Read Lashi DANIELA 10 Bible Online

DANIELA 10 - Lashi bible

DANIELA 10

¹Persi mung" moo Kuru khokham bue" zi soem" zain ein: zain moo Belteshaza ga: we' myeing da" Daniela ri mungdang: daloem toin" shid byid: da:. Hau: mungdang: gi jo nghoid loug we' se' gyoo: wa shid re" gye" yau: da:. Hau: ziri yoeb myang daloem: khyo" nyang: ri tid sho' kyo" da:.

²Hau: ayo, moo ngoo gi labain soem" loem: koug ngau nyid.

³Labain soem" loem: lid sho' ngoo gi agoin agoo" ce: zoo: noem- ce: shoo" we' azoo:- zabyid yhid: we' ashug nga" xam: we' akyo'.

⁴Hau: zain zain seig khyab eig xe: myid: nyid" nyid" moo ngoo gi gye" yoem: gyi: da" Tigri gyid lang yam moo yhe: yab jo.

⁵Ngoo nghang yu" kaid ri zin: yung" pain" void lho: sheing: phyid" cu" cu" da" byu dayug ri shau" myang.

⁶Nya: da" gung gi phau" dab sheing: yo' dayhang: ti" bang jo, da:. Nya: da" myonhoo: gi moug: lhab' myeig ziyo' dakhyoo" ti" bidbang bang jo, wigi nya: da" myojid" joem gi myi: yo' dakhyoo" ti" nge" nyid da:. Nya: da" lo sain: yo' khyid: joem gi boid jhoid to" da" gyid: mid" yo' dakhyoo" ti" bo" jo, da:. Houg: lho: nyang: dang: ji thui: gi shava byu phung: moo" nyho: nyid ziyo' dakhyoo" ti" nghoid da:.

⁷Hau: yoeb myang ri shau" myang zi ngoo dayug kyeing" nghoid da:. Ngoo yo' dage" nyid bang: gi ci: ri we' ashau" myang nghoid ago". Nghoid loug we' nyangnu" gi gyoug dain ziyo' phang: gau" yhen" ago".

⁸Hau: joyoo moo ngoo dayug za: he: mau" pho" da" yoeb myang ri zung" yu" lho: nyid deing nyid. Ngoo moo yoem: dajhi' we' aboo loo: wigi nga" myonhoo: gi subi" hang" we' wigi ase' yu" byug loosho' myonhoo: lid: byug da:.

⁹Nya: da thui: ri ngoo shoug" gyoo: lang" Ngoo gi agyeing: asoo" loo myidjang khyo: leung gyoo" lo" wigi hau: joyoo moo myonhoo: myidjang khyoo goeb lho: leung jo, da:.

¹⁰Hau: thang: lo, dalo, wigi ngoo ri tu: to' kaid lho: lo, doo: do: poid thug thoug nhang: da:. Ngoo gi dagyug nain" nyid shi".

¹¹Moug: lagyoo: gi ngoo ri «Daniela we" Mangsoo gi nang ri jheddab da:. To' yab lho: ngoo tid wa ziri nyeing" za: tam" gyoo: we'. Ngoo ri re" jhang nhang: kaid zi nghoid» ga: tid da:. Nyang: hau: zi bain tid lang" ngoo gi gyoug nain zoo" re to' yab kaid bye:.

¹²Hau: thang: nyang: tid zigi «Daniela we"- agyug. Nang se' gyo: yu wa shid re" nheigloem: nyhoem: khyo' wa nang myid phyed da" xang: shi" bidnyid mo nyang: Mangsoo gi re" akyu" mho' dang: joem ri gyoo: byid: abye:. Re" akyu" mho' dang: ri phug tid wa shid re" re" jhang ngoo ju" ri" bye:.

¹³Persi mo moug: lagyoo: khokham nu" gi ngoo ri eig xe: danyid" ngeug thug pyam da:. Hau: thang: moug lagyoo: moo" joem mo dayug nghoid da" Mikhaela gi ngoo ri re" pang" yu da:. Ciwim gari hau: Persi mung" moo ngoo dayug ri za: too" kho' ago".

¹⁴Ju" loo wa da" ayo, moo re" byumyu" yi ce: noem thung" shau" wa ziri nang ri se' gyo: nhang: wa shid re" ngoo ju" re" zi nghoid. He: zigi ju" lo wa da" ayo, yo' sen da" yoeb myang nghoid» ga: tid da:.

¹⁵Nyang: he: ziri tid uri ngoo gi dang: ase' tid loo: myidgung khyoo: zhug yu" nyid.

¹⁶Hau: thang: byu dayug yo' du da" moug lagyoo: dayug gi nya: lo, ri yhoin" kaid lho: nga" nhoid yid moo tain" byid: da:. Ngoo gi nyang: ri «Aseing we"- he: yoeb myang gi ngoo ri sung yoem: nheing: nhang: lho: ngoo gyoug nain" zi ayo" theing: loo: wa.

¹⁷Ngoo gi join seing: shidkhoin" moo yab jo da" join dayug yo' dakhyoo" ti" nghoid da:. Nang ri ngoo khasu" yo" tho' ji wa la". Ngoo moo ce: yoem: we' aboo loo:» ein: tid bye:.

¹⁸Nyang: gi ngoo ri dalheing: doem zei: she: yu lho: ngoo dajhi' yoem: je bo re" thui: shau" gyo: da:.

¹⁹Nyang: gi «Nang ri Mangsoo jheddab da:. Houg: yoomo ce: wigi we' nang ri aseing" khoo" nhang:- akyug tain' nhang:» ga: tid da:. Nyang: hau: zi bain tid lang" Ngoo je" yoem bo lo thui: gyo: wigi «Aseing: we"- nang tid ca" ziri tid we' nang gi ngoo ri je nyid pyoo: thui: gyoo: nhang: abye:» ein: tid bye:.

²⁰Nyang: gi «Ngoo ciwim yoomo re jhang re" ziri nang se' rhe". Deingmain" da" mougsoug" pug moo lhid" to" zi nang ri ci: shug byid: wa shid re" ju" re" zi nghoid. Akhid" ngoo gi doem tau" lo" lho: Persi moo lhoug zung" da" moug: lagyoo: ri gyi lo" koid ca". Hau: thang: moo Greek moo lhoug zung" da" moug: lagyoo: nyid thu loo wa. Israela da" lhoug zung" yug moug: lagyoo: Mikhaela mo lid wigi hang" we' ngoo ri pang" thoug yu wa su: anyid» ga: tid.