoo moo jo, da:.

²³Shava jang: ri lid: phyed lo" da" mougzhung: shoid khoem" moo" shava jang: akhoug: shoid khyoo: ju" da" gootu: khoem" moo" gi bidthu shoid mo khoem" moo" yo' du go" da:. Hau yug gi khoem" moo" eig loem: mo agyoo: ri ke' yu ri 168 pi: bo da:.

²⁴Hau: thang:- Hau: yug gi ngoo ri mougpyi: shoid khyoo: shu" yhe: lo" da:. Houg: moo khoem" moo" duang: daloem: jo, ziri shau" myang nyang: gi hau: da" akhoug: shoid pyiyam yo' vang lo" da" yab ri ke' yu" da:. Hau: joem gi gootu: yo' dakhyo" za: nghoid ago".

²⁵He: khoem" duang: mo yab joem gi gootu: yo' dakhyoo" za: bangzoo: khoem" joem dab ago". Vang khoem" duang: sheing: khyoo: dangain" gi 84 pi: bo wigi pyi: khyoo: 42 pi: bo da:.

²⁶Hau: jang" khyoo: zoem" lhang: nyhed khoem: do, ca" da:. Hau: da" vang lo" yab gi shava jang: shoid khyoo: myonhoo: shu: da" athang: moo jo, da:. Lid: phyid lo" da" khyoo: shoid mo pyiyam joem mo thab gam soolhoo: kyung" tab to" ago".

²⁷Hid: moo we' shava jang: akhoug: shoid khyoo: ju" lo" da" khoem" duang: daloem: jo, da:. Hau: yug gi khoem" duang: eig loem: agyoo: ri ke' yu" wigi hau: zigi 168 pi: bo da:.

²⁸Byu hau: yug gi ngoo ri mougpyi: shoid khoem" duang: khyo" wigi akhoug: shoid shava jang: khyoo: shu" lo" da:. Nyang: gi hau: khoem" duang: ri ke' yu" ri hau: zigi tunggung shoid pyiyam mo khoem" duang: yhi' nghoid da:.

²⁹Houg: ri lhoug zung" bang: da" yab joem vang lo" yab yo' akhoug: shoid pyiyam joem gi gootu: vang khoem" moo" yo' dakhyo" za: nghoid da:. Hau: khoem" duang: mo yab joem moo we' bangzoo: khoem" joem dab da:. Hau: zi sheing: khyoo: dangain" zi 84 pi: bo wigi pyi: khyoo: 42 pi: bo da:.

³⁰

³¹Hau: da" vang lo" yab gi gootu: shava jang: khyoo: myonhoo: shu: to" wigi lid: phyed khyoo: shoid mo pyiyam cang thab gam soolhoo: joem thuang" lhid" to" da:. He: khoem" duang: moo" khyoo: zoem" lhang: shed khoem: koid to' to" da:.

³²Byu hau: yug gi ngoo ri bidthu shoid khoem" moo" duang: khyo" wigi akhoug: shoid shava jang: khyoo: shu" lo" da:. Nyang: gi khoem" duang: ri ke' yu" ri hau: zigi gootu: yo' du go" ziri shau" myang.

³³Hau: da" lhoug zung" bang: yab joem hau: da" vang lo" yab yo' akhoug: shoid pyiyam joem ke' yu" ri gootu: khoem" moo" joem yo' du go" da:. Hau: lheing khoem mo bangzoo: khoem" joem dab boem wigi vang lo" yab moo we' dab da:. Sheing: khyoo: dangain" zi 84 pi: bo wigi pyi: khyoo: 42 pi: bo da:.

³⁴Vang lo" yab gi tunggung shoid shava jang: khyoo: myonhoo: shu: to" da:. So" lid: khyoo: shoid mo pyiyam cang thab gam soolhoo: joem thuang" lhid" to" da:. He: khoem" moo" mo zoem" lhang: shed khoem: koid to" da:.

³⁵Hau: thang: hau: byu gi ngoo ri mougzhung: shoid khoem" moo" khyoo: shu" lo" da:. Nyang: hau: ziri ke' yu ri hau: zigi gooloem: yo' dakhyo" za: du go" da:.

³⁶Hau: joem yo' dayhang: ti"- hau: loem: moo we' lhoug zung" bang: yab joem shoung: yhoung pyam da" akhoug: shoid pyi yam joem vang lo" da" yab yo" lheing khoem moo bangzoo: khoem" joem dab da:. Hau: da" sheing: khyoo: 84 pi: bo wigi pyi khyoo: 42 pi: bo da:.

