Read Lashi DANIELA 11 Bible Online

DANIELA 11 - Lashi bible

DANIELA 11

¹Nyang: gi ngoo ri pang" yu wa yo' goem loem byid: wa yoovoin yoo" su: nghoid da:.

²Houg: lho: akhid" nang ri ngoo tid kyoo" wa zigi jo zi nghoid da» ga: tid. Moug: lagyoo: gi «Persi moo khokham soem" yug doem xo' vhoeb loo wa. Houg: lho: khokham gootu: soem" yug goin" tho' je yoo" zoo: yoo" shug da" myid: yug ein: yug cang re" lho: vhoebkhang" loo wa. Nya: da" yoem: so' yo' jonu" yo" wigi gyi: myhang: ri" lang" nyang: gi Greek mungdain: ri yoem: shi' loo wa.

³Hau: thang: Sarhi' khokham dayug nyid thu loo wa. Nyang: gi gye" gyi: da" mungdain: moo" ri vhoeb lho: nyang: koid nau ziri koid wa.

⁴Nghoid loug we' nya: da" yoem: so' myhang: lo uri nya: da" mungdain: moo" byo, yoin" lo" lho: myid: gang go, loo" khari" wa. Nyang: mo akhu: myhu: kaid da" Khokham yi nya: khoo: moo thid vhoeb loo goo" wa. Nghoid loug we' nyangnu" gi nyang: yo" lid lo da" hau: yoem: so' ri ayoo" goo" wa.

⁵Egutu khokham gi yoem: gyi: loo wa. Nghoid loug we' nya: da" zoug: jhung: yi mo dayug gi je" yoem: gyi: re" lho: je gyi: da" mungdain: moo" ri vhoeb loo wa.

⁶Zain loem: dayo, zoo: myang" lo thang: ri Egutu khokham gi Suri khokham yo' bidnoem xo' lho: Suri khokham ri nya: myiyi: zoo: byid: zho" loo wa. Nghoid loug we' hau bidnoem xo' tei" zigi myang" sho' akham yoomo hau: myiyi: zoo: ri we' nya: yhoem: seing: phoo ri: we' nya: zooshang: yi ri we' nyang: yo' dage" yhe: lo" da" dei zoo: yiri we' said pyam' zi shoug" lo goo" wa.

⁷Hau: thang: khamyhang" akyoo: ri hau: myiyi: zo: da" bidnoem dayug gi khokham bue" loo wa. Nyang: gi Suri khokham da" gyidab ri gyi yhe: zain: lho: nyangnu" da" gyidab joem khyoo: vang yhe: wigi nyangnu" ri oung: pyam wa.

⁸Nyang: gi nyangnu" da" yu phara" lhoo: joem yo' hau: yu phara" joem ri shugbyid: to" da" sheing: ziyo' ngei zi joem ri Egutu khyoo: de" phang: loo" wa. Yug yoo da" zain loem myoo sho' lid lo" thang: ri

⁹Suri khokham gi Egutu khyoo: moug jhen" jhen" vang loo" wa. Nghoid loug we' nyang: gi doem khaid tau" pyam zi shau" wa.

¹⁰«Suri khokham da" yuggi zoo: yigi gyi: zain wa soin' lho: gyidab zeing daloem: khe: zheing" yu loo wa. Nyangnu" mo dayug gi dagyid yhang: ti" je: nghoeb lo lho: gyivoo daphung da" gyikhoug: zung ri khaid zain wa.

¹¹Egutu khokham gi nheig yo: ziyo' Suri khokham ri khaid zain wigi nya: da" gyidab moo" zeing ri myheig yu pyam wa.

¹²Nyang: gi nya: da" oung: doid yoomo we' gyizoo: myoo: sho' ri nyang: yo" said pyam yoomo we' nghoid boin: loo wa. Nghoid loug we' nyang: gi xo' lho: yo" oung: doid wa zi anghoid.

¹³«Suri khokham gi doem tau" lo wigi shid mo lheing: tho' je myo: da" gyidab ri lo khe: zheing" loo wa. Ayo, akhyeing: gi ju" lo da" uri nyang: gi gyi zi gyi khoo: goo" lhoo: za: yo" ci: da" gyidab moo" daloem: yo' doem tau" re" loo wa.

