Read Lashi DANIELA 3 Bible Online

DANIELA 3 - Lashi bible

DANIELA 3

¹Khokham Nebukhadneza gi myhang: khyoo: goug: xi: pe:- pyi: khyoo: goug: pe: bo da" sheing: soolhoo: daloem: koid nhang: lho: Babelon mung" Dura jang: pa: moo zhug too" nhang: da:.

²Hau: thang: khokham phoo gi zeing: foem: ri" wa shid re" nya: gyizoug: dangain" khi: wa amyeing" byid: kaid- khokham nu" yi gyi zoug: yi gyizoug: moo" yi mung" zoug: yi ngei zoem: bang:- tarha" agyi yi tarha" zoug: moo" yi yo' mung" du joem mo gootu: moo" voin bang: dangain" ri khe: kaid da:. Nyangnu" gi khokham Nebukhadneza zhug to" da" soolhoo: ri shugbyid: da phung: moo re" bo zhung: ca" ago".

³He" zoug: ludaid yi dangain" bang: soolhoo: ri shugbyid: da" pui" moo re" zeing: foem: lho: hau: soolhoo: shidkhoin" moo yab jo, boem uri

⁴hid: su" ga: fu" dang: ri thui: zeing yo' nyho: tid kaid ago". Mungdain: dangain" mo byu yi byumyu" yi yo' myeing" cang: joeb dangain" bang: we"-

⁵Nanu" gi laboo" joem moid thui: shau" gyo: thang:- khoolhang moid thui:- teing shi: she: thui:- jhabceing yo' baid myheing ja: thui: ri shau" gyo: ri" goo" wa. Houg: lang" gootu: baid myheing ja: dangain" ri bo baid myheing kaid loo wa. Music thui: joem baid myheing shid" kaid yo' nanu" gi khokham Nebukhadneza zhug to" da" sheing: soolhoo: ri goeb pid lho: no' ca" goo" wa.

⁶Agoeb pid ano' bang: hang" ri nghoid loug we' gye" dab nyid da" myikhyoem moo" khoug: khyoo: hougjang: nyang: du" zei kaid zi shoug" wa» ga: nyho: tid ago".

⁷Houg: yoomo mungdain: joem dangain"- byumyu" yi dangain" yo' myeing" cang: joeb ji da" byumyu" yi dangain" gi moid- baid myheing ja: thui: ri shoug" gyoo: lang" khokham Nebukhadneza zhug to" da" sheing: soolhoo: ri goeb pid no' boem ago".

⁸Hau: ayo, moo Babelon byu dayham" gi Yuda byumyu" yiri myonhoo: shoem: nhang: wa akho: akhang" yu da" ayo, nghoid da:.

⁹Nyangnu" gi khokham Nebukhadneza ri «Nang aseing: khokham kang: sheing: baja" o".

¹⁰Aseing: khokham nang gi music thui: myeing shid" yo' dage" yugkhang" moo" sheing: soolhoo: ri goeb pid wa shid re" amyeing" khyo' to" da:.

¹¹Houg: lho: agoeb pid ano' da" yug hang" nghoid loug we' gye" dab nyid da myikhyoem moo" khoug: khyoo: du" zei kaid zi shoug" wa ga: amyeing" byid: da:.

¹²Babelon mung" du ri vhu: shi: wa shid re" nang moo" foin: to" da" Yuda byumyu" yi dayham" nghoid da" Shadrag- Meshag yo' Abednego bang: gi aseing: khokham- re" amyeing" dang: joem ri atam" gyoo: bang: nghoid ago". Nyangnu" gi re" yu phara" ri we' ano' lho: nang zhug to" da" soolhoo: ri we' agoeb pid bang: nghoid ago"» ga: tid boem.

¹³Houg: lho: khokham phoo nheig joem: jo, yo: re" lho: hau: byu soem" yug ri nya: shidkhoin" khyoo: shu" ri" nhang: da:.

¹⁴Nyang: gi nyangnu" ri «Shadrag- Meshag yo' Abednego we"- nanu" gi nga" yu phara" ri ano'- ngoo zhug to" da" soolhoo: ri we' agoeb pid mo, ga: zi jo, rhe".

¹⁵Akhid" laboo"- khoolhang- teing shi- jhabceing yo' gootu: baid myheing ja: thui: ri shoug" gyoo: yo' dage" soolhoo: ri goeb pid no' byid: we'. Nanu" hougsu" akoid nghoid rigi nanu" ri akhid" nyang: gye" dab nyid da" myikhyoem moo" khoug: khyoo: du" zei kaid zi shoug" goo" wa. Nanu" ri yo" khyoid yu da" yu phara" nyid ein: jhoo: go" rhe"» ga: tid da:.

¹⁶Shadrag- Meshag- yo' Abednego gi «Aseing: khokham we"- ngoonu" khyo" gi ngoonu" nya: gung ri goem loem yu wa yoem: akaid wa.

