Read Lashi DANIELA 7 Bible Online

DANIELA 7 - Lashi bible

DANIELA 7

¹Babelon moo Belshaza khokham bui" shid" da" xang: shi" zain da" damyen ri ngoo yhoebmo, daloem: mo, lho: yoeb myang daloem shau" myang. Hau: yhoebmo, ri ngoo lhid" xoem" to". He: zigi

²hau: myen ngoo shau" myang ziri lhid" xoem" to" zi nghoid da:. Shoid khang" moo" khyo" lid hau' hau' lo lho: Nammugdara: dang moo hau' khyoid lid lo" da:.

³Gye gyi: wigi nyang: cang" nyang: adu go" da" gougnyhoug lam" myid: du: gi nammugdara mo thu re" ago".

⁴Xang: shi" du: gi khangkhyi yo' du da- nghoid loug we' nya: dung gi zoin bung: dung yo' du da:. Ngoo zung" yu" nyid ri hau: dung joem gi jeig dang: lo" da:. Hau: gougnyhoug lam" gi tu to' yu zi shoug" lho: byu dayug yo' dayhang: ti" yab jo nhang: da:. Houg: lho: nyang: ri byu xangsu: da" myid nheigloem: ri kaid byid: to" ago".

⁵Eig du: ein: da" gougnyhoug lam" gi voem dadu: yo' du lho: nya: da" nungthang khyid: eig khyid: yo' yab jo da:. Nya: da" zei joem agyoo: mo nam cam" soem" khaid ri ngaid zeig ci: lho: thui: dathui: gi «Xo' koid we' nang yo" zo: nhoo' hau: ziri zoo: wa» ga: tid da:.

⁶Ngoo zung" yu" nyid uri gootu: gougnyhoug lam" dadu: thu lo da:. Hau: du: gi myeung khuid" yo' du nghoid loug we' nya: da" nungkhung: moo ngho' dung yhang: te" zi dung myid: dung dab da:. Houg: lho: nyang: moo vhuloem myid: loem: dab da:. Nyang: ri yu" ri amyeing" akhang" bo yhang: ti" nghoid nyid da:.

⁷Ngoo lang" yu" nyid ri myid: du ein: da" gougnyhoug lam" thu lo da:. Hau: du gi yoem: so' gyi: wigi yu" gyoug yu" lhoung:- gyoug dain wa yhang: te" zi nghoid da:. Gyi: da" nya: joto' zei boung: joem wigi nya: zoo: shoo" joem ri ngaid khyam" pyam lho: nyang: gi hau: joem ri nang: pye" pyam da:. Hau: du: gi gougnyhoug lham" goodu: yo' adu- nyang: mo khyoug: daxi: loem: yug da:.

⁸Hau: khyoug: joem ri ngoo zhug yu" nyid uri khyoug joem agyoo: moo khyoug: nu" daloem: yug thu re" ziri ngoo shau" myang. Hau: khyoug: nu" gi houg: moo yug jo, bye: da" khyoug: soem" khyoug: ri phoin:” pyam byid: da:. He: khyoug moo byu xangsu" da" myo jid" joem dab lho: nghoid boin: tung" phau: tid da" nhoid we' dab da:.

⁹Ngoo yu" nyid uri khokham zhungtang joem ri nyheing to" ago". Apyaid atoo: moo dei nyid yug gi khokham zhungtang joem mo daloem moo zhung: jo, da:. Nya: da" byimi joem gi gyu: yo' dakhyo" phyu: wigi nya: da" xam: joem gi yang moug" gyeing" yo' du da:. Myi: rheing" cab' dang moo zhug to" da" nya: da" khokham zhungtang gi myiyham: yi yi dab nyid da:.

¹⁰Houg: lho: gyid gyung: zoo: yhang: ti" myiyham: gi houg: mo yau shoin: thu re" da:. Houg: joyoo moo nyang: ri dei byid: wa byu khyeing" su: nyid boem ago". Houg: lho: byu sen su: nya: shidkhoin" moo yab jo, ago". Tarha" dang: kho' shid" lho: mougsoug" pug joem phang to" ago".

¹¹Ngoo yu" nyid uri khyau: nu" phau: nyid ziyo' nghoid boin: dang: tid nyid zi shoug" gyoo: shi" da:. Ngoo zung" yu" nyid ri myid: du: ein: wa da" gougnyhoug lam" ri said pyam ago". Houg: lho: nya: manggung ri myiyham: khoug khyoo: she: pyam khyo' kaid wigi nge" jhoem" pyam ago".

¹²Gougnyhoug lam" gootu: gu: ri we' nyangnu" da" yoem: so' yu pyam byid: zi shoug" ago".Nghoid loug we' nyangnu" ri ke' to" da" ayo, gyoo: moo xo' dei nyid wa akhang" byid: to" ago".

¹³Hau: myen mo he: yoeb myang ri myang nyid uri byu xangsu: dayug te" da" su: ri shau" myang. Nyang: gi jhoemmoug" wigi lheing khoem ci: lho: nga" jhang tab re" da:. Houg: lho: nyang: gi apyaid atoo: mo dei nyid yug jhang yhe: lho: nya: shidkhoin" khyoo: vang yhe: da:.