¹⁴Hau: thang: byu myoo" sho' bang: gi Egutu khokham ri thougtheung gyi koid loo wa. Houg: lho: Daniela we"- re" byumyu" yi mo athau" akhyau: da" byu dayham" gi nyangnu" shau" myang lid loo bye: da" yoeb myang daloem yoomo gyi koid thougtheung loo goo" wa. Nghoid loug we' nyangnu" joem: lo" boem wa.

¹⁵Houg: lho: Suri khokham gi gyidab jo, da" voomoo" vang: lheing: to" lho: seing: yu pyam loo wa. Egutu gyizoo: yigi xo' lho: meing: azain: goo" wa. Nyangnu" mo yang thang yug gi yi lang" yoem: atham: boo wa.

¹⁶Suri moug: jhen" jhen" su: gi nyangnu" ri nyang: vho: khyo" koid loug we' doem phug khyoo: akoid goo" wa. Nyang: gi dangsoo" mougmyid moo yab jo, lho: hau: mougmyid ri nya: da" yoem: so' khoug: moo bain sho' to" loo wa.

¹⁷Suri khokham gi nya: gyidab dangain" ri shu" lho: gyi khaid yhi: wa khyo" soin' nyid da:. Hau: thang: nyang: gi nya: da" gyivoo mungdain: ri yo" phyo' shoin' sho' ga: myid soin' lho: nyang: yo' bidnoem xo' wigi nyang: ri nya: da" myiyi: zoo: byid: zho" loo wa. Nghoid loug we' nya: da" myid soin' to" khyoo: gi oung: doid wa zi anghoid.

¹⁸Hau: thang: nyang: gi mungdain: joem ri panglai: shoid khyo" meing: zain: lho: nyangnu" mo myoo" sho' bang: ri oung: pyam wa. Nghoid loug we' tungbau vhujhung: dayug gi nyang: ri oung: pyam wigi nya: da" nghoid boin: khyoo: ri thang nhang: wa. Gyeing" nyang: Suri khokham da" nghoid boin ziri nya: jhang doem phug tau" loo nhang: wa.

¹⁹Hau: khokham gi nyang: seing: da moug: mo gyikhoug: zung joem khyoo: doem tau" loo" wa. Nghoid loug we' nyang: ri oung: pyam boem wigi hau zigi nya: da" lo" thang khyoo: bue" byug wa.

²⁰Nya: thang: moo khokham gootu: dayug cang re" wigi nyang: gi nya: da" mungdain: jonu" ri myo: ri" nhang: wa shid re" mung" byu yiri kheing" koid: wigi doin: zeigzoo: wa zoug: dayug ri nhang: kaid wa. Khamyhang amyang" ri khokham gi shava byu yi phung: moo yo' meing: zain: jang: moo anghoid loo za: said pyam zi shau" wa› ga: tid da:.

²¹Moug: lagyoo: xo' lho: tid sho' kyo" da:. Thang: lheing: mo Suri khokham gi khokham bue" wa ce: akhang" ayo" da" akhyeing" ashoeb su: nghoid da:. Nghoid loug we' nyang: gi nyeigdain tung" dalheing: dam nyid thu re" wigi yoem: so' ri we' mhoug fain" da" khyo" lhoid yu pyam wa.

²²Mangso da" khainjung moo" ri koid yhang: ti" nyang: ri ngeug thug lho: gyi phug koid yug hang" ri nghoid loug we' jhoid za: shoem" thu pyam wa zi shau" wa.

²³Nyang: gi myid veing" dang: theing joem koid khyo" gootu: mungdain: joem ri mhoug fain" pyam ziyo' nyang: gi mungdain: ngi daloem: ri za: davhoeb loug we' je je yoem: gyi: loo wa.

²⁴Nyang: gi jonu" yo" da" mungdain: daloem: ri ci: atid poin" too" lho: za: moug: jhen" vang yhi: wa. Houg: lho: nya: phoug" phyid" yi hang" dayug we' akoid lo da" moo" ri koid loo wa. Hau: thang: nyang: gi meing: zain: jang: mo shoug" yu lo da" lanyhoeb joem yo' jonu" joem ri nya: thang: cang bang: ri kho' gam byid: wa. Nyang: gi gyikhoug: zung joem ri khaid zain: wa soin' nghoid loug we' nya: da" ayo, gi khamyhang amyang" ri thang lo" byug wa.

