Read Lashi DANIELA 5 Bible Online

DANIELA 5 - Lashi bible

DANIELA 5

¹Damyen ri khokham Belshaza gi nheigboo ludaid yi dakhyeing" ri zoo: noem doo" byid: da" pui" zeing daloem: koid wigi nyangnu" dage" zabyid yhid: shug boem ago".

²Nyangnu" zabyid yhid: shug nyid uri Balshaza gi nya: phoo Nebukhadneza wigi Yerusalem noku yhoem: mo shoem" de" lo da" sheing: khu ngei khu ri yu ri" wa shid re" amyeing" byid: kaid da:. Khokham phoo gi nyang: yo' dage" nya: nheigboo ludaid yi nya: yhoem: seing: myhi' yi yo' nya: dangcang: myhi' yi hau: khu joem mo yo" kaid shug wa shid re" yu nhang: kaid zi nghoid da:.

³Houg jang: sheing: khu joem yo' koem: joem ri yu vang lo boem wigi nyangnu" dangain" bang: gi hau: joem mo zabyid yhid: shoin: shug ago".

⁴Houg: lho: nyangnu" gi sheing:- ngei- gyid: mid"- joto'- seig- lugboem joem yo' koid to" da" yu phara" joem ri coung" boem ago".

⁵Nyeigdain' tung" byu lo, dalo, thu myang lo wigi myikug joem mo myi: je bang da" joyoo khokham kho" pyiyam' moo mougsoug" lhid" shid" re" da:. Khokham phoo gi hougsu" mougsoug" lhid" nyid ziri myang da:.

⁶Nya: myonhoo: poo" poo" wim loo" khare" ziyo' sung gyoug yoomo nya: poid lug ko' ko' nain" nyid da:.

⁷Nyang: gi main tain sara: yi join: zei bang:- lo, kyoo' yu" bang: ri khe: fang kaid wa shid re" byu dayug ri nyho: tid da:. Nyangnu" vang lo boem lang" khokham phoo gi nyangnu" ri «He: mougsoug" joem ri se' nghab lho: ngoo ri hau: joem da" dang: kang: ri yo" tid kyo" da" yug hang" ri nghoid loug we' khokham da" khalham" poo" void byisheing: foid byid: wa. Ngi: shab da" sheing: yiri we' nya: leung zeung: moo foid byid: lho: he: mungdain: da" soem" zang ein: da" joyoo moo too" wa» ga: tid da:.

⁸Khokham da" phajhi" byid: nheigboo yi ju" re" boem nghoid loug we' khokham phoo ri hau: mougsoug" cab joem ri ayo" nghab kyoo"- hau: da" dang: kang: ri we' ayo" tid kyoo" nghoid ago".

⁹Khokham Belshaza gi myid myo: ung: lug lho: myonhoo: je po" lo da:. Houg: lho: nya: nheigboo ludaid yigi cikoid wa ein: ziri ayo" myid nghoid ago".

¹⁰Khokham nya: myhi' gi khokham phoo yo' nya: nheigboo ludaid yi lu: fu: goo" nyid ziri shoug" gyoo: lang" zoo: shug pui" zeing koid nyid yab khyoo: vang lo" da:. Nyang: gi «Aseing khokham phoo apyaid atoo: dei nyid baja" o". Jeju" mo houg: yhi' gyeing" myid: atung" myoo:-myonhoo: ayoung" atung" koid.

¹¹Re" mungdain: khoug: moo gyeung" shang: da" yu phara" yi Venyi: bo da" byu dayug nyid da:. Re" phoo khokham bue" nyid uri he: yug gi myid lasi ge'- Lasi phajhi" bo lho: yu phara" joem da" phajhi" juyhi: yhang: ti" phajhi" juyhi: yo" ci: shug lid loo bye:. Houg: lho: re" phoo khokham Nebukhadneza gi nyang: ri boid phyed bang:- maindain si' bang:- join zei: bang: yo' lo, kyo' yu" bang: adang moo vhujhung: khyo" aya: byid: to" da:.

¹²Nyang: moo gooki' lid da" yoem: so' yo' phajhi" bo lho: yhoebmo, phuid: khyoo:- dang: myid: phuid: khyoo:- mau" pho" ja: ri sho' khyo" khyoo: yhang: te" da" phajhi" se' da:. Hougsu" yoomo khokham pho wigi Belteshaza ga: myheing to" da" su: Daniela ri khe: kaid we' He: dang: kang: dangain" ziri nyang: nang ri tid kyoo" baja".

¹³Daniela gi khokham shidkhoin" khyoo: dalheing: dam shu" vang lo" zi shau" wigi khokham gi nyang: ri «Nang gi nga" phoo khokham ge' Yuda mung" mo shu" pyoung" she: lo da" Yuda byumyu" Daniela nghoid rhe".

¹⁴Nang moo yu phara" joem da" Venyi: bo lho: se' jhang: khyoo:- Lasi phajhi" yo' phajhi" juyhi: se' ga: ziri ngoo shau" gyoo: bye:.

¹⁵Phajhi" byid: bang: yo' main tain sara: yiri shu" re" wigi he: lhid" cab' nghab nhang: lho: dang: kang: ri tid nhang: bye:.Nghoid loug we' nyangnu" gi dang: kang: ri ayo" shoo: nghoid ago".

