Read Lashi EZEKIEL 7 Bible Online

EZEKIEL 7 - Lashi bible

EZEKIEL 7

¹ASEING gi ngoo ri dang: ji da:.

²Nyang tid zigi «Shid: se' da" byu we"-he: zi: Israela mungdain: shid re" ngoo Yoem: moo" bo ASEING tid nyid zi nghoid. He: zigi damung" goin" shid re" lo" thang ayo, nghoid.

³«Israela we"- Lo" thang ayo, gi ju" loo bye:. Nang koid lid: loo bye: da" moo" zoo" shid re" ngoo gi nang ri dang: phyed nyid yoomo ngoo nheig yo: ziri nang kham zo: loo wa. Re" aco' ajhoid moo" dangain" shid re" nang ri ngoo aphoug" doem shang" wa.

⁴Ngoo gi khyam" sa: abyid: wa anghoid lang" nheig khyeug myid dajhi we' aci: shug wa. Nang koid lid: lo da" aco' ajhoid moo" zoo" joem gang mo nang ri ngoo yooboo dam byid: loo: wa. Houg: lang" ngoo ASEING nghoid ziri nang se' loo wa"» ga: tid.

⁵He: ziri Yoem: moo" bo ASEING tid nyid zi nghoid. «Yau: khi" kyi" khyeug daja: bain daja: re" jhang ju" loo wa.

⁶Hau: zi dangain" bain bye:. He: zigi lo" thang nghoid. Nang gi thang abye:.

⁷Mungdain: khoug: moo: nyid da" nanu" shid re" lo" thang nghoid. Nang gi ju" lo nyid bye:. Boem tho' mo phoin: yhoem: joem moo pui" akoid loo: anhung akhoid za: bui" wa da" ayo, jhang re" nyid bye:.

⁸«Akhid" daso' ri nyang: nanu" gi ngoo nheig yo: yoem: ri shoug" kham zo: loo bye: da" moo" shid re" dang: phyed byid nyid zi nghoid. Houg: lho: nanu" da" aco' ajhoid moo" dangain" shid re" nanu" ri ngoo aphoug" doem shang" byid: wa.

⁹Ngoo gi khyam" sa: abyid: wa anghoid lang" nheig khyeug myid dajhi we' aci: shug wa. Nang koid lid: lo da" aco' ajhoid moo" zoo" joem gang mo nang ri ngoo yooboo dam byid: loo: wa. Houg: lang" ngoo ASEING nghoid ziyo' nanu" ri yooboo dam byid: su: nghoid ziri se' loo wa» ga: tid.

¹⁰Yau: khi" kyi" khyeug da" bidnyid gi ju" lo nyid bye:. Athoug" akhyoug: moo" gi myo: je: lo nyid. Nghoid boin: zigi myhang: thang moo jo, jo, abye:.

¹¹Athoug" akhyoug: zigi akhyeing" ziri je bue" nhang: da:. Nyangnu" da" ce: daja: we' adeing loo wa. Nyangnu" da" jonu"- nyangnu" da" reung: khyoo:- nyangnu" da" phung" yoeb: ci: we' adeing loo: wa.

¹²Akhyeing: gi ju" lo nyid abye:. Oung" zoo: oung" shug"- qei zoo: qei shug koid zigi ce: dang: kang: aboo loo: wa. Ciwim ga: ri dei nyid da" yugkhang" moo" adang moo: Mangsoo da" yooboo dam byid: zi gyo" zang" loo wa.

¹³Mangsoo da" nheig yo zigi yugkhang" moo" da" adang moo jo, jo, yoomo phaga: ga: bang: gi nyang: ci: yhung: pyam da" zi dangain: ri doem yo" yu sho' kang: asheing: wa. Akhyeing" ashoeb bang: gi ayo" dei nyid goo" wa.

¹⁴Laboo" moid kaid wigi yugkhang" moo" gi jen" jen" soin ago". Nghoid loug we' meing: zain: jang: dam khyoo: hang" ayhi: nghoid ago". Ciwim gari: Mangso da" nheig yo: zigi yug khang mo da" adang moo: jo, jo, yoomo nghoid.

¹⁵khyoo: joem moo: zain: go" nyid ago". Yhoem: joem akhoug: moo: noo phyoo" yo' zooyoid khyoo: shoug" nyid ago". Siyoo moo: yhe: thu nyid da" yug hang" nghoid loug we' khaid zain: go" jang" moo: shid: loo" wa. Voomoo" khoug: moo: nyid bang: gi noo phyoo" yo' zooyoid zi shoug" kham goo" wa.

