Read Lashi EZEKIEL 47 Bible Online

EZEKIEL 47 - Lashi bible

EZEKIEL 47

¹Byu hau: yug gi ngoo ri Noku Yhoem: Moo" khoem" duang: khyoo: shu" lo" da:. Gyid gi khoem" duang: moo" agyid" khyo" yau thu lo wigi Noku Yhoem: Moo" shidkhoin" shu: da" bidthu shoid khyoo: yau lo" da:. Hau: gyid zoo: gyung: gi phoin: da" mougpyi: shoid khyo" wigi Noku Yhoem: Moo" mougpyi: shoid agyid" khyo" yau gyoo" lo" da:.

²Hau: thang: hau: yug gi ngoo ri mougzhung: shoid khoem" moo" khyo" Noku Yhoem: Moo" mo shu" thu lo wigi bidthu shoid khyoo: shu: to" da" khoem" moo" shoid lheing lo" da:. Gyid zoo: gyung: nu" dagyung: gi khoem" moo" da" mougpyi: shoid moo yau nyid da:.

³Hau: yug gi nya: da" laki' wigi bidthu shoid khyoo:- 1680 pi: ke' lho: ngoo ri houg: khyo" neug: dab we' ga: tid da:. Gyid gi nga" khyid: xeig yhi' za: dano, da:.

⁴Hau: thang: nyang: gi gootu: 1680 pi: doem ke' da:. Houg: lho: gyid gi nga" poid lug ju" do, lo da:. Hau: thang: 1680 pi: doem ke' kaid ri gyid gi nga" phyid" doem: moo: ju" lo da:.

⁵Nyang: gi 1680 pi: doem ke' kaid ri houg: moo gyid gyung: gi ngoo ayo" neug dab loosho' no, da:. Hau: jang" mo gi gyid shab shab ca" wa yhi' nyang: no, da:.

⁶Nyang: gi ngoo ri «Shid: se' da" byu we"- he: gu: dangain" ri goolhoo' za: xoem" ci: we'» ga: tid. Hau: thang: nyang: gi ngoo ri gyid gyung: yam khyoo: doem shu" lo da:.

⁷Ngoo hau: joyoo moo ju" lo ri gyid gyung: yam eig shoid goin" moo seiggam gye" yug jo, ziri shau" myang.

⁸Nyang: gi ngoo ri «He: gyid gyung: gi hau: mougmyid khyo" bidthu shoid khyoo: yau lo" wigi Yodan lang: khung" yo' xoo" thoem" khyoo: yau vang lo" da:. Hau: gyid gi xoo" thoem" khyoo: yau vang lo" uri hau: xoo" gyid gi gyid gyeing: bue" loo" khare" da:.

⁹Hau: gyid zoo: gyung: yau lo" da" joyoo khyi' khang" moo" moo gougnyhoug acang: joeb yo' wim: do' acang: joeb nyid loo wa. Hau: gyid zoo: gyung: gi xoo" thoem" mo gyid ri gyeing: nhang: wa. Hau: gyid yau lo" da" khyi' khang" moo" moo hau: zigi kangso' ri byid: wa.

¹⁰Engedi gyid bug joem mo zi Eneglaim gyid bug joem ju" sho' hau: panglai: gyid yam cang wimdo, kuang bang: nyid boem goo" wa. Houg: lho: nyangnu" gi hau: joyoo moo nyangnu" da" goin joem ri pei: myhu" wigi lhab' hei' boem goo" wa. Hau: joyoo moo Meing: gung panglai: moo wimdo, aja: ja: nyid yhang: ti" acang joeb nyid loo wa.

¹¹Nghoid loug we' gyid yam cang jo, boem da" thoem" nhoin: joem yo' gyid thoem" nu" joem mo gyid: rigi gyeing: nhang: wa zi anghoid. Hau: joem gi houg: moo xoo" thoem" khyo" deing jo, wa.

