Read Lashi EZEKIEL 48 Bible Online

EZEKIEL 48 - Lashi bible

EZEKIEL 48

¹Mougzhung: shoid mo mougkyoo" gi Meing: gung panglai: mo zi bidthu shoid khyoo: Hathlon voomoo" khyo" zi Hamad boem gyoo: lid phyed wigi Enon voomoo" khyoo:- houg: mo zi Damasku khokham mung" yo' Hamad khokham mung" mougkyoo" ju" sho' nghoid da:. Byumyu" kung: khang" moo" gi mougzhung: mo zi mougpyi: shoid khyoo:- vhoo: moo bo ziyo' dayhang: ti" bidthu shoid mougkyoo" mo zi bidvang: shoid Meing: gung panglai: ju" sho' lam: da" moug: damoug: ri shoug" kham yu ca" boem ago" Houg: bang: gi Dan Ashera Naphtali Manashe Ephrim Ruben

⁸Houg: mo xo' lo" da" mougmyid gi gooki" lid ci: wa shid re" kho' to" zi nghoid. Hau: zigi mougzhung: shoid mo mougpyi: shoid 10 main: bo lho: bidthu shoid mo bidvang shoid gi byumyu" kung: yiri gam byid: da" du yo' dayi" nghoid da:. Noku Yhoem: Moo" gi hau: akhoug: moo jo, ca" da:.

⁹He: du mo agung moo sheing: khyoo: 10 main pyi: khyo: 8 main: bo da" gu: gi gooki" lid mougmyid du nghoid wigi ASEING ri shugbyid: ca" da:.

¹⁰Khainjung yigi he: gyeung" shang: da" mougmyid moo gamboem daboem shoug" yu ca" ago". Nyangnu" da" gamboem gi bid thu- bidvang 10 main: sheing: wigi mougzhung: mougpyi: 4 main: sheing: ca" da:. ASEING da" Noku Yhoem: Moo" gi he: joyoo da" agung moo jo, ca" da:.

¹¹He: gyeung" shang: da" mougmyid gi Zadog mo ko' gyoo" lo da" amyed ashen yi nghoid da" khainjung yi shid re" nghoid ca" da:. Nyangnu" gi ngoo ri jhug zug tung" dei byid: wigi goo" kung: mo Levi byu yi yhang: ti" shoid vhang: moo" koid da" Israela byumyu" yi moo abo boo nghoid ago".

¹²Houg: lho: nyangnu" gi Levi byu yi seing: da" joyoo yo' xo' da" gooki" lid joyoo ri shoug" yu ca" wigi hau: joyoo gi gootu: dangain" tho' je gyeung" shang: da:.

¹³Levi yi we' gooki" lid da" joyoo daloem: yoo" ca" da:. Hau: zigi khainjung yi mougmyid da" mougpyi: shoid moo nghoid wa. Hau: joyoo we' bid thu- bidvang 10 main:- mougzhung: mougpyi: 4 main: boo ca" da:.

¹⁴ASEING ri shugbyid: da" hau: joyoo gu: gi hau: mougmyid mo ge thang da" joyoo nghoid lho: houg: mo kha: joyoo ri we' age oung" zoo:- age thid- gootu: yug ri age zhang ab byid: wa.Hau: zigi gyeung" shang: wigi ASEING wigi seing: da" joyoo nghoid.

¹⁵Gooki" lid mougmyid mo deing da" gu: nghoid da" sheing: khyoo: 10 main: pyi: khyoo: 2 main: bo da" joyoo gi agyeungshang: nghoid da:. Nghoid loug we' byumyu" yi shava mo ci: wa zi nghoid. Nyangnu" hau: joyoo moo yo" nyid wigi hau: mougmyid ri yo" ci: boem goo" wa. Voomoo" gi hau: joyoo agung moo jo, ca" da:.

¹⁶Houg: lho: hau: joyoo gi myid: shoid goin" zi du go" wigi shoid khang" moo" 7560 pe: boo wa zi nghoid.

