Read Lashi DANIELA 9 Bible Online

DANIELA 9 - Lashi bible

DANIELA 9

¹Ahasuru da" yuggi zoo: Medi byu Dari gi Balelon mungdain: ri vhoeb da:.

²Nyang: vhoeb shid" da" xang: shi" zain moo ngoo gi younglho' mougsoug" pug joem ri jhau" zhang: yu nyid lho: ASEING wigi lapi: Yeremia ri tid to" ziyo' dakhyoo" ti" zain loem: nyhed xi: Yerusalem byo, yoin" jo, wa zi myid yu" nyid.

³Houg: lho: ngoo gi zoo: noem jang"- jid: moo" byimi void pyam lho: myiyab boem" moo zhung: jo zoo" re ASEING Mangso jhang nheigloem: nyhoem: khyo' lho: myid boo tung" akyu" mho' nyid.

⁴Ngoo gi ASEING nga" Mangsoo ri akyu" mho' lho: nga" byumyu" yi da" yooboo joem ri yhen: yu bye:. Ngoo mho' zigi «ASEING Mangsoo we"- nang gi gyi: sheung: wigi nang ri ngoonu" ngi: shab byid: da:. Nang gi dang: theing adang moo jhug zug zi we' nang wigi jheddab da" bang: ri jheddab myid ci: shug byid: lho: nang amyeing" khyo' to" ziri koid da:.

⁵«Ngoonu" gi yooboo shoid boem bye:. Ngoonu" gi akhyeing" ashoeb loo. Ngoonu" gi shoid moo" koid lid lo boem bye:. Nang wigi ngoonu" ri koid ca" wa amyeing" byid: to" ziri ngoonu" ngeug pyam boem bye:. Nang ngoonu" ri jo da" khyoo: ci: shug byid: to" jang" mo nungthang lheing: phug lo" boem bye:.

⁶Ngoonu" da" khokham yi ngoonu" da" vhoebkhang" bang:- ngoonu" da" phoug" phyid" yi yo' ngoonu" da" byu damyu" goin" ri re" myeing khyo" dang: ji da" re" dei zoo: lapi: yi da" dang: ri ngoonu" atam" gyoo: loo koid bye: goo" nhung:.

⁷ASEING nang gi khanham we' jo zi koid nghoid loug we' ngoonu" gi khanham we' ngoonu" da" adang moo ngi: yoem" khyoo" koid yu boem bye:. He: zigi Yuda yo' Yerusalem moo nyid da" ngoonu" dangain" moo yo' nang ri jhug azug da" gang mo moug: vi: yo' aqei: ayam khyoo: nang wigi khaid sain" pyam da" Israela byumyu" yi moo we' jo lo abye:.

⁸Ngoonu" da" khokham yi ngoonu" da" vhoebkhang" bang: yo' ngoonu" da" phoug phyid" yigi asho' ashid: da" moo" koid lid lo lho: ASEING nang ri yooboo shoid boem abye:.

⁹Ngoonu" gi nang ri gyi koid thougtheung loo nghoid loug we' nang gi nheig khyeug ziyo' yooboo khyoid bye: da:.

¹⁰O" ASEING ngoonu" da" Mangsoo we"- nang wigi ngoonu" ri re" dei zoo: lapi: yi khyo" byid: to" da" tarha" joem yo' dakhyoo" ti" cang yhi: wa shid re" ngoonu" ri tid khyo" uri nang ri ngoonu" atam" gyoo: koid boem bye:.

¹¹Israela byu dangain" bang: gi re" da" tarha" joem ri phyo' pyam wigi nyangnu" gi nang tid ziri ngeug pyam ago". Ngoonu" gi nang ri yooboo shoid bye:. Houg: lho: nang gi re" dei zoo: Moshe da" tarha" moo: lhid" to" da" nheing" khoin" ri ngoonu" dang moo khyo' kaid byid: abye:.

¹²Nang gi ngoonu" ri yo' ngoonu" da" vhoebkhang" bang: ri koid wa ga: tid to" ziri koid bye:. Nang gi mougmyid tho' mo voomoo" goo" loem: tho' je wigi dam xoo: sho' Yerusalem ri yooboo dam byid: abye:.

¹³Houg: lho: Moshe da" tarha" moo tid sho' kyo" to" da" yooboo dam dangain" ngoonu" ri byid: abye:. Nghoid loug we' ASEING ngoonu" da" Mangsoo we"- akhid" nghoid loug we' ngoonu" gi ngoonu" da" yooboo joem mo lheing: lo wigi re" deingmain" da" khyoo: ri cang da" khyo" anghoid lang" nang myid vho: da" khyoo: acang shi" goo" nhung:.

¹⁴ASEING ngoonu" da" Mangsoo- nang gi ngoonu" ri yooboo dam byid: wa shid re" soin' nyheing to" lho: yooboo dam byid: abye:. Ciwim gari nang gi khanham we' jo zi koid lho: ngoonu" gi re" tid dang: ri atam" gyoo: koid boem abye:.

¹⁵O" ASEING ngoonu" da" Mangsoo we"- nang gi re" byumyu" yiri Egutu mo shu" thu yu lho: re" yoem: so' ri ci: shug byid: da:. Houg: lho: re" yoem: so' ri damyid boin: nyid boem ashi"- ngoonu" gi yooboo shoid boem bye:. Ngoonu" gi shoid vhang: zi koid boem bye:.

