Read Lashi HOSEA 11 Bible Online

HOSEA 11 - Lashi bible

HOSEA 11

¹ASEING gi «Israela gi zoonu" nghoid shi" uri ngoo nyang: ri nheig dab bye:. Houg: lho: nyang: ri nga" zoo: khyo" Egutu mo khe: shu" thu yu bye:.

²Nghoid loug we' ngoo nyang: ri je khi: lang" nyang: gi nga" jang" mo je lheing: phug lo" da:. Nga" byu yigi Bala ri xoin" ngei" byid: da:. Nyangnu" gi soolhoo: joem ri nam pyo: ja: nghe' ngei" byid: da:.

³Nghoid loug we' Israela ri khyoo: so" jhau" zi ngoo danghoid. Ngoo gi nga" byumyu" yiri nga" lo, moo gab vu, ci: nghoid loug we' ngo wigi nyangnu" ri yu" coung: lo: ziri nyangnu" ce: ayhen: yu byid: goo" nghoid da:.

⁴Ngoo gi nyangnu" ri nga" jhang jheddab seing" no myid yo' lang: she: yu bye:. Ngoo gi nyangnu" ri koid: vu, yu lho: nga" baloid moo tab ci: loo bye:. Ngoo gi nyangnu" jhang goeb lho: zho" jhug loo bye:.

⁵Nyangnu" gi nga" jhang doem tau" loo wa ziri ngeug pyam ago". Houg: yoomo nyangnu" gi Egutu khyoo: doem phang: tau" loo" ca" ziyo' Asuri gi nyangnu" ri vhoeb zo: loo wa.

⁶Nyangnu" voomoo" joem moo meing: zain: zi dang: gyo" lo wigi voomoo" vang khyam: khoem" moo" duang: ri phyo' khyo' pyam byid: loo wa. Nga" byu yigi nyangnu" myid moo ge thang ga: myid ziri koid da" gang mo hau: ze wigi nyangnu" ri said toem" pyam wa.

⁷Nyangnu" gi jhen" gi gi ngoo mo vi: khyoo: da tau" phang: lo" ago". Nyangnu" adang moo kyoug: voin vu, ci yoomo ngoo ri nyho: yoid loo goo" wa. Nghoid loug we' hau: yoovoin joem ri hang" wigi we' atu: pyam byid: wa.

⁸«Israela byumyu" yi we" nanu" ri khasu" tho' se' to" pyam wa la". Nang ri ngo wigi khasu" tho' she: pyam khoo' wa la". Adma ri ngo wigi phyo' shoin' pyam ziyo' dakhyo"- anghoid lang" Zeboim ri ngoo baid yhang: ti" nang ri ngoo khasu" se' koid wa lug la". Nga" nheigloem: gi hougsu" koid wa shid re" agyoo: wa. Nang ri jheddab da" nga" nheigloem: gi gye" gyi: sheung: nyid da:.

⁹Nga" da: nheig yo: zigi nang ri ngoo yooboo dam abyid: wa. Ngoo gi Israela byumyu" yiri adoem phyo' shoin' pyam loo: wa. Ciwim gari ngoo gi Mangsoo danghoid byu anghoid. Gyeung" shang: da" yug- ngoo gi nanu" yo' dage" nyid. Ngoo gi nanu" jang" moo nheig yo: lho: re" loo wa anghoid.

¹⁰Ngoo gi nyangnu" gyivoo yiri khangkhyi yo' dayhang: ti" myeing lang" nga" byumyu" yigi nga" thang: cang lo loo goo" wa. Nyangnu" gi bidvang shoid khyo" zi nga" jhang" khyoo: hain: hain: phang: re" loo goo" wa.

¹¹Nyangnu" gi Egutu mung" mo ngho' joem yhang: ti" yo' Asuri mung" mo pheing" kyoug" joem yhang: ti" dang: loo goo" wa. Ngoo gi nyangnu" ri nyangnu" yhoem: khyoo: doem shu" loo" wa. Ngoo ASEING tid too" bye:» ga: tid.

¹²ASEING gi Israela byumyu" yigi ngoo ri mhoug tid dang: yo' mhoug fain" ziyo' lheing khoem to" abye: go". Yuda byumyu" yigi jhug zug ziyo' gyeung" shang: da" ngoo Mangsoo ri thougtheung gyi koid nyid boem shi" ago".