Read Lashi EZEKIEL 8 Bible Online

EZEKIEL 8 - Lashi bible

EZEKIEL 8

¹Ngoonu" pyoung" shu" nyhid: too" shoug" zi khyug zain ein: zain lhammoo" khyug khyab wim: nyid" nyid" ri Yuda mo pyoung" shu" nyhid: too" shau" da" vhujhung: yigi nga" yhoem: moo ngoo yo' dage" zhoung: jo, boem. Yoem: moo" bo ASEING da" yoem: so' gi nga" jang" moo nyeigdain tung" ju" re" da:.

²Ngoo nghang yu" kaid ri myi: su" dab nyid da" byu xangsu: gung du: yoeb myang daloem: ri myang. Nya: gung phyid" doem: mo vho: du gi myi: yo' du wigi phyid" doem: mo tho' du gi boid yung" to" da" gyid: mid" yhang: ti" bang jo, da:.

³Nyang: gi lo, yhang: te" ze wigi yhoin" kaid lho: ngoo ri xam: mo zhoeb yu da:. Hau: thang: he: yoeb myang moo Mangso da" Venyi: gi ngoo ri moug: laid moo shu" to' yu wigi ngoo ri Yerusalem khyoo: shu" yhe: lo" da:. Nyang: gi ngoo ri Noku Yhoem: Moo" mougzhung: shoid khoem" moo" duang: akhoug: shoid khyoo: shu" yhe: da:. Hau: joyoo moo Mangsoo ri nheigloem: yoin nhang: da" yu phara" soolhoo: daloem: jo,.

⁴Kheba gyid gyung: nam moo ngoo myang yu" bye: yhang: te" da" Israela Mangsoo nyid ziri ci: shug da" bidbang yi yi ziri ngoo myang.

⁵Mangsoo ngoo ri «Shid: se' da" byu we"- mougzhung: shoid khyoo: yu" kaid we'» ga: tid. Ngoo yu" kaid ri khoem" moo" duang: ayam mo phoin: nam moo Mangsoo ri nheigloem: yoin nhang: da" yu phara" soolhoo: daloem: ri ngoo myang.

⁶Mangsoo gi ngoo ri «Shid: se' da" byu we"- cibue" nyid ziri nang myang rhe". Israela byumyu" yigi he: joyoo moo aco' ajhoid moo" koid nyid ago". Nga" gyeung" shang: da" joyoo mo ve: tho' je ve: loo" wa shid re" ngoo ri khaid nyid ago". Nang gi hau: tho' je ngi: yoem" da" moo" joem ri shau" myang wa» ga: tid.

⁷Nyang: gi ngoo ri tunggung shoid khyam: vang" khyoo: shu" thu yhe: wigi vang khyam: mo boid duang: jo, ziri toin" shug da:.

⁸Nyang: gi «Shid: se' da" byu we"- he: mo vang khyam: ri ceug vang loo" we'» ga: tid. Ngoo ceug vang lo" ri khoem" duang: daduang: ri shau" myang.

⁹Nyang: gi ngoo ri «Vang yhe: wigi hau: joyoo moo nyangnu" koid da" akhyeing" moo" aco' ajhoid moo" joem ri yu" we'» ga: tid.

¹⁰Houg: yoomo ngoo vang lo" wigi yu" bye:. Pyiyam joem moo lhangmyu joem soolhoo: yo' gootu: ayung" alho' da" gougnyhoug joem soolhoo: ri sue" tab to" lho: Israela byumyu" yi no' nyid boem da:.

¹¹Israela vhujhung: yi nyhed xi: yug hougmoo nyid wigi Shaphan da" nya: zoo: Yaozana we' bo da:. Yugkhang" moo" gi shoem: nam pyo: ja: myidoem daloem: loem: zhoeb ci: boem wigi hau: shoem: nam pyo: ja: mo myikhoug" thu nyid da:.

¹²Mangsoo gi ngoo ri «Shid: se' da" byu we"- Israela vhujhung: yi hidsu" khau" koid nyid ziri nang myang rhe". Nyangnu" dangain" bang: gi yu phara" soolhoo: byeung" sho' bo da" yab dayab moo no' nyid boem ago". Nyangnu" gi ‹ASEING ngoonu" ri amyang- nyang: gi mungdain: ri she: pyam too" khoo' bye:»› ga: mho' yoid da:.

¹³Hau: thang: ASEING gi ngoo ri «Hau: tho' je aco' ajhoid da" moo" joem ri nyangnu" koid ziri nang shau" myang wa» ga: tid da:.

¹⁴Hau: thang: nyang: gi ngoo ri Noku Yhoem: Moo" mougzhung: shoid khoem" moo" khyoo: shu" lo" wigi Tamuza yu phara" shid: lo" ziri koug ngau nyid da" myiyi: yiri toin" shed da:.

¹⁵Nyang: gi «Shid se' da" byu we"- nang hau: ziri myang la". Hau: tho' lang" aco' ajhoid moo" joem ri nang shau" myang shi" wa» ga: tid.

¹⁶Hougsu" yoomo nyang: gi ngoo ri Noku Yhoem: Moo" khyam: vang akhoug: shoid khyoo: shu" vang lo" da:. Hau: gyeung" shang: yab khoem" duang: nam mo phoin: yo' khyoo: agyoo: moo yuggi eig xe: wim: yug koo: nyid da:. Nyangnu" gi gyeung" shang: yab ri nung phug to" lho: bidthu shoid khyoo: goeb pid to" wigi bid thu re" ziri no' nyid ago".

¹⁷ASEING ngoo ri «Shid: se' da" byu we"- nang hau ziri myang la". Nang myang bye: da" aco' ajhoid moo" dangain" ri koid lho: damung" goin" khyoo: athoug" akhoug: moo" ri byo loo" nhang: da" moo" yo' za: Yuda byumyu" yigi nheig ashid: shi" nghoid ago". Anghoid- nyangnu" gi he: Noku Yhoem: Moo" moo hau: joem ri re" koid boem wigi ngoo ri je nheig yoo: nhang: ago". Yu" we' nyangnu" gi areing: thang da" lo, moo" yo' ngoo ri rue" boem ago".

¹⁸Nyangnu" gi nga" nheig yo: yoem: ri shoug" kham zo: loo wa. Ngoo gi nyangnu" ri anhang: kaid wa. Nheig khyeug myid we' aci: shug wa. Nyangnu" gi yo" nyho: yhi' nyho: wigi ngoo ri akyu" mho' nghoid loug we' ngoo gi nyangnu" ri atam" gyoo: byid: wa» ga: tid.