¹⁶Akhid" nang gi nyhoem" to" da" dang: kang: joem yo' mau" pho" da" ja: ri yo" sho' kyo" ga: ziri shau" gyo: too" bye:. Nang gi he: mougsoug" ri yo" nghab lho: hau dang: kang: citid nau ziri yo" tid kyo" rigi nang ri khokham yi void da" khalham" boo" void byi: sheing: ri foid lho: ngi: shab byid: da" sheing:- yi: jang ri re" leung zeung: moo foid byid: nhang: wa. Houg lho: khokham mungdain: mo soem" zhang ein: da" joyoo aya: moo nyid nhang: wa» ga: tid da:.

¹⁷Daniela gi «Re" jhungshug joem ri nanya: shid re" zoem" ci: too" we' anghoid lang" gootu: dayug yug ri byid: pyam we'. Houg: moo lhid" to" ziri aseing khokham shid re" ngoo nghab khyoo" byid: lho: hau: da" dang: kang: ri tid kyoo" wa» ga: tid da:.

¹⁸Gyi: sheung: myhang: thang Mangsoo gi re" phoo Nebukhadneza ri khokham moo" bui" nhang: lho: nyang: ri ngi shab ziyo' khokham yoem: so' byid: to" abye:.

¹⁹Nyang: gi gye" gyi: sheung: wigi nyang: ri byumyu" dangain"- byumyu" kung: dangain" yo' myeing" ja: khang" moo" bang: wigi coem' gyoug phoug" ziyo' gyoug nain" nyid ago". Nyang: gi byu dayug yug ri said pyam noug lang" said pyam da:. Nyang: gi byu dayug yug ri adei too" noug lang" adei nyhed: to" da:. Nyang: gi nyang: wigi ngi: shab byid: noug yug ri ngi: shab byid: wigi ngi: yoem" nhang: noug yug ri ngi: yoem" nhang: da:.

²⁰Nghoid loug we' nyang: gi nghoid boin: nheigloem: thain: lho: anoug akhyoid koid yoomo nyang: ri nya: khokham zhungtang mo yu pyam byid: wigi nya: phung" yoeb ci: phyug pyam da:.

²¹Nyang: gi byu xangsu: phung: mo khaid thu pyam zi shoug" lho: nya: da" nheigloem: gi gougnyhoug dadu: da" nheigloem: yo' dayhang: ti" bue" byug da:. Nyang: gi loo zei: lam" joem yo' dage" nyid wigi nuloo: dadu: yhang: ti" vufu" zo: lho: nghain: goo joem ajo, da" jang: pa: moo yhoeb da:. Lo" thang moo nyang: gi byu xangsu: da" mungdain: dangain" ri gyi: sheung: myhang: thang da" Mangso wigi vhoeb lho: nyang: byid: wa khyen: too" bang: kha: yug ri we' yo" byid: pyam ga: ziri yhen: yu da:.

²²Nghoid loug we' nya: yuggi zoo: nang gi he: gu: dangain" ri se' too" gu ri nanya: gung nanyang: akhyo' nyhoem: nghoid da:.

²³Nang gi mougkhung: mo ASEING ri thougtheung da" khyo" koid lho: nya: Noku Yhoem: Moo" mo khu yo' goem joem ri yu vang lo da:. Nang yo' re" nheigboo ludaid yi re" yhoem: seing: myhi' yi re" dangcang: myhi' yigi hau: joem mo zabyid yhid: kaid shug wigi sheing:- ngei- gyid: mid"- joto'- seig- lugzeing yo' koid to" da" yu phara" joem myo, we' amyang noo: we' agyo: da" yu phara" joem ri coung" ago". Nghoid loug we' nang dei wa anghoid lang" shid: wa myid phyed ziyo' nang koid da" moo" dangain" ri khang" da" su: nghoid da" Mangsoo ri nang ngi: ashab nghoid da:.

²⁴Hau: gang mo Mangsoo gi nya: lo, ri nhang: kaid lho: he: mougsoug" joem ri lhid" abye:.

²⁵«Hid: lhid" to" zigi hid: su" nghoid da:. ‹Nghab youg- Nghab youg- janglug byo, sain" lo" zi› ga:.

²⁶Hau: da" dang: kang: gi hid su" ga: Nghab youg- Mangsoo gi re" mungdain: da" bidnyid joem ri nghab yu" to" lho: hau: ziri thang byug nhang: abye:.

²⁷Janglug- nang ri jang moo leig yu" ri gye" soem" nyid ziri shau" myang.

²⁸Byo, sain" lo zi re" mungdain: ri byo, soin" loo" nhang: wigi Mede yo' Persi bang: yiri byid: pyam da» ga: zi nghoid.

²⁹Hougjang: Belshaza gi Daniela ri khokham void da" khalham" boo" void byisheing: foid byid: wa yo' nya: leingzeing: moo ngi: shab byid: da" sheing: yi: foid byid: wa shid re" nya: dei zoo: yiri amyeing" khyo' kaid da:. Houg: lho: hau: mungdain: mo soem" zhang ein: azhang aya: moo too' byid: to" da:.

³⁰Hau: myen jang: Babelon khokham Belshaza gi said pyam shoug" bye:.

³¹Hau: thang: khyug xe: eig zain boo bye: da" Mede byu Dari gi nya: khokham yoem: so' ri shoem" seing: yu pyam byid: bye:.