Read Lashi EZEKIEL 41 Bible Online

EZEKIEL 41 - Lashi bible

EZEKIEL 41

¹Hau: thang: hau: yug gi: ngoo ri agung mo yab gyeung" shang: da" joyoo khyoo: shu" lo" da:. Nyang: gi hau: yab khyoo: vang lo" da" khyoo: ri ke' da:. Hau: zigi 10 pi: myhang: wigi

²18 pi: rua da- eig shoid goin" mo pyiyam gi 8 pi: thu: da:. Nyang: gi hau: yab ri nyang: nyang: ke' yu" da:. Hau: zigi 68 pi: sheing: wigi 34 pi: rua da:.

³Hau: thang: nyang: gi akhoug: shoid lo" thang yab khyoo: yhe: lo" da:. Nyang: gi hau: yab khyoo: vang lo" da" khyoo: ri ke' yu" da:. Hau: zigi 3 pi: no, wigi 10 pi: rua da:. Eig shoid goin" mo pyiyam joem gi 12 pi: thu: da:.

⁴Nyang: gi hau: yab ri nyang: nyang: ke' da:. Hau: zigi shoid khang" moo" bo da:. He: yab gi agung yab mo lid: lo" jang" moo jo, da:. Hau: thang: nyang: ngoo ri tid zigi «Gyeung" shang: thang da" yab nghoid» ga: tid kyo".

⁵Byu hau: yug gi: Noku Yhoem: Moo" akhoug: shoid pyiyam khayhi' thu: ziri ke' yu" da:. Hau: zigi 10 pi: bo da:. Noku Yhoem: Moo" lheing khoem pyiyam tunggung shoid moo 7 pi: lam: da" yab zoo: joem koid jen to" da:.

⁶Hau: yab nu" joem gi soem" pyam: dab wigi dapyam: moo soem" xi: yab bo da:. Pyam: khang" moo" moo Noku Yhoem: Moo" tunggung shoid pyiyam joem gi hau: vhoo: mo pyam: pyiyam tho' je po" do, lo" ago". Houg: yoomo hau: yab joem gi pyiyam moo azhug too" loo: yo" zhung: to" ago".

⁷Houg: yoomo Noku Yhoem: Moo" pyiyam joem gi tunggung shoid khyo" yu" kaid ri adang shoid lo" thang pyam: ju" sho' dakhyo" kyeing" thu: do, lo" yhang: ti" shau" myang da:. Noku yhoem: moo" nungthang shoid pyiyam moo nghe: wigi koid to" da" yab nu" joem da" tunggung shoid moo zoem" lhang: rua eig loem: koid to" da:. Hougsu" yoomo vho: pyam: khyo" agung pyam: yo' atho' mo pyam: joem khyoo: yo" do, lo" da:.

⁸He: yab nu" joem da" tunggung shoid pyiyam joem gi 8 pi: thu: da:. Noku Yhoem: Moo" da" mougzhung: shoid moo yabnu" joem khyoo: yhe: da" khoem" duang: daloem: jo, da:. Houg: lho: mougpyi: shoid moo daloem: jo, da:. Ngoo gi Noku Yhoem: Moo" goem: sho' moo 8 pi: rua da" gyam" thang: daloem: jo, ziri shau" myang. Hau: zigi myidgung mo zi 10 pi: myhang: jang" moo jo, wigi Noku Yhoem: Moo" pyiyam joem zhug to" da" apoem: ayang: yo' dayi" nghoid da:. Gyam" thang: yo' khainjung yi ci: da" yab agyoo: Noku Yhoem: Moo" ayam lheing khoem lho: 34 pi: lam: da" joyoo akoem: jo, da:.

¹²Noku Yhoem: Moo" bid vang shoid joyoo akhoem: da" lo" thang du moo 150 pi: sheing: wigi 116 pi: lam: da" yhoem: moo" daloem: jo,. Hau: yhoem: da" pyiyam lheing khoem dangain" gi 9 pi: thu: da:.

¹³Hau: yug gi noku yhoem: moo" tunggung shoid ri ke' yu" da:. Hau: zigi 168 pi: sheing: da:. Houg: lho: Noku Yhoem: Moo" nungthang shoid joyoo akoem: mo zi bidvang shoid ve: thang athang: moo ju" sho' 168 pi: kyoo: go" da:.

¹⁴Noku Yhoem: Moo" shidkhoin" mo eig shoid goin" moo jo, da" joyoo akoem: bo bo ri 168 pi: bo da:.

¹⁵Nyang: gi Noku Yhoem: Moo" da" sheing: khyoo: eig shoid goin" mo gainbyam: bo wigi bidvang shoid moo ke' yu" ri we' 168 pi: bo da:. Noku Yhoem: Moo" mo vang lo" yab- Gyeung" shang: joyoo yo' Gyeung" shang: thang da" joyoo gi

¹⁶phyang" gung mo zi bangzoo: khoem" ju" sho' seig pyi" yo' zhug to" da:. He: bangzoo: khoem" joem ri yo" nghoeb pyam da:.

¹⁷Khoem" joem tho' myhang: sho' koid to" da" Noku Yhoem: Moo" akhoug: shoid pyiyam gi thab gam joem yo' dung dab dei noem joem soolhoo: ri byeung" sho' kyung" tab to" da:. Dayab goin" goem: sho' thab gam dagam houg: thang: dung dab dei noem dadu: khyo" daloem: kyoo: gi gi dab boem ago". Dung dab dei noem du: khang" moo" moo myonhoo: eig loem: loem: dab da:.

¹⁹Thab gam shoid khyoo: shu: da" xangsu: byu myonhoo: daloem: yo' gootu: dashoid mo seiggam khyoo: shu: to" da" khangkhyi myonhoo: daloem: nghoid da:. Pyi: yam dangain" jang" moo hougsu" dab jo, da:.

²⁰Hau: zigi phyang" gung mo zi khoem" atho' moo ju" sho' nghoid da:.

²¹Gyeung" shang: joyoo mo khoem" bung joem gi myid: phang" zeing nghoid da:. Gyeung" shang: thang da" joyoo shoid khoin" moo seig thi" phoin: yhang: te" zi daja: jo, da:.

²²Hau: zigi 5 pi: myhang: wigi 4 pi: gyi: da:. Hau: ajhoin: mo dung" zeing joem dangain" gi seig wigi koid to" zi nghoid da:. Hau: yuggi: ngoo ri «He: zigi ASEING da" shidkhoin" moo jo, da" zoobui" nghoid da» ga: tid.

²³Gyeung" shang: joyoo khyoo: yhe: da" khyoo: athang: moo khoem" duang: daduang: jo, da:. Houg: lho: gyeung" shang: thang joyoo khyoo: ju" da" khyoo: lo" thang shoid moo we' khoem" duang: daloem: jo, da:.

²⁴Hau: joem gi khoem" khyab eig loem: dab wigi agung khyo" bang" lo" da:.

²⁵Pyiyam moo yhang: ti" gyeung" shang: joyoo mo khoem" joem moo we' thab gam joem yo' dung dab dei noem soolhoo: joem kyung" tab lhid" to" ago". Yhoem: pain' yab moo dab da" khoem" duang: tunggung shoid moo seig thi" wigi nghoeb to" da:.

²⁶He: yab da" ayam shoid moo bangzoo: khoem" joem dab da:. Houg: lho: hau: pyiyam joem moo thab gam soolhoo: joem yo' shoung: yhoung tab to" da:.