Read Lashi EZEKIEL 46 Bible Online

EZEKIEL 46 - Lashi bible

EZEKIEL 46

¹Yoem: moo" bo ASEING tid- «Akhoug: shoid shava jang: khyoo: vang lo" da" khoem" moo" ri moo" zei: da" bidnyid khyug nyid" ju" sho' myhid" too" ca" da:. Nghoid loug we' Dougno: Bidnyid yo' lhammoo" xain" bidnyid moo gi phang too" ca" da:.

²Mung" vhoeb da" khokham nu" gi tunggung shoid shava jang: mo zi vang lo" yab khoem" moo" khyoo: vang lo" wigi khoem" moo" khoem" bung yam moo yab jo, uri khainjung yigi nya: da" du: goin" nghe' ngei" xoin" ri nghe' ngei" wigi nya: zoem" khoug: xoin" ri shugbyid: ca" ago". Nyang: gi hau: khoem" moo" moo noku coung" wigi doem thu loo" ca" da:. Khoem" moo" gi myen" thang: ju" sho' age myhid" nghoid da:.

³Dougno: Bidnyid khang" moo" yo' lhoo' xain" pui" nyid" khang" moo" shava byu yigi khoem" moo" shidkhoin" moo goeb pid lho: ASEING ri noku ca" da:.

⁴Dougno: Bidnyid moo khokham nu" gi du: goin" goin" nghe' ngei" xoin" khyo" ce: dam abo da" yang nu" khyug du: yo' yang loo: dadu: ri ASEING jhang ci: ri" ca" da:.

⁵Nyang: gi yang loo: du: khang" moo" yo' shivoo: dajoid: jain" bo shugbyid: ca" da:. Yang nu" du: khang" moo" yo' dage" cinghoid loug we' ci: nau ziri ci: ri" ca" da:. Shivoo: xoin" dajoid: jain" khang" moo" moo zhainloin: xu: khyug kug kug boo ca" da:.

⁶Lhammoo" xain" pui" moo: nyang: gi ce: dam abo da" nuloo: nu" dadu:- yang nu" khyug du: yo' yang loo: dadu: ri shugbyid: ca" da:.

⁷Nuloo: du: khang" moo" yo' yang loo: du: khang" moo" ri shivoo: dajoid: jain" yo' shugbyid: ca" da:. Yang nu" du: khang" moo" rigi khokham nu" nyang: nyang: myid vho: zi ciyo' nghoid loug we' bo shugbyid: ca" da:. Shivoo: dajoid: jain" yo' dage" zhainloin: xu: 6 kug we' bo shugbyid: ca" da:.

⁸Khokham nu" gi khoem" moo" khyoo: mo vang lo da" yab mo thu lo" wigi nyang: vang lo khaid khyo" doem thu loo" ca" da:.

⁹Pui" daloem: loem: moo byumyu" yi ASEING ri noku wa shid re" mougzhung: shoid khoem" moo" khyo" vang loo bang: gi nyangnu" bain noku lang" mougpyi: shoid khoem" moo" khyo" doem thu loo" ca" da:. Mougpyi: shoid khoem" moo" khyo" vang loo bang: gi mougzhung: shoid khoem" moo" khyo" thu loo" ca" da:. Hang" we' nyang: nyang: vang lo da" khaid khyo" adoem ge thu loo" wa. Tu tab shoid khyo" thu loo" ca" da:.

¹⁰Khokham nu" gi shava byu yi vang yhe: da" uri vang yhe: wigi nyangnu" thu lo" da" uri thu loo" ca" da:.

¹¹Zoo: shug pui" bidnyid joem moo: yo' pui" joem moo nuloo: du: khang" moo" anghoid lang" yang loo: du: khang" moo" yo' dage" shivoo: dajoid: jain"- yang nu" dadu: yo' noku su: byid: nau da" xoin" ciri nghoid loug yang nu" bo boo ca" da:. Shivoo: dajoid: jain" yo' dage" zhainloin: xu: khyug kug bo shugbyid: ca" da:.

¹²«Vhoeb khang" nyid da" khokham nu" gi du: goin" nghe' ngei" da" xoin" anghoid lang" zoem" khau: xoin" shugbyid: nau uri akhoug: shoid shava jang: khyoo: vang yhe: da" khoem" moo" ri nya: shid re" phang too" byid: ca" da:. Nyang: gi Dougno: Bidnyid moo shugbyid: ziyo' dayhang: ti" nyang: shugbyid: ca" da:. Houg: lho: nyang: doem thu lo" thang: ri khoem" moo" ri myhid" pyam ca" da:.

