Read Lashi DANIELA 6 Bible Online

DANIELA 6 - Lashi bible

DANIELA 6

¹Dari gi nya: da" khokham mungdain: goin" moo mung" zoug: dasho: eigxi: yug ri joyoo byid: wa myid phyed da:.

²Hau: tho' agoo" nyang: gi Daniela yo' gootu: eig yug ri mung" zoug: yiri moo" pyoo: byid: wa yo' nyang: vho: da" moo" ri dei byid: wa shid re" aya: byid: to" da:.

³Kha: myhang akyoo: ri Daniela gi gootu: moo" pyoo: bang: yo' mung" zoug: yi tho' mo moo" je yo" zei: ziri shau" myang da:. Nyang: gi gye" bui" yoomo khokham pho wigi damung" goin" ziri vhoeb wa moo" foin: wa myid soin' to" da:.

⁴Houg: lang" hau: gootu: moo" pyoo: bang: yo' mung" zoug: yigi Daniela mung" vhoeb moo" zei: jang" mo yooboo shoid zi daja: ja: shoug" sho' zheing: sho: nyid boem ago". Nghoid loug we' Daniela gi loem ge" ziyo' shoid zi anghoid lang" adeing amain" zi daja: we' akoid yoomo yooboo amyang boem nghoid ago".

⁵Nyangnu" nyang: cang" gi «Daniela rigi nya: da" laloem lakhoug: yo' sen da" khyoo: daja: ja: moo za: anghoid ri yooboo yo" zhug wa ngoonu" shau" myang byid: wa anghoid» ga: tid go" nyid boem.

⁶Houg: yoomo nyangnu" gi khokham phoo ri yhe: shau" wigi «Khokham Dari we"- aseing khokham kang sheing: baja" o".

⁷Re" mungdain: ri vhoeb nyid da" ngoonu" moo" pyo: vhoebkhang" zoug: yi moo" pyoo: bang:- mung" zoug: yi gyizoug: moo" yo' gootu: moo" voin bang: dangain" gi aseing khokham nhang: khyo" nyang: amyeing" daloem: khyo' lho: hau: ziri toeb cang nhang: wa ein: fu" pyo: kaid baja" ein: myid veing" boem bye:. Bidnyid soem" xi: nyid" goin" moo aseing: khokham lid wigi yu phara" mo we' hang" dayug yug mo we' ci: amho' nhang: wa da" amyeing" dang: daloem: pyo: kaid we'. He: amyeing" ri ngeug pyam su: hang" nghoid loug we' khang: khyi: byeung" sho' kaid to" da" thung: yhoem: khyoo: khyo' kaid ca" wa.

⁸Hougsu" yoomo he: amyeing" ri aseing khokham khyo" lhid" wigi lo, xoem" lhid" lho: age thid wa da" Medi yo' Persi mung" mo tarha" daloem: bui" nhang: baja"» ga: tid ago".

⁹Houg: yoomo khokham Dari gi hau: amyeing" ri lo, xoem" lhid" da:.

¹⁰Hau: amyeing" ri lo, xoem" lhid" bye: ga: ziri Daniela shau" gyo: yu lang" yhoem: khyoo: lo da:. Nya: yhoem: tho' pyam: mo yab dayab moo Yerusalem shoid khyoo: shu: to" da" bangzoo: khoem" joem dab da:. Hau: joyoo moo nyang: khanham we' lhung koid nyid ziyo' dakhyo"- bang" jo, da" bangzoo: khoem" moo poid thug thug lho: danyid" ri soem" lheing: lheing: Mangso jhang akyu" mho' da:.

¹¹Daniela da" gyivoo yigi nyang: hougsu" Mangsoo ri akyu" mho' ziri shau" myang lang"

¹²Nyangnu" dangain" bang: gi Daniela ri yooboo zhug wa shid re" khokham jhang dage" zeing: yhe: lo" ago". Nyangnu" gi «Aseing khokham we' nang gi ju" loo wa bidnyid soem" xi: goin" moo nang mo lid wigi gootu: yu phara" daja: ja: anghoid lang" byu dayug yug ri akyu" mho' su: hang" nghoid loug we' khang: khyi: byeung" sho' bo da" thung: yhoem: khoug: khyoo: khyo' kaid wa amyeing" daloem: ri lo, xoem" lhid" to" da» ga: yhe: tid boem. Khokham phoo gi «Nghoid age thid pyam da" Medi yo' Persi mung" mo tarha" daloem: ri khyo' too" bye:» ga: tid.

¹³Hau: thang: nyangnu" gi khokham pho ri «Yuda mo pyoung" she: loo bang: mo bo bo da" Daniela gi aseing khokham nang ri we' aphoug" myang: nghoid da:. Nang lhid" pyo: kaid da" amyeing" dang: ri we' acang nghoid da:. Nyang: gi danyid" ri soem" lheing: main: main: akyu" mho' nyid da» ga: tid ago".