¹⁷Ngoonu" dei byid: nyid da" Mangsoo gi ngoonu" ri myikhyoem moo" mo we' re" yoem: so' mo we' yo" khyoid yu nghoid ri nyang: khyoid yu wa.

¹⁸Nghoid loug we' nyang: akhyoid yu nghoid rilang" aseing: khokham nang khyo" se' too" wa zigi yu phara" ri we' ngoonu" ano' wa nang zhug to" da" sheing: soolhoo: ri we' ngoonu" agoeb pid wa» ga: tu" ago".

¹⁹Hau: thang: Nebukhadneza gi nheig yo: lho: Shadrag- Meshag yo' Abednego ri nheig yoo: yoomo nya: myonhoo: byang: byang: ne re" da:. Houg: lho: nyang: gi myikhyoem moo" ri nyhed zhang myoo: sho' myi: zoin: wa shid re" nya: byu yiri amyeing" byid: da:.

²⁰Houg: lho: nyang: gi hau: byu soem" yug ri tei" lho: nge" nyid da" myikhyoem moo" khoug: khyoo: du" zei kaid wa shid re" nya: gyidab khoug: mo yoem: bo thang bang: ri amyeing" byid: kaid da:.

²¹Houg: yoomo nyangnu" ri byi: joem byid: sheing: joem mug joem byimi dangain" void ci: gu moo tei" lho: nge" nyid da" myikhyoem moo" khoug: khyoo: du" zei kaid ago".

²²Akhid" khokham pho wigi myikhyoem moo" ri gye" dam xoo: sho' lung: wa khyo" koid too" wa shid re" amyeing" byid: too" yoomo hau: byu yiri shu" yhe: da" goem loem bang: ri myiyham: wigi lhoem: mhe: pyam da:.

²³Hau: thang: Shadrag- Meshag- yo' Abednego bang: gi hougsu" tei" too" gu nyang: myikhyoem moo" agung khyoo: gyo" vang lo" ago".

²⁴Houg jang: Nebukhadneza gi mau" lho: nyeigdain tung" to' zhang re" da:. Nyang: gi nya: da" gyizoug: yiri «Byu soem" yug ri ngoonu" tei" lho: gye" dab da" myikhyoem moo" khoug: khyoo: du" zei kaid anghoid rhe"» ga: myid da:. Nyangnu" gi «Nghoid- aseing khokham we"- ngoonu" hougsu" nyang: koid bye:» ga: tu" da:.

²⁵Nyang: gi «Houg ri ciwim yoomo myikhyoem khoug: moo byu myid: yug so" yen" ziri ngoo shau" myang lug lha". Nyangnu" ri atei" too" loo:. Nyangnu" gi ce: dam dab nhoo: we' adu- houg: lho: myid: yug ein: yug gi moug: lagyoo: yhang: ti" du da» ga: tid.

²⁶Houg: lho: Nebukhadneza gi myikhyoem moo" khoem" duang: khyoo: yhe: lho: Shadrag- Meshag- Abednego we"- Gyi: sheung: myhang: thang Mangso da" dei zoo: lagyoo: yi we"- thu loo ge» ga: nyho: yoid kaid da:. Nyangnu" gi houg jang: nyang: thu lo ago".

²⁷Khokham nu" yi gyi: zoug: yi gyizoug: moo" yi yo' khokham pho da" gootu: gyizoug: dangain" mo, gi myi: dam adab da" byu soem" yug ri re" zeing: foem: yu" ago". Nyangnu" da" xam: ange" pyam- nyangnu" da" byimi joem we' ange"- nyangnu" da" gung moo we' myi: shoem: anam nghoid ago".

²⁸Khokham phoo gi «Shadrag- Meshag yo' Abednego da" Mangsoo ri coung" o". Nyang: gi nyang: ri loem khau: lho: dei byid: da" he: byu yiri khyoid yu wa shid re" nya: da" moug: lagyoo: ri nhang: kaid da:. Nyangnu" gi nyangnu" nya: Mangsoo mo lid lho: gootu: yu phara" ri agoeb pid- adei byid: wa ga: nyangnu" nya: kangso' ri ab pyam sho' nga" amyeing" dang: joem ri atam" gyoo: loo ngeug pyam ago".

²⁹Houg: lho: akhid" ngoo khyo" wigi Shadrag- Meshag yo' Abednego da" Mangsoo ri aphoug" akhyoid tid da" yug gi kha: byumyu"- kha: mung"- ce: myeing" ji bang: nghoid loug we' khyid: lo, adu atoem phyed sain" pyam lho: nya: da" yhoem: ri byo, yoin" jo, sho' phyo' pyam byid: zi shoug" ca" wa ein: amyeing" khyo' kaid da:. Hidsu" yo" khyoid yu da" gootu: yu phara" anyid nghoid da» ga: tid da:.

³⁰Houg: lho: khokham phoo gi Shadrag- Meshag- yo' Abednego ri Babelon mo mung du cang je myang: da" joyoo moo aya: to' byid: da:.