¹⁶Nang gi lid loo bye: da" ayo, moo ngoonu" ri goem loem byid: loo bye:. Houg: yoomo Yerusalem ri nheig ayoo: loo: hau: zigi re" voomoo" nghoid da:. Re" da" younglho' bouggung nghoid da:. Ngoonu" da" yooboo joem yoomo yo' ngoonu" phoug" phyid" bang: koid lid lo da" akhyeing" ashoeb moo" zoo" joem yoomo aqei: ayam mo mungdain: byumyu" yi wigi Yerusalem ri yu" jhung" yu" nge pyam ago".

¹⁷O" Mangsoo we"- ngoo akyu" mho' dang: yo' ngoo mho' yoid thui: ri tam" gyoo: byid: la. Phyo' shoin' pyam bye: da" re" Noku Yhoem: Moo" ri doem zhug we' nang gi Mangsoo nghoid ziri yugkhang" moo" wigi coem si wa shid re" hau: ziri doem zhug we'.

¹⁸O" Mangsoo we"- ngoonu" ri tam gyoo: byid: la. Ngoonu" ri yu" yu" we'. Houg: lho: ngoonu" yau: khi" shoug" nyid ziyo' re" myeing voin da" voomoo" kham zoo: nyid da" yau: khi" ri myang byid: la. Ngoonu" gi ngoonu" jo zi koid da" gang mo anghoid. Nang nheig khyeug myid bo da" gang mo ngoonu" nang ri akyu" mho' nyid boem bye:.

¹⁹ASEING we" ngoonu" ri gyoo: byid: la. ASEING we" ngoonu" ri yooboo khyoid byid: la. ASEING we" ngoonu" ri tam" gyoo byid: wigi lo, moo" zei: we'. Nang Mangsoo nghoid ziri yugkhang" moo" se' loo wa shid re" zo" mo akoid nyid. He: voomoo" yo' he: byumyu" gi re" re" nghoid ago".

²⁰Ngoo gi nga" da" yooboo joem yo' nga" byumyu" yi da" yooboo joem ri yhen: yu zoo" re akyu" xo' mho' nyid. Houg: lho: ASEING nga" Mangsoo ri nya: da" gyeung" shang: Noku Yhoem: Moo" ri doem zhug too" wa shid re" mho' yoid nyid.

²¹Ngoo akyu" mho' nyid uri xang: shi" mo yoeb myang moo ngoo shau" myang khoo' bye: da" Gabriela gi ngoo nyid nyid da" joyoo khyoo: dang: gyoo" lo da:. Hau: ayo, gi myen" thang: zoo" moo xoin" ngei" byid: da" ayo, nghoid da:.

²²Nyang: tid sho' kyo" zigi «Daniela we"- ngoo gi hau: lapi: dang: ri nang se' gyoo: sho' pang" yu wa shid re" hid khyoo: ju" ri" bye:.

²³Mangsoo jhang nang mho' shid lo" da" ayo, mo nang ri nyang: tu" byid: bye:. Nyang: gi nang ri jheddab da:. Houg: yoomo nang ri dang: phuid: tid kyoo" wa shid re" ngoo ju" re" zi nghoid. Akhid" hau: yoeb myang ri ngoo tid sho' kyo" nyid uri goo" lhoo: za: gyo: yu we'.

²⁴Nyhed xi: zain nyhed lheing: gi re" byumyu" ri yo' re" da" gyeung" shang: voomoo" ri yooboo yo' akhyeing" ashoeb jang" mo loid byoin nhang: wa shid re" Mangsoo xoem" too" byid: da" ayo, akhyeing: nghoid da:. Yooboo ri khyoid pyam byid: lhoo apyaid atoo: moo tarha" nyeung veung" ziri zhug to" loo wa. Houg: lho: yoeb myang yo' lapi: dang: gi jo loo wa. Houg: lho: gyeung" shang: Noku Yhoem: Moo" we' doem shugbyid: loo wa.

²⁵He: ziri xoem" ci wigi se' gyo: ci: we' Yerusalem ri doem di wa amyeing" khyo' byid: da" ayo, mo Mangso wigi khyen: to" da" vhu" shi: su ju" re" da" ayo, ju" sho' nyhed zain nyhed lheing: myang" loo goo" wa. Yerusalem ri fu" moo" khyoo: joem yo' geing: teing da" gyi lhoem: joyoo de: to" loo goo" wa. Houg: lho: hau: zigi khyug xe: eig zain nyhed lheing: geing: teing jo, loo wa. Nghoid loug we' he: zain gu: gi yau: khi" da" ayo, nghoid loo wa.

²⁶Houg: lho: hau: ayo, thang loo" yo, ri Mangso wigi khyen: to" da" vhu" shi: su: ri atarha" da" khyo" said pyam loo goo" wa. Voomoo" yo' Noku Yhoem: Moo" ri yoem: so' gyi: da" moug: jhen" gyizoug: dayug mo phyo' shoin' pyam loo wa. Lo" thang ayo, gi dagyid je: re" yhang: ti" ju" lo lho: Mangso soin' to" da" meing: zain pui" yo' phyo' shoin' ziri bue" thu ri" nhang: wa.

²⁷Hau: vhoebkhang" su: gi byu myo" sho' yo' nyhed zain mo geing: teing da" myid veing" khyoo: ri yo" yu to" loo wa. Houg: lho: hau: ayo, agung dayi" lid lo" da" uri xoin" too" byid: ziyo' alu jhungshug ngei" byid: khyoo: theing: pyam loo wa. Gyug mau" pho" ziri Noku Yhoem: Moo" mo myhang: thang joyoo moo to" to" wigi hau: zigi hau: joyoo mo hau: ziri to" too" yug shid re" Mangsoo soin' to" da" lo" thang moo ju" sho' jo, jo, wa.