Read Lashi EZEKIEL 42 Bible Online

EZEKIEL 42 - Lashi bible

EZEKIEL 42

¹Hau: thang: hau: yug gi: ngoo ri tunggung shoid shava jang: khyoo: shu" yhe: wigi Noku Yhoem: Moo" mougzhung: shoid- Noku Yhoem: Moo" da" bidvang shoid lo" thang athang: yhoem: yo' ave: da" yhoem: daloem: khyoo: shu" lo" da:.

²He: yhoem: gi 168 pi: sheing: wigi 84 pi: lam: da:.

³Hau: yhoem: da" dashoid gi Noku Yhoem: Moo" azoo" ri cang wigi 34 pi: lam: da" joyoo akoem: shoid khyoo: myonhoo: yeing to" da:. Gootu: dashoid gi tunggung shoid shava jang: gyam" thang: khyoo: myonhoo: shu: to" da:. Hau: zigi soem" ki khyo' wigi koid to" zi nghoid wigi ki' khang" moo" gi vhoo: mo ki' tho' je wigi thang: khyoo: ze thu' lo" da:.

⁴He: yhoem: da" mougzhung: shoid moo vang khyam: khoem" joem jo, wigi 16 pi: lam wigi 168 pi: sheing: da" lid: phyed khyoo: dakhaid jo, da:.

⁵Hau: yhoem: da" adang pyam: mo yab joem gi hau: vhoo: mo agung ki' yo' nyhoem: thang da" ki' mo yab joem tho' je nge byug da:. Ciwim gari hau: azhang joem ri thang: khyoo: zoid lho: koid to" zi nghoid.

⁶Soem" ki' goin" mo yab joem gi gyam" tho' moo zhug to" wigi shava jang mo yhoem: gooloem: yhang: ti" zeing bung joem wigi athug too" nghoid ago".

⁷Hau: yhoem: da" vho: ki' tunggung shoid pyiyam gi 84 pi: bo wigi yhoem: da" agung dayi" thu: da:. Yab joem gi deing da" 84 pi: khoug: moo bo da:. Tho' mo lo" thang pyam: gi yhoem: byeung" sho' yab joem koid to" da:.

⁹Hau: yhoem: moo" da" bidthu shoid lo" thang moo jo, da" vhoo: mo yab moo shava jang: da" pyiyam ri koid shid" to" wigi hau: jang" moo tunggung shoid shava jang: khyoo: thu yhe: da" khoem" moo" jo, da:. Noku Yhoem: Moo" da" mougpyi: shoid- Noku Yhoem: Moo" bidvang shoid athang: moo jo, da" yhoem: moo" yo' atung" ve: jang" moo hau: yhoem: moo" yo' du go" da" yhoem: daloem: jo, da:.

¹¹Hau: yab moo" joem shidkhoin" moo mougzhung: shoid mo lid: phyed wa khyoo: yhang: te" zi nyang: jo, da:. Hau: zigi dayhang: ti" lam da" void lhoo: du go" da" daja: kyeing" da" khoem" moo" jo, da:.

¹²Yhoem: moo" da" mougpyi: shoid vhoo: mo yab moo khoem" daloem: bo da:. Hau: bidthu shoid athang: moo vang khyam: koid shid" lo" da:.

¹³Hau: yug gi ngoo ri tid zigi «Hau: yhoem: eig loem: goin" zi gyeung" shang: da:. Hau: yhoem: joem akhoug: khyoo: ASEING da" shidkhoin" moo khainjung yi vang yhe: wigi gyeung" shang: thang da" xoin" ri zo: ago". Hau: yab joem gi gyeung" shang: yoomo khainjung yigi hau: joyoo moo gyeung" shang: thang xoin" joem nghoid da" shivoo: xoin" joem yooboo shid re" xoin" anghoid lang" doem xab da" xoin" joem ri to" ago".

¹⁴Khainjung yigi Noku Yhoem: Moo" khoug: moo yhe: nyid uri tunggung shoid shava jang: khyoo: thu loo" noug lang" ASEING ri nyangnu" dei byid: uri void da" gyeung" shang: byimi joem ri he: yab joem moo to" too" khoo' ca" ago". Nyangnu" gi byu phung: yi zeing: foem: nyid da" joyoo khyoo: athu loo" shi" ri byimi gootu: ri thid void ca" da:.

¹⁵Hau: yug gi Noku Yhoem: Moo" athang: shoid joyoo cang bain ki' lang" nyang: gi ngoo ri bidthu shoid khoem" moo" khyo" shu" thu lo" wigi hau: joyoo tunggung shoid ri ke' yu" da:.

¹⁶Nyang: gi laki' ri yu wigi bidthu shoid ri ke' yu da:. Hau: zigi 840 pi: bo da:.

¹⁷Hau: thang: nyang: gi mougzhung: shoid- mougpyi: shoid- bidvang shoid gu: ri ke' yu da:. Shoid khang" moo" gi dayhang: ti" za: 840 pi: bo da:.

²⁰Houg: lho: vang khyam: shoid khang" moo" moo 840 pi: bo ziyo' kyam' lheing to" da:. Hau: vang joem gi gyeung" shang: ziyo' agyeungshang: ziri kho' too" wa shid re" nghoid da:.