²⁵«Nyang: gi Egutu khokham ri meing: zain: wa shid re" gyidab moo" daloem: ri nghoid boin: ngi: boo tung" khe: zheing" to" lho: Egutu khokham gi nyang: ri yoem: so' gyi: da" gyidab moo" daloem: wigi doem tau" khaid zain: loo wa. Nghoid loug we' Egutu khokham gi mhoug fain" zi shoug" lho: oung: doid wa zi anghoid.

²⁶Nya: jhang thang da" phajhi" byid: bang: gi nyang: ri joem: loo" nhang: wa. Nya: da" gyizoo: myoo" sho' yug gi said pyam zi shoug" lho: nya: gyidab gi byo, yoin" loo" wa.

²⁷Hau: thang: hau: khokham eig yug gi zoobui" daloem: moo voem: dage" zhung: zo: loo wa. Nghoid loug we' nya: eig yug da" myid soin' da" akhyoo" joem gi akhyeing" ashoeb zi nghoid lho: nyang: cang" nyang: mhoug loo goo" wa. Nya: eig yug vho: ziri ashau" yu goo" wa. Ciwim gari hau: shid re" ayo, akhyeing: aju" shi" yoomo nghoid.

²⁸Suri khokham gi Mangso da" byumyu" yiri phyo' shoin' pyam wa ga: myid phyed ci: lho: nyang: shoug" lhoid yu da" lanyhoeb dangain" yo' dage" yhoem: khyoo: doem tau" loo wa. Nyang: gi nyang: vho: khyo" koid kho' lho: nyang: nya: moug: khyo: doem tau" phang: loo" wa.

²⁹«Thang: phyang" nyang: gi Egutu mung" khyoo: moug: jhen" doem jhen" vang yhi: wa nghoid loug we' he: lheing: bue" lo zigi goolheing: yo' adu wa.

³⁰Roma byumyu" yigi gyid sangphoo khyo" vang re" lho: nyang: ri ngeug thug wigi nyang: gi gye" gyoug dain wa. Hau: thang: nyang: gi nheig joem: yo: wigi doem tau" lheing: lo lho: Mangso byumyu" yi da" laloem lakhoug: ri phyo' shoin' pyam loo wa. Nyang: gi hau: laloem lakhoug: ri she: pyam bye: bang: wigi phajhi" byid: ziri cang loo wa.

³¹Nya: da" gyizoo: yi dayham" gi Noku Yhoem: Moo" ri thung" khyo" ayung" alho' koid pyam wa. Nyangnu" gi nyid" khang" moo" ngei" byid: da" xoin" ri toem' pyam lho: gyoug mau" pho" ziri tu: zhug too" wa.

³²Khokham phoo gi mhoug fain" da" khyo" wigi hau: laloem lakhoug: ri she: pyam khoo' bye: mo, mo pang" thoug ziri yo" yu wa nghoid loug we' Mangso da" byu yiri yhang: ti doem tau" khaid zain: loo goo" wa.

³³Hau: byumyu" yi da" phajhi" bo da" vhu" shi: bang: gi nyangnu" phajhi" ri byu myoo: sho' bang: yo' gam yu ri" goo" wa. Nghoid loug we' dayo, zoo: myang" ri nyangnu" mo dayham" gu: ri gyi khaid jang: moo said pyam shoug" wa anghoid lang" myi nghe' pyam zi shoug" wa. Houg: lho: dayham" gu: rigi lhoid zo: zi shau" wigi thung: byu yi bui" nhang: pyam zi shoug" ri" goo" wa.

³⁴Hougsu" said go" nyid uri Mangso byumyu" yigi byu myoo" sho' mo, nyangnu" nyang: myid vho: ziyoo" wa shid re" re" bo pang" zi nghoid loug we' dajhi dathang: pang" yu zi shau" boem wa.

