Read Lashi EZEKIEL 9 Bible Online

EZEKIEL 9 - Lashi bible

EZEKIEL 9

¹Hau: thang: Mangsoo nyho: kaid zi ngoo shau" gyo:- «Voomoo" ri yooboo dam byid: wa nghoid da" byu nanu" hid: khyoo: lo yu" we'. Nanu" yo' dage" nanu" da" gyi jonu" ri we' yu loo we'.

²Houg jang" yugkhang" moo" gyi jonu" ci: da" byu khyug yug gi Noku Yhoem: Moo" mougzhung: shoid tunggung khyo" re" lo da:. Nyangnu" yo' dage" zin: yung" byimi void wigi lhid" wa zi daja: ci da" byu dayug we' bo thu re" da:. Nyangnu" dangain" bang: re" wigi gyid: mid" phoin: yam moo yab jo, boem.

³Hau: thang: Israela da" Mangso shidkhoin" mo yi: yi: wim da" bidbang gi houg: moo jo, jo, da" dungdab dei noem joem mo bang thu lo wigi Noku Yhoem: Moo" khoem" moo" duang: khyoo: yu re" lo da:. ASEING gi zin: yung" byimi void ci: su: ri khe: kaid da:.

⁴«Yerusalem voo goin" jang" khyoo: yhe: wigi dain ci' bang: yo' kyi" khyeug shoug" bang: yugkhang" mo" da" ngilang: laxoem" yhe: tab too" we'. Ciwim gari voomoo" khoug: moo aco' ajhoid moo" dangain" bue" nyid da»

⁵Houg: lho: Mangsoo gi byu gooji ri dang: ji ziri ngoo shoug" gyo. Voomoo" davoo goin" ri nya: thang: cang wigi said pyam we'. Dayug ri we' ateing too" goo". Dayug ri we' nheig akhyeug goo".

⁶Phau: mang: yi zooyam yi zoomyi: yi myhi' zeing yi yo' zooshang: yiri said pyam we'. Nghoid loug we' ngilang: moo aso" tab to" da" su: hang" ri we' atain" goo". He: nga" Noku Yhoem: Moo" mo koid shid" ge'» ga: tid. Houg: yoomo nyangnu" gi hau: Noku Yhoem: Moo" moo yab jo, da" vhujhung: yi mo said shid" ago".

⁷Mangsoo gi nyangnu" ri «Noku Yhoem: Moo" ri aco' ajhoid bui" nhang: pyam we'. Hau: vang" ri manggung joem yo' pyeing pyam we'. Moo" zei: goo" se'» ga: tid. Houg: yoomo nyangnu" gi voomoo" mo byu yiri said shid" lo" boem bye:.

⁸Hougsu" said lo" nyid boem uri hau: joyoo ngoo nyang: kyeing" nyid nyid. Ngoo gi nga" myonhoo: ri goeb zhug to" wigi «Yoem: moo" bo ASEING we"- nang gi Israela moo nyid deing nyid da" yugkhang" moo" ri said pyam wa yhi' Yerusalem ri nheig yoo: bye: rhe"» ein: nyhoo: bye:.

⁹Mangsoo doem phug tid zigi «Israela yo' Yuda byumyu" yigi gyoug pho" da" yooboo joem shoid abye: go". Nyangnu" gi damung" goin" byu said moo" shoid wigi Yerusalem moo yooboo koid moo" yo' byeung" jo, nhang: da:. Ngoo ASEING nyangnu" da" mungdain: ri she: pyam too" kho' bye: ziyo' nyangnu" ri ngoo amyang ga: nyangnu" tid ago".

¹⁰Nghoid loug we' ngoo gi nyangnu" ri nheig akhyeug wa. Nyangnu" subi" ri koid yhang: ti" ngoo nyangnu" ri koid wa» ga: tid.

¹¹Hau: thang: zin: yung" byimi void ci: da" byu doem tau" lo wigi ASEING ri «Ngoo re" amyeing" dang: ri bain cang koid bye:» ga: lu dang: lo shid kyo" da:.