Read Lashi EZEKIEL 44 Bible Online

EZEKIEL 44 - Lashi bible

EZEKIEL 44

¹Hau: yug gi ngoo ri Noku Yhoem: Moo" bidthu shoid khoem" moo" tunggung shoid khyoo: shu" thu yhe: da:. Khoem" moo" gi myhid" to" da:.

²Houg: lho: ASEING ngoo ri tid zigi «He: khoem" moo" gi hid su" nyang: myhid" too" wa wigi khanham we' aphang goo" wa. Xangsu: byu kha: yug we' hau: ziri ci: wa akhang" abyid:. Ciwim gari:- ngoo Israela da" ASEING Mangsoo gi houg: khyo" lid: vang yhi: bye:. Hau: zigi hougsu" nyang: myhid" too" ca" da:.

³Nghoid loug we' hau: vhoeb nyid da" khokham nu" gi houg: khyoo: yhe: wigi nga" shidkhoin" moo gyeung" shang: zoo: noem ri zoo: goo" wa. Nyang: gi vang yhe: wigi akhoug: shoid lo" thang mo yab khoem" moo" khyo" doem thu loo wa» ga: tid da:.

⁴Hau: thang: hau: yug gi ngoo ri Noku Yhoem: Moo" shidkhoin"- mougzhung: shoid khoem" moo" khyoo: shu" lo" da:. Ngoo yu" kaid ri ASEING da" Noku Yhoem: Moo" gi nya: shidkhoin" mo yi: yi: bang: da" bidbang gi byeung" jo, ziri ngoo shau" myang da:. Ngoo gi ngoonya: gung ri myidgung khyoo: goeb pid wigi

⁵ASEING ngoo ri tid zigi «Shid: se da" byu we"- nang myang ziyo' nang shau" gyo: gu: ja: khang" moo" ri goolhoo' za: xoem" ci: we'. Ngoo gi nang ri Noku Yhoem: Moo" da" tarha" yo' thung" joem ri tid kyoo" wa. Noku Yhoem: Moo" khoug: khyoo: kha: yug gi vang vang thu thu akhang" yo" wigi khayug gi akhang" ayo" ziri nyeing" za: xoem" too" we'.

⁶Thug theing gyi koid da" Israela byumyu" yiri ngoo yoem: moo" bo ASEING gi nyangnu" koid lid: lo da" aco' ajhoid moo" joem ri xo' wigi ayo" zeing: loo wa khyoo: ri tid kyoo" we'

⁷Nyangnu" gi ngoo ri shugbyid: da" xoin" joem da" xu: yo' suid" ri shugbyid: nyid da" uri ngoo ri aphoug" da" shooyid thang: ayham" da" tungbau byu yiri Noku Yhoem: Moo" khyoo vang nhang: da" khyo" nga" da" Noku Yhoem: Moo" ri ayung" alho' koid pyam byid: da:. Houg: lho: nga" byumyu" yigi nyangnu" koid da" aco ajhoid moo" dangain" khyo" wigi nga" dang: theing ri phyo' pyam abye: go".

⁸Nyangnu" gi: nga" da" Noku Yhoem: Moo" mo laloem lakhoug: yo' sen da" younglho' khyoo: joem ri ayu" coung: nghoid ago". Hau: gungthid- nyangnu" gi tungbau byu yiri yu" coung: nhang: ago".

⁹«Ngoo yoem: moo" bo ASEING gi shooyid thang: ayham" da" tungbau byu kha: yug we' ngoo ri aphoug" da" kha: yug we' nga" Noku Yhoem: Moo" khyoo: ayo" vang yhi: wa. Israela byumyu" yi phung: gung moo nyid da" tungbau byu dayug lang" ayo" vang yhi: wa ein: tid fu" too" bye:»

¹⁰ASEING ngoo ri tid zigi «Ngoo ri to" pyam wigi yu phara" soolhoo: joem ri no' da" gootu: Israela byumyu" yi yo' dage" Levi byu yiri yooboo dam byid: nyid bye:.