¹²Gyid zoo: gyung: eig shoid goin" moo zoo: noem zei: byid: da" seiggam shigam joem yug loo: wa. Houg: joem da" afu' joem gi khanham we' ayhoug" loo" wigi ashi" zei: zi khanham we' atheing: wa. Hau: joem gi lhammoo" khyab khang" moo" ashi" aseig zei: byid: wa. Ciwim gari Noku Yhoem: Moo" mo yau thu re" da" gyid zoo: gyung: gi hau: joem ri gyid shoin" byid: da:. Hau: seiggam joem gi zoo: noem byid: wigi seig fu' joem gi byu noo byang" wa shid re" ci: loo goo" wa.

¹³Yoem: moo" bo ASEING tid. He: zigi Israela byumyu" kung: daxe: eig kung: ri kho' gam byid: wa da" mougkyoo" joem nghoid. Yoseb kung: bang: ri gooji byumyu" tho' eig tu' je myo: yoo" nhang: wa.

¹⁴Ngoo gi nanu" phoug: phyed yiri he: mougmyid seing: yu wa shid re" deing deing dangsoo" byid: too" bye:. Akhid" hau: ziri nanu" dayi" yi" kho' gam goo" ge'.

¹⁵Mougzhung: shoid mo mougkyoo" gi Meing: gung panglai: mo zi bidthu shoid khyoo: Hethlon voomoo" khyo" zi Hamad koo' lhang khyo" Zedad voomoo" khyo"

¹⁶Beratha yo' Sibraim voomoo" joem khyoo: (Hau: eig voo gi Damasku khokham mungdain: yo' Hamad khokham mungdain: agyoo: mougkyoo" moo jo, ago") Houg: mo zi Tikon voomoo" (hau: voomoo" gi Hauran moug: du mougkyoo" moo jo, zi nghoid) ju" sho' nghoid da:.

¹⁷Hougsu" yoomo mougzhung: shoid gi Meing: gung panglai: mo zi bidthu shoid Enon voomoo" ju" sho' hau: da" mougzhung: shoid Damasku mung" yo' Hamad mung" mougkyoo" ju" sho' nghoid da:.

¹⁸Bid thu shoid mougkyoo" gi mougpyi: shoid Damasku mougmyid yo' Hauran mougmyid agyoo: khyo" bidvang shoid Israela mougmyid yo' bidthu shoid Gilead mougmyid agyoo: moo jo, da" Yodan gyid gyung: mougkyoo" khyo" zi xoo" thoem" mo Tama ju" sho' mougkyoo" kho' to' da:.

¹⁹Mougpyi: shoid mougkyoo" gi bidvang mougpyi: shoid Toma mo zi Kadesha Meriba gyid thu khyo" zi bidvang mougzhung: shoid moo: Egutu mung" mougkyoo" khyo" zi Meing: gung panglai: ju" sho' nghoid da:.

²⁰Bidvang shoid mo mougkyoo" gi meing gung panglai: yam khyo" zi mougzhung: shoid khyoo: Hamad koo' lhang bidvang shoid ju" sho' nghoid da:.

²¹He: mougmyid ri re" byumyu" kung: yiri kho' gam byid: we'.

²²Hau: zigi nanu" da" apyaid atoo: mo agyid asoo: mougmyid nghoid da:. Hau: ziri nanu" kho' gam go" uri nanu" da" phung: gung moo nyid wigi hid moo: zooshang: khu: da" tungbau byu yi we' nyangnu" da" gamboem yo" yu ca" da:. Nyangnu" we' Israela mung" byu seing: yhang: ti" nyang: zoem" khoug: ca" wigi nyangnu" gi Israela byumyu" kung: yi yo' dage" mougmyid kho' gam wa shid re" me" bo yo" lab ca" da:.

²³Houg: moo nyid da" tungbau byu yugkhang" moo" gi nyang: bo nyid da" byumyu" kung: yi mo byu yi yo' dage" nyangnu" da" gamboem ri shoug" yu wa zi nghoid. Ngoo yoem: moo" bo ASEING tid too" bye:.