¹⁴Nyang: ri akhang" aya- ngi: shab khyoo: yo' khokham yoem: so' byid: to" zi nghoid yoomo mungdain: dangain" byumyu" yi myeing" cang: joeb bang: wigi nyang: ri dei byid: ago". Nya: da" amyeing" akhang" gi apyaid atoo: jo, jo, wigi nya: mungdain: gi khanham we' byo, thang loo" wa zi anghoid.

¹⁵Ngoo shau" myang da" yoeb myang joem wigi ngoo ri dain nhang: lho: ngoo gi gye" myid myo: myid nug byug bye:.

¹⁶Ngoo gi hau: joyoo moo yab jo, mo, mo dayug jhang so" do, yhe: lho: «Hau: joem dangain" ri tid sho' kyoo" la,» ein: nyang: ri mho' yoid bye:. Houg: yoomo nyang: ngoo ri dang: kang: joem ri tid kyo" da:.

¹⁷Nyang: gi «He: gougnyhoug lam" myid: du: gi mougmyid tho' moo to' ri" wa gye" gyi: da" khosen mungdain: moo" myid: loem: nghoid ago".

¹⁸Houg: lho: gyi: sheing: myhang: thang Mangso da" byu yigi khokham yoem: so' ri shoug" yu wa wigi hau: ziri apyaid atoo: moo zoem: ci: loo goo" wa» ga: tid da:.

¹⁹Hau: thang: myid du: ein: da" gougnyhoug lam" da" khyoo: ri se' lung: nau shi". Hau: ziri gootu: gougnyhoug lam" joem yo' adu- yu" gyoug yu" lhung: tung" zoo: shoo" joem ri nya: da" gyid: mid" lo, sain"- khyi: sain" joem yo' joto' zei joem wigi ngaid khyoeb pyam ziyo' hau: joem ri nang nhe" pyam da:.

²⁰Houg: lho: ngoo gi nya: da" vhuloem moo khyoug: daxi: loem: da" khyoo: yo' thang: moo cang yug thu re" da" khyoug nu" gi hau: khyoug: soem" loem: ri Kuid: gyoo" loo" nhang: ziri si nau da:. Nyang: moo myojid" joem yo' nghoid boin tung" phau: tid da" nhoid daloem: dab da:. Khyoug: hau loem gi goo" loem: tho' je yu" gyoug sho' zi nghoid da:.

²¹Ngoo yu" nyid uri hau: khyoug: gi Mangso da" byumyu" yiri meing: zain: wigi nyangnu" ri oung: pyam da:.

²²Hau: thang: apyaid atoo: moo dei nyid yug re" lo lho: gyi: sheung: myhang: thang Mangso da" byumyu" yi shoid bo dab wigi dang: phyed zi tid kaid da:. Mangso da" byumyu" yi khokham yoem so' yo" yu wa yo, ju" loo bye:.

²³He: zigi ngoo ri byid: to" da" tid sho' kyo" da" khyoo nghoid da:. Myid: du ein: da" gougnyhoug lam" gi mougmyid dang moo ju" ri" wa mungdain: nghoid wigi hau: zigi mungdain: gootu: dangain" yo' adu wa. Hau: zigi mougmyid daloem: goin" ziri ngaid khyoeb myhau: pyam ziyo' nang nhe" khyo' pyam loo wa.

²⁴Khyoug: daxi: khyoug: gi hau: khosen mungdain: ri vhoeb wa khokham daxi: yug nghoid ago". Hau: thang: gootu: khokham dayug nyid thu loo wa. Nyang: gi nya: shid mo mo, yo' adu lho: khokham soem" yug ri doin: khyo' pyam loo wa.

²⁵Nyang: gi gyi: sheung: myhang: thang da" Mangsoo ri thougtheung dang: tid lo wigi Mangso da" byumyu" yi adang moo doin: zeig zo: lo wa. Nyang: gi nyangnu" da" laloem lakhoug: tarha" joem yo' pui" joem ri thid wa shid re" soin' wigi Mangso da" byumyu" yigi nya: yoem: so' akhoug: moo soem" zain dakhyam" nyid loo wa.

²⁶Hau: thang: mougkhung: tarha" yung" moo dang: phyed wa soin' zhung: loo goo" wa. Nya: da" yoem: so' ri yu pyam byid: lho: nyang: ri bain sho' phyo' shoin' pyam loo goo" wa.

²⁷Mougmyid tho' moo mungdain: dangain" da" yoem: so' yo' gyi: sheung: ziri gyi: sheung: myhang: thang Mangso da" byumyu" yiri byid: pyam wa. Nyangnu" da" khokham yoem: so' gi khanham we' thang byug wa anghoid. Houg: lho: mougmyid tho' mo vhoebkhang" bang: dangain" gi nyangnu" ri coem' dei byid: ziyo' tid dang: gyo: loo: goo" wa.

²⁸Bue" lo khyoo: gi: hid moo: bain bye:. Ngoo gi sung gyoug dain pyam yoomo suid" lang" aboo loo:- Houg: lho: ja: khang" moo" ri nga" oungkhoug: moo xoem" ci: bye:.