¹¹Nyangnu" gi Noku Yhoem: Moo" moo khoem" moo" joem ri yu" coung: wigi Noku Yhoem: Moo" mo moo" jhoem ri zei: da" khyo" ngoo ri dei byid: loo goo" wa. Nyangnu" gi shava byu yi nghe' ngei" xoin" joem shid re" yo' xoin" to' wa shid re" shugbyid: da" gougnyhoug joem ri said lho: nyangnu" gi shava byu yiri dei byid: da" moo" ri yoo voin yu loo goo" wa.

¹²Nghoid loug we' nyangnu" gi Israela byumyu" yi shid re" yu phara" soolhoo: ri no' da" moo" koid lho: hougsu" khyo" wigi shava byu yiri yooboo thoem" khyoo: shu" vang lo" ago". Ngoo yoem: moo" bo ASEING gi nyangnu" ri yooboo dam byid: wa ein: geing: teing tung" dangsoo" too" bye:.

¹³Nyangnu" gi khainjung yi yhang: ti" ngoo ri yo" dei byid: goo" wa anghoid. Nga" shid re" gyeung" shang: khyoo: daja: ja: anam khyoo: yo" tab yhi: wa anghoid. Gyeung" shang: thang da" joyoo khyoo: we' yo" vang yi: wa anghoid. He: zigi nyangnu" koid lid: lo da" aco' ajhoid moo" joem shid re" yooboo dam byid: zi nghoid da:.

¹⁴Ngoo gi nyangnu" ri Noku Yhoem: Moo" mo koid ca" da" moo" azhei' azoo: koid wa moo" foin: wa»

¹⁵Yoem: moo" bo ASEING tid zigi «Hau: Zadog mo byo gyo" lo da" Levi kung: mo khainjung yi koem' gi deing nyid da" Israela byumyu" yi ngoo mo lheing: phug lo" uri Noku Yhoem: Moo" moo ngoo ri jhug zug tung" dei byid: ago". Houg: yoomo akhid" nyangnu" gi ngoo ri dei byid: wigi nga" shidkhoin" moo xoin" mo xu: yo' suid" ri shugbyid: wa shid re" vang loo wa bang: nghoid da:.

¹⁶Nyangnu" gi nga" Noku Yhoem: Moo" khyoo: vang yhe: wigi nga" da" phoin: moo dei byid: ziyo' Noku Yhoem: Moo" moo noku coung" khyoo: ri yo" vhu" shi: wa bang: nghoid.

¹⁷Nyangnu" gi Noku Yhoem: Moo" akhoug: shoid shava jang: khyoo: khoem" moo" khyo" vang yhe: uri nyangnu" gi zin: yung" pain" byimi ri void ca" wa zi nghoid. Nyangnu" gi akhoug: shoid shava jang: moo nghoid nghoid- Noku Yhoem: Moo" moo nghoid nghoid- moo" voin nyid uri yang moug" yo' koid to" da" byimi ciri: we' age void.

¹⁸Hougsu" lang" nyangnu" bakyu" athu wa. Nyangnu" gi zin: yung" pain" vhuthoeb yo' zin: yung" pain" lhoo" sheing: void ca" goo" wa. Nghoid loug we' phyid" cu" age cu" goo" wa.

¹⁹Nyangnu" gi shava byu yi nyid boem da" tunggung shoid shava jang: khyoo: athu yhi: shi" ri Noku Yhoem: Moo" moo nyangnu" moo" voin da" uri void da" byimi joem ri shi" khyoid pyam lho: gyeung" shang: da" yab joem moo too" khoo' ca" ago". Nyangnu" gi nyangnu" da" gyeung" shang: byimi joem wigi shava byu yiri dam tab nyid jang" mo toem' pyam wa shid re" byimi gootu: ri void ca" da:.