¹⁶Dayham" bang: gi lang: khung" joem mo kyug tang" kaid da" pheing" kyoug" joem yhang: ti" boem joem khyoo: phang: loid loo" goo" wa. Nyangnu" dangain" bang: gi nyangnu" da" yooboo joem gang mo koug ngau loo goo" wa.

¹⁷Yugkhang" moo" da" lo, joem gi yoem: neing: goo" wa. Nyangnu" da" poid lug joem gi nain" loo goo" wa.

¹⁸Nyangnu" gi jid: moo" byimi void lho: da gung goin" nain" loo goo" wa. Nyangnu" da" vhuloem joem ri dung: pyam lho: nyangnu" dangain" gi ngi: yoem" zi shoug" loo goo" wa.

¹⁹Nyangnu" gi nyangnu" da" sheing: yo' ngei ri khyoogung cang mhoid soid yhang: ti" she: pyam sain" to" loo goo" wa. Ciwim gari: ASEING wigi nya: da" nheig joem yo: ziri foid shoin" thu kaid uri ngei yo' sheing: gi nyangnu" ri yo" khyoid yu wa zi anghoid. Hau: zigi nyangnu" da" myidvho: khyoo: ri ayo" pyeing- voem: we' agyi: nhang: nghoid da:. Ngei yo' sheing: gi nyangnu" ri yooboo khoug khyoo: shu" lo" da:.

²⁰Shid phyang" nyangnu" gi nyangnu" da" yung" wigi phoug" dab da" lug zi joem gang mo nghoid boin: boem loug we' nyangnu" gi hau: joem ri aco' ajhoid yu phara" soolhoo: joem koid wa shid re" ci: pyam ago". Houg: yoomo ASEING gi nyangnu" da" jonu" joem ri nyangnu" shid re" aco' ajhoid bue" pyam nhang: da:.

²¹ASEING tid zigi «Ngoo gi nyangnu" ri tungbau byu yi wigi lhoid zoo: lhoid shug nyhang: wa. Houg: lho: tarha" acang bang: gi nyangnu" da" jonu" ri yu pyam ziyo' hau: ziri ayung" alhoo' koid pyam byid: boem wa.

²²Nga" phoug" dab da" Noku Yhoem: Moo" ri nau khyo" koid pyam uri khyangtoug: yi houg: khyoo: phyo' thoid vang yhe: wigi hau: ziri ayung" alho' koid pyam uri ngoo abo vang kung" keig wa.

²³«Ja: khang" moo" gi anhung akhoid bue" jo, wa. Mungdain: gi byu said moo" yo' byeung" jo, wa. Voomoo" joem moo athoug" akhyoug: moo" byeung" jo, wa.

²⁴Ngoo gi akhyeing" thang da" byumyu" yiri hid: khyoo: shu" lo wigi nyangnu" ri nanu" da" yhoem: joem ri seing: yu nhang: wa. Ngo wigi nyangnu" ri nanu" no' da" joyoo joem ri nau khyo" koid pyam nhang: uri nanu" mo yoem: bo thang da" yuggi yi lang" nyangnu" da" voem" myid joem thang lo" byug wa.

²⁵Nheigloem: thang wa khyoo: jhang lo nyid bye:. Nanu" gi yug yoo myenjham" khyoo: shoo: nghoid loug we' hau: ziri khanham we' myang zi anghoid.

²⁶Yau: khi" kyi" khyeug gi daja: thang: daja: cang lo wigi age da" lu dang: gi byeing abyid xo' loo: xo' ju" yau vang lo nyid wa. Nyangnu" gi nyangnu" da" ju" loo wa da" ayo, khyoo: ri myang ziri tid kyoo" wa shid re" lapi: yiri mho' loo goo" wa. Khainjung yigi byumyu" yiri jhau" shid wa ci ayoo" goo" wa. Byu zeing yigi phajhi" byid: wa ci: ayoo" goo" wa.

²⁷Khokham phoo gi koug ngau loo wa. Khokham nu" yi myid byu khyoo: ri asoem" byid: pyam wa. Byumyu" yigi gyoug nain" lo boem wa. Ngoo gi nanu" koid lid: lo da" moo" dangain" shid re" nanu" ri yooboo dam byid: wa. Houg: lho: nanu" subi" gooji ri dang: phyed boem yhang: ti" nanu" ri ngoo dang: phyed wa. He: zigi nanu" ri ngoo ASEING nghoid khyoo: ri ci: shug byid: zi nghoid wa.