Read Lashi EZEKIEL 43 Bible Online

EZEKIEL 43 - Lashi bible

EZEKIEL 43

¹Hau: yug gi: ngoo ri bidthu shoid khyoo: shu: to" da" khoem" duang: moo" khyoo: shu" lo" da:.

²Houg: lho: hau: joyoo moo Israela da" Mangsoo shidkhoin" mo yi: yi: bang da" bidbang gi bidthu shoid khyo" ju" re" ziri ngoo shau" myang. Mangso da" thui: gi panglai: being lhung" myeing yhang: ti" myeing da:. Houg: lho: mougmyid ri yi: yi: bang da" bidbang ri ci: shug byid: da:.

³He: yoeb myang gi Yerusalem ri phyo' shoin' pyam wa shid re" Mangsoo ju" re" uri ngoo shau" myang da" yoeb myang yo' du da:. Houg: lho: hau: zigi Kheba gyid lang yam moo ngoo shau" myang da" yoeb myang nghoid da:. Hau: thang: ngoo gi nga" myonhoo: myidgung khyoo: goeb jo, bye:.

⁴Yi: yi: wim da" bidbang gi bidthu shoid khoem" khyo" lid: lo" lho: Noku Yhoem: Moo" khyoo: yhe: lo" da:.

⁵ASEING da" Venyi: gi ngoo ri tu: to' yu wigi ngoo ri akhoug: shoid shava jang: khyoo: shu" lo" da:. Hau: joyoo moo Noku Yhoem: Moo" moo ASEING da" phung" yoeb byeung" jo, ziri shau" myang.

⁶Byu hau: yuggi nga" nam moo yab jo, wigi ASEING gi Noku Yhoem: Moo" khoug: khyo" ngoo ri dang: tid da:.

⁷Hau: zigi «Shid: se' da" byu we"-he: zigi nga" zhungtang nghoid. Ngoo gi hid: moo Israela byumyu" yi phung: gung moo nyid lho: nyangnu" ri apyaid atoo: moo vhoeb nyid wa. Israela byumyu" yi yo' nyangnu" da" khokham yi gi: yu phara" joem ri no' khyo" we' khokham shid: mang joem ri myang da" joyoo moo no' khyo" we' nga" da" gyeung" shang: myeing khyang" ri ngi: adoem yoem" nhang: loo goo" wa.

⁸Khokham yigi nyangnu" da" khokham kho" mo khoem" joem yo' khoem" bung joem ri nga" Noku Yhoem: Moo" mo khoem" joem yo' khoem" bung joem yo' veing" veing" moo koid too" yoomo ngoonu" agyoo: moo pyiyam daloem: za: dakyo: da:. Nyangnu" gi nyangnu" koid da" aco' ajhoid moo" joem dangain" gang mo nga" da" gyeung" shang: myeing ri ngi: yoem" nhang: ago". Houg: yoomo ngoo gi nga" da" nheig yo: zi wigi nyangnu" ri phyo' shoin' pyam bye:.

⁹Akhid" nyangnu" gi yu phara" joem ri no' nyid ziri theing: pyam ca" wigi nyangnu" da" khokham yi shid: mang joem ri yu pyam ca" ago". Nyangnu" hougsu" koid pyam boem nghoid ri ngoo gi nyangnu" phung: gung moo apyaid atoo: nyid nyid wa» ga: tid da:.

¹⁰Houg: lho: ASEING doem tid zigi «Shid: se' da" byu we"- Israela byumyu" yiri Noku Yhoem: Moo" khyoo: ri tid kyoo" we'. Houg: lho: nyangnu" gi hau: akyoo" ri yung to" khyoo: ri zhang: yu nhang: we'. Nyangnu" gi nyangnu" da" yooboo shoid moo" yoomo sho' phu" boem goo" baja".

¹¹Hau: thang: nyangnu" gi nyangnu" koid lid: lo ziri myid sho' nghoid rigi nyangnu" ri hau: Noku Yhoem: Moo" da" yung to" khyoo: ri sho' kyoo" we'. Hau: void lhoo:- hau: da" vang khoem" duang: yo' thu lo" khoem" duang: joem hau: alhoo:- ja: khang" moo moo: so' koid khang" khyoo:- houg: mo tarha" dangain" yo' thung" ri: joem dangain" ri tid sho' kyoo" we'. He: khyoo: dangain" ri nyangnu" shid re" lhid" too" we'. Houg: lang" nyangnu" gi ja: khang" moo" ri khasu" so' koid khang" to" ziyo' tarha" joem dangain" ri yo" cang boem goo' wa zi nghoid.

¹²He: zigi Noku Yhoem: Moo" da" tarha" nghoid da:. Boem gung lheing khoem mo joyoo dangain" gi younglho' wigi gyeung" shang: da» ga: tid.

