Read Lashi DANIELA 1 Bible Online

DANIELA 1 - Lashi bible

DANIELA 1

¹Yuda mung" moo Yehoiakim khokham bue" zi soem" zain ein: zain moo Babelon mo Nebukhadneza gi Yerusalem ri meing: zain: lho: hau: voomoo" ri vang lheing to" da:.

²ASEING gi Khokham Yehoiakim ri myheig yu lho: Noku Yhoem: Moo" mo jonu" ziyoo dayham" ri shoem" yu wa akhang" nyang: ri byid: da:. Nyang: gi thung: byu dayham" ri Babelon mo nya: da" yu phara" joem noku yhoem: khyoo: shu" lo" lho: shoug" zheing" yu da" jonu" ziyoo joem ri noku yhoem: mo zi too" yab joem moo lo" to" to" da:.

³Khokham phoo gi nya: da" gyizoug: moo" Ashapena ri pyoung" she: yu to" da" Israela byumyu" yi mo khokham yhoemkhung: mo yo' nheigboo ludaid yi yhoem: byu yi mo zooyam yiri khyen: kho' too" nhang: da:.

⁴Nyangnu" gi gung doem we' younglho': vhu" nug gi bang:- nyeing" jhau" too" bang:- jhau" ri se' gyoo: lei bang: gung doem yo' sen: wigi ca" zi aboo bang: nghoid ca". Houg: lang" za: khokham vang" moo dei byid: moo" ri nyeing" jang jang yo" zei: wa zi nghoid. Ashapena gi nyangnu" ri Babelon mougsoug" se' nghab se' lhid" sho' jhau" byid: ca" da:.

⁵Nyangnu" ri nyid" khang" nyid" khokham vang" mo mo, ri zho" jhug da" zoo: noem yo' zabyid yhid: ri doo" byid: ca" ga: we' amyeing" khyo' to" da:. Jhau" shed zi soem" zain byeung" thang: ri nyangnu" ri khokham pho da" shidkhoin" moo yhe: nyid shug ca".

⁶He: khyen: yu to" da" bang: moo Daniela- Hanania- Mishaela yo' Azaria bang: bo ago". Nyangnu" dangain" gi Yuda byumyu" kung: mo bang: nghoid.

⁷Gyizoug: moo" gi nyangnu" ri Bethesha- Shadrag- Meshag yo' Abednego ga: myheing seig myheing byid: da:.

⁸Daniela gi khokham vang" mo zoo: noem zo: zabyid yhid: shug lho: thung" khyo" ayung" alho' abui" nhang: wa shid re" nya: nheigloem: moo myid phyed yoomo Ashapena ri pang" yu wa mho' da:.

⁹Houg: lho: Mangsoo gi Daniela ri nheig myid: wa myid Ashapena ri kaid byid: da:.

¹⁰Nghoid loug we' Ashapena gi khokham phoo ri gyoug wigi Daniela ri «Nanu" cizoo: cishug wa ziri khokham phoo myid: phyed too" gu nghoid bye:. Houg: lho: nang gi zooyam goo" bang: yhang: ti" axu: yung" nghoid rigi nyang: ngoo ri said pyam loo wa» ga: tid da:.

¹¹Houg: yoomo Daniela gi nyang: yo' nya: da" byencang" phoo soem" yug ri yu" coung: wa shid re" Ashapena wigi sain' to" da" lhoug zung" yug jhang yhe: da:.

¹²Nyang: gi «Ngoonu" ri daxi: nyid" jham" yu" la. Ngoonu" ri zoo: wa shid re" nghang pho yo shug wa shid re" gyid: byid: goo" la.

¹³Hau: thang: ngoonu" ri khokham pho da" zoo: noem zo: da" zooyam yi yo' tu' yu" lho: ngoonu" khasu" nghoid ziri yo" shau" myang jang" moo ayang: koid lho: nang myid phyed we'» ga: tid da:.

¹⁴Nyang: gi nyangnu" ri daxi: nyid" jham" yu" wa shid re" myid veing" da:.

¹⁵Ayo, byeung" da" uri nyangnu" gi khokham zoo: noem zo: da" mo, tho' je yang zain: lho: je xu: young" jo, ago".

¹⁶Houg: yoomo hau: ayo, mo thang: khyoo: nyangnu" ri khokham pho nyheing jung byid: da" zoo: noem gungthid nghang" pho ri xo' zho" da:.

¹⁷Mangsoo gi hau: zooyam myid: yug ri lasi phajhi"- mougsoug" yo' myid phajhi" se' jhang: ziri byid: da:. Hau: tho' agoo" Daniela ri yoeb myang myang ziyo' yhoeb mo joem ri se' phid: kyoo" wa da" lasi phajhi" ri byid: da:.

¹⁸Khokham pho wigi tid to" da" soem" zain byeung" thang: ri Ashapena gi zooyam yi dangain" ri Nebukhadneza jhang shu" yhe: da:.

¹⁹Khokham phoo gi nyangnu" dangain" bang: yo' dang: doem go" da:. Houg: lho: Daniela- Hanania- Mishaela yo' Azania bang: gi gooji dangain" tho' je khokham pho wigi lhoem: yu" ngei zi shoug" ago". Houg: yoomo nyangnu" gi khokham vang" mo zhayhen" vang byu bue" lo" ago".

²⁰Khokham pho wigi khasu" dang: myid: myid: nghoid loug we' khasu" ayoug: akhi" ci: thu loo nghoid loug we' he: myid: yug gi damung" goin" mo boid phyed se' phyed mo yo' maindain lagle sara: gootu: tho' daxi: zhang je se' ago".

²¹Daniela gi Persi khosen Kuru wigi Babelon ri meing: zain: oung: pyam da ayo, ju" sho' khokham vang" moo za: nyid nyid da:.