³⁵Phajhi" bo da" vhu" shi: bang: dayham" ri said pyam zi shoug" wa. Nghoid loug we' he: gang mo hau byumyu" yigi kyeing sain' yu zi shau" boem wa. He: zigi Mangso wigi asoo" so" to" da" lo" thang da" ayo, ju" sho' xo" bue" nyid wa.

³⁶«Suri khokham gi nyang: nau khyo" koid wa. Nyang: gi yu phara" tho' je gyi: sheung: ziyo' gyi: sheing: myhang: thang da:. Mangso tho' lang" je gyi: je reung: ga: phau: tid loo wa. Nyang: gi Mangso wigi nyang: ri yooboo dam byid: da" ayo, ju" sho' he: ziri yo" koid loo wa. Mangsoo gi nyang: myid soin' to" ziyo' dakhyoo" ti" toeb za: koid wa.

³⁷Hau: khokham phoo gi nya: da" phoug" phyid" yi dei byid: lid lo da" yu phara" ri ngeug pyam lho: myiyi: yi jheddab da" yu phara" ri we' cishu: anhang: yu" to" loo wa. Gyeing" nyang:- nyang: gi ce: ja: yu phara" ri nghoid loug we ngeug he: loo wa ciwim gari nyang: gi hau: joem dangain" tho' je gyi: sheung: ga myid yu da:.

³⁸Hau: gungthid nyang: gi gyikhoug: zung joem ri goem loem byid: da" yu phara" joem ri ngi: shab byid: loo wa. Nyang: nya: phoug" phyid" yi ano' yu" da" yu phara" ri sheing:- ngei- phoug" dab da" sheing: zi joem yo' phoug" dab da" gootu: jhungshug joem ngei" byid: loo wa.

³⁹Nya: da" gyigoo zung joem ri goem loem byid: wa shid re" tungbau yu phara" ri no' coung" bang: ri ci: wa. Nyang: gi nyang: ri mung" vhoebkhang" su: khyo" khab yu bang: ri gyi: sheung: da" ngi: shab khyo: byid: lho: nyangnu" ri myhang: da" azhang ri byid: ziyo' aphoug" jhungshug khyo" mougmyid ri byid: loo wa.

⁴⁰«Suri khokham da" lo" thang ayo, akhyeing: bain ju" lo nyid nyid ri Egutu khokham gi nyang: ri meing zain: wa. Houg: lho: Suri khokham gi gyi myang: rheing" joem myang: joem yo' gyid sangphoo myoo" sho' ci: lho: nya: da" yoem: so' dangain" yo' doem tau" khaid zain: loo wa. Nyang: gi gyid ji: zoo" su" mungdain: myoo" sho' da" khoug: khyoo: moug: jhen" jhen" vang yhe: loo" wa.

⁴¹Nyang: gi dangsoo" to" da" moug: khyoo: lang" moug: jhen" jhen" vang yhe: lho: byu khyeing" khyeing" moin moin myoo: sho' ri yhe: said pyam wa. Nghoid loug we' Edom- Moba yo' Amon mo deung jo da" mungdain: joem gi loid byug goo" wa.

⁴²Hau: mungdain: joem khyoo: moug: jhen" jhen" vang yhe: lo" da" uri Egutu rilang" ateing too" khoo' wa.

⁴³Nyang: gi Egutu yi shoung: yung to" da" sheing: ngei yo' houg mo phoug" dab da" jonu" joem ri de" phang: lo" wa. Nyang: gi Libya yo' Etiopi ri meing: zain: oung: wa.

⁴⁴Hau: thang: bidthu shoid mo yo' moug zhung" shoid mo lo da" lu dang: gi nyang: ri gyoug dain nhang: loo wa. Houg: lho: nyang: gi nheig joem yo: ziyo' meing: khaid zain: wigi byu myoo" sho' ri said pyam wa.

⁴⁵Nyang: gi panglai: yo' Noku Yhoem: Moo" jo da" bouggung agyoo moo nya: da" khokham zoem" moo" zeing joem ri koid too" wa. Nghoid loug we' nyang: gi nyang: ri pang" thoug byid: wa byu dayug we' houg: moo anyid loo: nyang: shid: loo" wa.