¹³ASEING tid. «Nab soin: khang" moo" ce: dam abo da" dazain byeung" bye: da" yang nu" dadu: du: ri du: goin" nghe' ngei" khyo" ASEING ri shugbyid: ca" da:. He: xoin" ri nyid" khang" nyid" shugbyid: ca" da:.

¹⁴Houg: yo' dayhang: ti" nab soin: khang" moo" cen: moin" yo' lheug wa da zhainloin: xu: eig kug yo' cen: moin" dajoid: jain" ri byid: ca" da:. ASEING ri shugbyid: wa he: tarha" gi apyaid atoo: moo koid ca" da:.

¹⁵Yang nu"- cen: moin" yo' zhainloin: xu: gi apyaid atoo: moo nab soin: khang" moo" ASEING ri shugbyid: ca" da:.

¹⁶Yoem: moo" bo ASEING amyeing" byid: zigi «Vhoeb khang" nyid da" khokham nu" gi nyang: seing: da" mougmyid dacu' cu' ri nya: yuggi zoo: dayug yug ri jhungshug khyo" byid: pyam nghoid ri hau: mougmyid ri hau: yuggi zoo: gi nya: yhoem: ikoin deungkhu: da" jonu" khyo" yo" seing: yu wa zi nghoid.

¹⁷Nghoid loug we' Vhoeb khang" nyid da" khokham nu" gi nyang: seing: da" mougmyid dacu' ri nya: dei zoo: dayug yug ri byid: pyam nghoid ri hau: mougmyid ri doem zheing" yu da" zain nyid ju" loo lang" khokham nu" da" jonu" doem bui" wa zi nghoid. Hau: mougmyid gi nyang: seing: zi nghoid wigi nyang: yo' nya: da" yuggi zoo: yi za: hau: ziri apyaid atoo: yo" seing: yu wa zi nghoid.

¹⁸Vhoeb khang" nyid da" khokham nu" gi byumyu" yi da" jonu" ri nyangnu" lo, mo age yu pyam byid: wa. Nya: zoo: yiri nyang: kho' gam byid: da" kha: mougmyid nghoid loug we' nyang: ri byid: to" da" mougmyid mo nghoid ca" da:. Houg: lang" nyang: gi nga" byumyu" yi da" mougmyid ri lhoid yu pyam da" khyo" nyangnu" ri adoin: zeug zoo: loo wa.

¹⁹Hau: thang: hau: yug gi ngoo ri akhoug: shoid shava jang: mo mougpyi: shoid khoem" moo" nam moo jo, wigi mougzhung: shoid khyoo: myonhoo: shu: da" yab khyoo: vang yhe: da" khoem" duang: khyoo: shu" yhe: lo" da:. He: joem gi khainjung yi shid re" gyeung" shang: yab joem nghoid ago". Nyang: gi yab joem da" bidvang shoid joyoo daloem: ri toin" shid lho:

²⁰Tid zigi «He: joyoo gi khainjung yi yooboo shid re" shugbyid: da" xoin" anghoid lang" doem xab da" xoin" joem mo shoo" joem ri jhau' da" joyoo- cen: moin" xoin" ri phoid da" joyoo nghoid. Houg: lang" shava byu yiri dam yo" tab wa da" agyeing" ashang: zi ce: daja: ri we' tunggung shoid shava jang: khyoo: ayo" yu thu loo wa zi nghoid».

²¹Hau: thang: nyang: gi ngoo ri tunggung shoid shava jang: khyoo: shu" yhe: wigi hau: shava jang: da" thung jhoin: myid: jhoin: moo 68 pi: sheing: wigi 48 pi: lam da" shava jang: yab nu" daloem: loem: bo ziri toin" shed da:.

²³Hau: yab khang" moo" ri lugzeing pyiyam yam to" lho: pyiyam ri nghe: wigi myikhyoem' ri koid to" da:.

²⁴Hau: yug gi ngoo ri «He: joem gi Noku Yhoem: Moo" mo dei zoo: yi byumyu" yi shugbyid: da" xoin" joem ri jhau' da" voem: yhung" yab yhoem: joem nghoid da» ga: tid kyo" da:.