¹⁷Voomoo" lheing khoem shoid khang" moo" moo 420 pe: lam da" myidjang cen: jangdam jo, ca" da:.

¹⁸Gyeung" shang: joyoo mo mougpyi: shoid tab tab moo xo' da" joyoo moo voomoo" ri bain de: thang: deung da" myidgung ri bidthu shoid moo sheing: khyoo: 4 main:- pyi: khyoo: 2 main- bidvang shoid moo sheing: khyoo: 4 main:- pyi: khyoo: 2 main: gu: gi voomoo" moo: nyid da" bang: zhung" zoo: zhung" shug wa shid re" mougmyid khyo" ci: ca" da:.

¹⁹Voomoo" moo nyid da" yugkhang" moo" gi kha: kung: bang: nghoid loug we' hau: mougmyid moo yo" zhung" zoo: zhung" shug da:.

²⁰Houg: yoomo gootu: kho' to" da" agung mo joyoo dangain" gi shoid khang" moo" 10 main: bo da:. Houg: moo voomoo" khyo" joyoo yu to" gu: we' bo da:.

²¹Noku Yhoem: Moo"- khainjung yi da" mougmyid- Levi yi da" mougmyid yo' voomoo" bo bo da" he: mougmyid bidthu shoid yo' bidvang shoid deing da" mougmyid gu: gi vhoeb nyid da" khokham nu" seing: zi nghoid da:. Hau: gu: gi bidthu shoid khyoo: bidthu shoid mougkyoo" ju" sho' bidvang shoid khyoo: Meing: gung panglai: ju" sho' mougzhung: shoid khyoo: Yuda kung: bang: seing: da" joyoo ju" sho' mougpyi: shoid khyoo: Benyamin kung: bang: seing: da" joyoo ju" sho' gu ri mougkyoo" khyo" kho' to" da:.

²³He: gooki" lid kho' to" da" da" mougmyid da" mougpyi: shoid moo bidthu shoid moug: kyoo" mo zi bidvang shoid Meing: gung panglai: ju" sho' gu: ri mougzhung: mo zi mougpyi: khyoo: vhoo: mo deing da" byumyu" kung: yi kung: khang" moo" kho' yu ca" wa zi nghoid. Houg: bang: gi Benyamin Simun Isakha Zebulun Gad bang: nghoid wa.

²⁸Gad kung: bang: ri byid: da" mougmyid mo mougpyi: shoid moo bidvang- mougpyi: shoid Tama mo zi Kadesha gyid bug ju" sho' yo' bidvang- mougzhung: shoid moo Egutu mougkyoo" khyo" zi Meing: gung panglai: ju" sho' nghoid da:.

²⁹Yoem: moo" bo ASEING tid zigi «He: zigi Israela byumyu" yi seing: yu wa shid re" nyangnu" ri mougmyid kho' gam byid: wa khyoo: nghoid da:.

³⁰Yerusalem voomoo" moo khoem" moo" daxe: eig loem: jo, da:. Vang da" shoid khang" moo" 7560 pi: bo wigi dashoid khyoo: khoem" moo" soem" loem: dab da:. Khoem" moo" daloem: moo byumyu" kung: yi da" myeing daloem: loem: dab da:. Mougzhung: shoid vang mo khoem" moo" joem mo gi Ruben- Yuda- yo' Levi- bidthu shoid vang mo khoem" moo" joem moo gi Yoseb- Benyamin yo' Dan- Mougpyi: soid vang moo gi Simun- Ishakha yo' Zebulun yo' bidvang shoid vang moo gi Gad- Ashe yo' Napthali kung: bang: da" myeing myheing da:.

³⁵voomoo" vang myid: shoid goin" da" sheing: phyang" gi 30240 pe: bo da:. Voomoo" da" myeing ri akhid" mo thang: phyang" «ASEING gi hid: moo nyid» ga: myheing loo wa.