¹⁴He: ziri khokham phoo shoug" gyoo: lhang" nyang: myid apyoo: hau: Daniela ri yo" khyoid yu wa khyoo: dakhaid khaid shoug" shoo: sho' ge bue" yhi' sho: da:. Nyang: gi bidvang sho' sho: nyid ashi" da:.

¹⁵Hau: thang: hau: byu yigi khokham pho jhang doem re" lho: «Khokham wigi lhid" pyo: kaid da" ce: amyeing" ri we' Medi yo' Persi mungdain: tarha" khyo" adoem ge thid ziri aseing khokham nang si' gu nghoid da» ga: tid ago".

¹⁶Houg: yoomo khokham phoo gi Daniela ri myheig yu wa amyeing" khyo' kaid wigi nyang: khangkhyi byeung" sho' bo da" thung: yhoem: khoug: khyo: she: pyam khyo' kaid ago". Nyang: gi Daniela ri «Nang jhug zug tung" dei byid: da" re" Mangsoo gi nang ri khyoid yu baja" o"» ga: tid da:.

¹⁷Thung: nhoid moo lugzeing daloem wigi jhid nghoeb pyam lho: Daniela ri hang" we' ayo" khyoid yu sho' khokham phoo gi nya: khokham dazid yo' nya: nheigboo ludaid yi da" dazid hau: lugzeing moo thung" tab to" da:.

¹⁸Hau: thang: khokham phoo gi khokham kho" khyoo: tau" lo" wigi damyen goin" zoo: noem azoo:- shapyo: ja: daja: we' aboo loo gyeing: bo" da:.

¹⁹Nab soin: moug: bo" re" ri khokham phoo to' re" wigi khangkhyi thung: yhoem: khyoo hain: hain: yhe: lo" da:.

²⁰Nyang: houg: khyoo: ju" yhe: ri nyang: gi seing" kho" ziyo' hid: su" ga: khe: kaid da:. «Kangso' dei nyid da" Mangso da" dei zoo: Daniela we"- nang jhug zug tung" dei byid: da" Mangsoo gi nang ri khangkhyi joem mo yo" khyoid yu bye: rhe"» ga: nyho: tid da:.

²¹Daniela gi «Aseing khokham kang: sheing: baja" o".

²²Khangkhyi joem wigi ngoo ri dam ayo" tab sho' nhoid myhid" pyam byid: wa shid re" Mangsoo gi nya: moug: lagyoo: ri nhang: kaid da:. Ngoo gi yooboo ayo" ziyo' aseing khokham nang ri ashoid ziri nyang: si' yoomo nyang: gi hid su" koid thu kaid da» ga: tu" da:.

²³Khokham phoo gi gye" gau wigi Daniela ri thung: yhoem: khoug: mo lang: she: thu yu wa amyeing" byid: kaid da:. Houg: yoomo nyang: ri lang: she: thu yu ri nyang: gi Mangsoo ri loem khau: yoomo nyang: moo ce: dam dajhi' we' adab ziri shau" myang ago".

²⁴Hau: thang: khokham phoo gi Daniela ri yooboo zhug da" mo, dangain" ri myheig wa amyeing" khyo' kaid lho: nyangnu" ri nyangnu" da" yhoem: seing: myhi' yi nya: zoo yi yo' dage" khangkhyi byeung" sho' bo da" thung: yhoem: khoug: khyo she: pyam khyo' kaid ago". Nyangnu" thung yhoem: athi" khyoo: lang" aju" gyoo" loo" shi" ri khangkhyi joem gi nyangnu" byam myhed yu lho: nyangnu" da" shooyoug: joem dangain" ri ngaid khyau" zo: pyam byid: ago".

²⁵Hau: thang: khokham Dari gi mougmyid tho' mo mungdain: byumyu" dangain" myeing" cang: joeb mo byu yiri mougsoug" lhid" kaid da:. Nanu" moo yang" zain: ngei pyo: nyid boem goo" baja".

²⁶Ngoo gi yugkhang" moo" wigi Daniela da" Mangsoo ri gyoug lho: phau" myang: wa shid re" nga" mungdain: goem: sho' amyeing" khyo' kaid da:. Nyang: gi kangso' dei nyid da" Mangsoo nghoid wigi nyang: gi apyaid atoo: moo vhoebkhang" wa. Nya: da" mungdain: gi khanham we' phyo' shoin' pyam zi shoug" wa zi anghoid. Houg: lho: nya: yoem: so' gi khanham we' thang wa zi anghoid.

²⁷Nyang: gi khyoid khyu: yu wigi loid byoin nhang: da:. Nyang: gi mougkhung: yo' mougmyid tho' moo mau" pho" ziyo' mau" pho" alhoo: again joem koid da:. Nyang: gi Daniela ri khang: khyi joem wigi said pyam wa jang" mo khyoid yu da» ga: lhid" kaid da:.

²⁸Daniela gi Dari vhoebkhang" da" apyaid yo' Persi khosen Kuru vhoeb da" ayo, gyoo: gu: moo yoo" zoo: yoo" shug da:.