Read Lashi HOSEA 10 Bible Online

HOSEA 10 - Lashi bible

HOSEA 10

¹Israela byumyu" yigi zabyid shi" byeung" sho' zei: da" zabyid nei yo' du lo ago". Nyangnu" je yoo" zoo: yoo" shug loo lang" phoin: joem je myoo: sho' zhug lo ago". Nyangnu" mougmyid mo shivoo: ziyoo je thu lang" nyangnu" no' wa da" gyeung" shang: lug zeingboung: joem je zhug ago".

²Nheigloem: mhoug fain" da" byumyu" yigi nyangnu" da" yooboo joem gang mo akhid" kyi" khyeug kham zoo: ca" abye:. Mangsoo gi nyangnu" phoin: joem ri baid kho' mhoin' pyam byid: lho: nyangnu" da" gyeung" shang: zeing bung: joem ri phyo' shoin' pyam loo wa.

³He byumyu" yigi khamyhang amyang" ri «Ngoonu" gi ASEING ri agyoug phoug" yoomo khokham ayo" boem loo:- nghoid loug we' khokham dayug yug ngoonu" shid re" ci yo" koid byid: wa la"» ga: tid loo goo" wa.

⁴Nyangnu" gi dang: soem: ji lho: ajo da" dangsoo" joem byid: ziyo' ce: akyu" abo da" myid veing" thang" cab to" ago". Tarha" da" zigi atarha" khyoo: bue" loo" bye:. Hau: joem gi yoo thung" moo: myoono, gam yo' dakhyoo" yug gyi: re" ago".

⁵Samari voomoo" moo nyid da" byu yigi gyoug lho: Bethaven mo sheing: nujung loo: byug wigi koug ngau loo goo" wa. Hau: nujung loo: ri dei byid: nyid da" nyangnu" yo' khainjung yigi hau: gang mo khau" ngoug loo goo" wa. Hau: da" sheing: phung bang khyeug pyam uri nyangnu" gi kougshu: yoid: ngoug loo goo" wa.

⁶Hau: soolhoo: ri Asuri khyoo: khosen moo" shid re" kheing" khyo" dang loo" goo" wa. Israela byumyu" yigi nyangnu" da" phajhi" dang: ri cang yoomo ngi yoem" lho: sho' phu" loo wa.

⁷Nya: da" khokham gi gyid dang mo seig jab yhang: ti" shu" lo" zi shoug" wa.

⁸Israela byumyu" yi soolhoo: ri no' byid: da" joyoo- Aven mo bouggung tho' mo jo, da" phoin: yhoem: joem gi phyo' shoin' pyam zi shoug" goo" wa. Nyangnu" da" phoin: tho' moo zu: kyen: yo' myo, yug nghoeb pyam byid: loo goo" wa. Byu yigi boem joem ri «Ngoonu" ri shoung: pyam ge'» ga: bouggung joem ri we" «Ngoonu" ri lo nhe' pyam ge'» ga: mho' yoid loo goo" wa.

⁹ASEING gi «Israela byumyu" yigi Gibea moo nyangnu" yooboo koid ayo, mo shid" wigi ngoo ri yooboo koid khyoo: ri atheing: shi" goo" nghoid da:. Houg: yoomo Gibea moo nyangnu" ri gyi koid zi cang myhi: loo goo" wa.

¹⁰Ngoo gi he: yooboo yo" da" byumyu" yiri khaid zain: lho: yooboo dam byid: wa. Gootu: byumyu" yigi nyangnu" shoin" wigi nyangnu" ri gyikhaid loo wa. Israela byu yi da" myoo" sho' da" yooboo joem gang mo yooboo dam byid: zi shoug" loo goo" wa.

¹¹Israela gi goonham' dalheing: gug nang: wa jen" jen" nghoid sho' jhau" too" bye: da" nu bam nu" yo' du lo ago". Nghoid loug we' ngoo gi nya: da" yung" da" leung zeung: moo kyoug: tab lho: nhoo: shu' cu' byid: ziyo' je yau: da" moo" moo ci: wa myid phyed bye:. Ngoo gi Yuda ri yoothung" phug nhang: lho: Israela ri kyi pa: ri shi: nhang: bye:.

¹²Ngoo gi «Nanya: shid re" yoo seig ri phug yu we' deungmain" zi sho" lho: ngoo ri tam" gyoo: yoomo yo" re" wa da" mainkaid jeju" ri yhoem" yu we'. Re" ASEING-nga" jhang khyoo: doem lheing: lo wa ayo, ju" bye:. Ngoo ju" re" lho: re" adang moo mainkaid jeju" foid shoin" byid: wa» ein: tid bye:.

¹³Nghoid loug we' nanu" gi hau: gungthid- akhyeing" ashoeb ziri sho" lho: hau: ashi" ri shoug" yhoem" yu da:. Nanu" gi nanu" da" mhoug jang" mo thu re" da" ashi" ri zo: abye: da:. Nanu" gi nanu" da gyi myang: rheing" joem yo' gye myo: da" nanu" da" gyi zoo yiri loem yoomo

¹⁴Meing: zain: pui: gi re" byu yi jhang ju" re" lho: nanu" gyidab vang dangain" re" phyo' shoin' pyam zi shau" loo wa. Hau: zigi Shalman khokham wigi Bethebela voomoo" ri gyi khaid lho: phyo' shoin' pyam ziyo' myhi' zeing yiri yo' nyangnu" da" zooshang: yiri khyoeb moin' said pyam da" bidnyid yo' dayhang: ti" nghoid loo wa.

¹⁵Bethela mo byu yi we"- Nanu" koid lid lo da" akhyeing" ashoeb moo" zoo" joem yoomo nanu" moo hougsu" nyang: bue" loo goo" wa. Gyi khaid shid" ri" yo' dage" Israela khokham shid: loo" wa.