¹³He: zigi Noku Yhoem: Moo" ri ke' to" yhang: ti" phoin: ri we' ke' to" zi nghoid. Phoin: apoem: lheing khoem- shoid khang" moo" moo lo, 20 shi" no, wigi lo, 20 shi" lam da" toeb khyoo" lhang" bo da:. Hau: toeb khyoo" lhang" tunggung shoid moo lo, 10 shi" myhang: da" akhoem' dab da:.

¹⁴Phoin: da" je nyhoem: thang da" du gi akhyid: tho' mo 4 pi: myhang: da:. Hau: thang: mo du gi athang: mo lo, 20 shi" goem sho' nge lo" wigi 7 pi: myhang: da:. Hau: thang: mo du we' athang: mo lo, 20 shi" goem: sho' nge lo" da:.

¹⁵He: atho' mo du nghoid da" xoin" nghe' ngei" da" joyoo moo gi 7 pi: myhang: da:. Ajhoin: myid: jhoin: mo akhyoug: joem gi gootu: tho' je myhang: ago".

¹⁶Phoin: atho' gi myid: shoid du go" wigi shoid khang" moo" 20 pi: bo da:.

¹⁷Agung du we' myid: shoid du go" wigi dashoid khyoo: 24 pi: bo da:. Hau: tunggung shoid mo azoin" gi lo, 10 shi" myhang: da:. (Toeb khyoo" lhang" gi lo, 20 shi" lam da:.) Phoin: khyoo: do, lo" da" zoem" lhang: gi bidthu shoid moo dab da:.

¹⁸Yoem: moo" bo ASEING ngoo ri tid zigi «Shid: se' da" byu we"- ngoo tid ziri tam" gyoo: we'. Phoin: ri koid uri nang gi hau: phoin: dang moo xoin" nghe' ngei" byid: da" khyo" wigi we' nghe' ngei" byid: da" gougnyhoug joem da" suid" ri hau: atho' moo pyi: sain" byid: da" khyo" we' hau: phoin: ri shugbyid: ca" da:.

¹⁹Khainjung yigi Zadog kung: mo ko' gyoo" lo da" Levi kung: bang: za: nga" shidkhoin" moo ngoo ri dei byid: wa shid re" yo" ri" bang: nghoid ago". Ngoo yoem: moo bo ASEING gi he: ziri amyeing" byid: too" bye:. Nang gi nyangnu" ri yooboo shid re" xoin" ngei" byid: wa. Nuloo: nu" dadu: byid: ca" da:.

²⁰Nang gi houg: mo suid" dajhi' ri yu wigi phoin: ajhoin: mo khyoug: phyoo" joem moo we' phoin: alaid mo ajhoin: joem moo we' athang: goem sho' moo joid ca" da:. Hid: su" khyo" wigi nang gi phoin: ri kyeing sain' lho: shugbyid: ca" da:.

²¹Nang gi yooboo shid re" yooboo khyoid xoin" khyo" shugbyid: da" nuloo ri yu wigi Noku Yhoem: Moo" tunggung shoid soin koid sain' to" da" joyoo moo moo nghe' ngei" ca" da:.

²²Thang: nyid" nang gi ce: noo dam abo da" coidbaid dadu: ri yu wigi yooboo khyoid shid re" xoin" khyo" shugbyid: ca" da:. Nu: said shugbyid: uri nang koid ziyo' dayhang: ti"- hau: suid" ri yu wigi phoin: ri kyeing sain' pyam ca" da:.

²³Nang hau: ziri bain koid lang" ce: dam adab da" nu: loo nu" dadu: yo' yang loo: nu" dadu: ri

²⁴Nga" jhang: khyoo: ci ri we'. Khainjung yigi hau adang moo xoo" ri du" sain" lho: hau: eig du: ri xoin" khyo" ngoo ri nghe' ngei" byid: ca" da:.

²⁵Nang gi nyhed nyid" goin" moo nyid" khang" nyid"- coidbaid dadu:- nuloo: dadu:- yang loo dadu: ri yooboo khyoid shid xoin" khyo" shugbyid: ca" da:. Hau: gu: dangain" gi ce: noo dam abo da" zi nghoid ca" da:.

²⁶Nyhed nyid" goin" moo khainjung yigi phoin: ri shugbyid: wigi hau: ziri ci: wa jen" jen" soin wigi sain' too" ca" da:.

²⁷Hau: labain lid: lang" khainjung yigi phoin: dang moo byumyu" yi shid re" nghe' ngei" xoin" joem yo' zoem" khau: xoin" joem ri shugbyid: ca" ago". Houg: lang" ngoo gi nanu" dangain" ri vho: ngei wa. Ngoo yoem: moo" bo ASEING tid too" bye:.