³⁷Vang lo" da" yab gi tunggung shoid shava jang: khyoo: myonhoo: shu: to" da:. Lai phyid lo" da" shoid mo pyi yam cang thab gam soolhoo: joem thuang" lhid" tab to" da:. Hau: khoem" moo" moo zoem" lhang: shed khoem: koid to" da:.

³⁸Tunggung shoid shava jang: moo mougzhung: shoid mo khoem" moo" duang: yo' xo' go" to" da" yab nu" dayab jo, da:. Hau: zigi shava jang: khyoo: myonhoo: shu: to" da" vang lo" yab khyoo: phang to" zi nghoid. Hau: joyoo moo du: goin" goin" nghe' ngei" da" gougnyhoug mang joem ri nyangnu" cid" boem ago".

³⁹He: vang lo" yab moo" moo zoobui" myid: loem: jo, da:. Dashoid khyoo: eig loem: loem: to" to" da:. Hau: zoobui" moo du: goin" nghe' ngei" da" xoin" nghoid nghoid- yooboo shid re" xoin" nghoid nghoid- doem xab da" xoin" nghoid nghoid- xoin" ngei" wa shid re" nyangnu" gougnyhoug ri said ago".

⁴⁰Hau: yab da" tunggung shoid moo du go" da" zoobui" myid: loem: jo, da:. Mougzhung: shoid khoem" moo" vang lo" da" yab moo dashoid eig loem: loem: jo, da:.

⁴¹Houg: moo xoin" ngei" byid: wa da" gougnyhoug joem ri said wa shid re" ke" da" zoobui" dangain" shed loem: nghoid da:. Myid: loem: gi yab akhoug: shoid mo nghoid wigi myid: loem: gi tunggung shoid shava jang: moo jo, da:.

⁴²Yab zoo: khoug: mo zoobui" myid: loem: gi lugzeing ri kho' lho: koid to" zi nghoid wigi du: goin" nghe' ngei" wa xoin" du: so' koid uri ci: zi nghoid. Hau: joem gi lo, 20 shi" myhang: wigi atho' gi myid: zoin" goin" lo, 30 shi" bo da:. Xoin" du: gougnyhoug ri said da" uri ci: da" zi joem dangain" ri we' hau: zoobui" joem atho' moo to" to" ago".

⁴³Zoobui" joem da" azoin" moo lo, 3 shi" bo da" akhoem' goem: sho' dab da:. Xoin" ngei" byid: wa shoo" dangain" ziri hau: zoobui" joem atho' moo ke" to" ago".

⁴⁴Hau: thang: nyang: gi ngoo ri akhoug: shoid shava jang: khyoo: shu" lo" da:. Akhoug: shoid shava jang: moo khoem" phang to" da" yab eig loem: jo, da:. Dayab gi mougzhung: shoid khoem" moo" nam moo mougpyi: shoid khyoo: shu: wigi jo, da:. Gootu: dayab gi mougpyi: shoid khoem" moo" nam moo mougzhung: shoid khyoo: shu: wigi jo, da:.

⁴⁵Hau: yug ngoo ri tid. ‹Hau: mougpyi: shoid khyoo: myonhoo: shu: to" da" yab gi Noku Yhoem: Moo" ri dei byid: nyid da" khainjung shid re" nghoid.

⁴⁶Mougzhung: shoid khyoo: myonhoo: shu: da" yab gi phoin: moo dei byid: da" khainjung yi shid re" nghoid da› ga: tid. Khainjung yi dangain" bang: gi Zadog mo ko' gyoo" loo bang: nghoid. Nyangnu" gi ASEING da" shidkhoin" moo nyang: ri dei byid: wa shid re" akhang" yo" da" Levi vang: nghoid ago".

⁴⁷Hau: byu gi akhoug: shoid shava jang: ri ke' yu" ri sheing: khyoo: pyi: khyoo: 168 pi: bo da:. Noku Yhoem: Moo" gi bidvang shoid moo jo, da:. Hau: shidkhoin" moo phoin: daloem: jo, da:.

⁴⁸Hau: thang: nyang: gi ngoo ri Noku Yhoem: Moo" da" vang lo" khoem" duang: yab khyoo: shu" yhe: da:. Nyang: gi hau: vang lo" da" khoem" duang: yab ri ke' yu" da:. Hau: zigi 9 pi: no, wigi 24 pi: lam: da:. Pyiyam eig shoid goin" zi 5 pi: thu: da:.

⁴⁹Vang lo" khoem" moo" yab ri 34 pi: rua wigi 20 pi: myhang: da" zoem" lhang: koid to" da:. Vang lo" khoem" moo" yab dashoid moo dazeing zeing- zeing bung: eig loem: jo, da:.