²⁰«Khainjung yigi nyangnu" da" vhuloem ri we' age ko' pyam. Xam: sheing: we' age to" too" wa. Nyangnu" gi hau: ziri gi" koo: za: sheing: sho' too" ca" ago".

²¹Khainjung yigi akhoug: shoid shava jang: khyoo: vang loo" wa nghoid lang" zabyid yhid: age shug.

²²Khainjung gi kang" pyam to" da" myiyi: yo' lo, age xo'. Nyang: gi Israela zoomyi: gyeing" anghoid lang" khainjung goo" yug da" cougmoo" ri za: dage yu da:.

²³Khainjung yigi nga" byumyu" yiri gyeung" shang: ziyo' agyeungshang: khyoo:- thung" khyo" younglho' ziyo' ayung" alho' khyoo: shai" goo" ziri kho' wigi jhau" shid byid: ca" da:.

²⁴Yung" do, wigi tid ngeug goo" wa khyoo: thu loo lang" khainjung yigi hau: moo" ri nga" tarha" joem yo' dayhang: ti" dang: phyed byid: ca" ago". Nyangnu" gi nga" tarha" joem yo' thung" joem yo' dakhyoo" ti" laloem lakhoug: pui" joem ri shu" koid ca" da:. Houg: lho: dougnoo bidnyid ri cang ca" da:.

²⁵«Khainjung dayug gi nya: da" myhi' phoo dayug yug- anghoid lang" nya: zoo: yi mo dayug yug- anghoid lang" nya: mang: nya: nhung" dayug yug- anghoid lang" yhoem: ayoo" shi" da" nya: nhammoo" dayug yug shid: jo, ri za: anghoid rigi byu shid: mang ri zang" tain" lho: laloem lakhoug: khyo" ayung" alho' age bui" nhang: nghoid da:.

²⁶Nyangnu" younglho' lo" thang: ri nyhed nyid" lang" ca" da:.

²⁷Houg: lho: Noku Yhoem: Moo" akhoug: shoid shava jang: khyoo: vang yhe: lho: nyang: nya: gung ri kyeing sain' yu wa shid re" xoin" too' byid: ca" da:. Houg: lang" za: nyang: gi Noku Yhoem: Moo" khoug: moo doem yo" dei byid: wa zi nghoid. Ngoo yoem: moo" bo ASEING tid too' bye:.

²⁸«Khainjung yigi Israela byumyu" yiri byu daboin: mo daboin: khyoo: xo' byid: yhe: loo" wa shid re" ngoo byid: to" jang" mo khainjung bui" wa gam boem shoug" yu ago". Nyangnu" gi Israela mung" mo jonu" age seing: goo" wa. Ngoo gi nyangnu" ca" zi dangain" nghoid bye:.

²⁹Shivoo: xoin" joem yooboo khyoid xoin" joem yo' doem xab da" xoin" joem gi khainjung yi da" zoonoem nghoid wa. Houg: lho: nyangnu" gi Israela mung" mo nga" shid re" kho' too" byid: da" ci: nghoid loug we' khab' yu ca" da:.

³⁰Khainjung yigi xang: shi" yhoem" yu da" shivoo: mo ge thang ziyo' ngoo ri shugbyid: da" gootu: ja: khang" moo" ri shoug" kham yu ca" da:. Byumyu" yi zooyho' bung: khang" moo" nyangnu" gi khainjung yiri shi" alu khyo" xang: shi" yo" bung: da" zooyho' ri byid: ca" ago". Houg: lang" nga" mainkaid jeju" gi hau: nyangnu" yhoem: moo jo, jo, wa.

³¹Khainjung yigi nyang: nyang: za: shid: zi anghoid lang" gougnyhoug gootu: wigi ngaid said da" ngho' yo' gougnyhoug shoo" age zoo: goo" wa»