Read Lashi HOSEA 12 Bible Online

HOSEA 12 - Lashi bible

HOSEA 12

¹Israela byumyu" yi nab soin: mo zi myen" ayo, ju" sho' koid zi ja: khang" moo" gi ce: akyu" abo ziyo' phyo' shoin' zi za: nghoid da:. Mhau' ziyo' ajoem: theing moo" gi nyangnu" phung: gung moo je myo: lug re" da:. Nyangnu" gi Asuri yo' myid veing" thang" cab joem to" lho: Egutu bang: yo' phaga: moo" shoin" koid ago"» ga: tid.

²ASEING gi Yuda byumyu" yiri yooboo zhug wa yo" da:. Nyang: gi Israela byumyu" yiri nyangnu" da" lo, moo" yoomo yooboo dam byid: wa bye:. Nyang: gi nyangnu" ri nyangnu" koid lo da" moo" shid re" aphoug" tau" byid: loo wa.

³Nyangnu" da" phoug" phyid" Yaku gi co' zoem: nya: mang: Eso yo' dage" nya: eig yug nya: myhi' da" oung: moo boo shi" uri nyang: byo, go" ago". Yaku gyi: lo ri Mangsoo ri gyi koid thougtheung da:.

⁴Nyang: gi moug: lagyoo: dayug yo' gyi koid thougtheung lho: oung: pyam da:. Nyang: gi ngau wigi mainkaid jeju" mho' da:. Houg: lho: Bethela moo Mangsoo gi ngoonu" da" phoug" phyid" Yaku jhang re" lho: nyang: yo' ji goo" bye:.

⁵He: zigi myhang: thang ASEING Mangsoo nghoid da:. ASEING ga: da" myeing gi nyang: ri noku coung" wa myeing nghoid da:.

⁶Houg: yoomo akhid" Yaku da" amyed ashen" yi we"- nanu" da" Mangsoo ri loem khau: lho: nya: jhang" khyoo: lheing: tau" loo we'. Jhug zug lho: deingmain" nyid we'. Houg: lho: nanu" da" Mangso moo" zei: wa ziri nheigloem: sheing: sheing: to" lho: lang" nyid we'.

⁷ASEING gi «Israela byumyu" yigi Khanan byumyu" yi yo' dayhang: ti" adeingmain" nghoid ago". Nyangnu" gi nyangnu" mo ziyoo qei mo, ri amain" da" jangshi" ci: lho: mhoug zo: khyoo: ri vho: ngei boem ago".

⁸Nyangnu" gi ‹Ngoonu" gi yoo" zoo: yoo" shug da:. Ngoonu" moo zhafa: bo. Ngoonu" adeingmain" da" khyo" jonu" yo" ziri hang" wigi yooboo ayo" zhug› ga: tid ago".

⁹Nghoid loug we' nanu" ri Egutu mo shu" thu lo da" nanu" ASEING Mangsoo- ngoo gi dain" pyoid yoo moo nanu" jhang ju" ri" uri nanu" nyid lo ziyo' dakhyoo" nanu" ri zoem" joem moo doem nyid nhang: wa.

¹⁰Ngoo gi Lapi: yiri dang: ji wigi nyangnu" ri yoeb myang myoo" sho' byid: bye:. Ngoo gi Lapi: yi khyo" wigi nga" byumyu" yiri tid poin" byid: bye:.

¹¹Nghoid loug we' Gilead mo soolhoo: joem ri no' ago". Houg: lho: hau: joem ri no' bang: gi shid: loo goo" wa. Gilgala mo nujung loo: joem ri xoin" ngei" byid: ago". Houg: lho: hau: joyoo mo phoin: joem gi jang: pa: moo lug go, boem bue" loo goo" wa.

¹²Ngoonu" da" phoug" phyid" Yaku gi Mesopotamia khyoo: yhoem: seing: myhi' yhe: yu wa shid re" phang: loo" ca" bye:. Hau: jo yoo moo byu dayug shid re" moo" zei: lho: nya: da" yang joem ri zung" byid: da:.

¹³ASEING gi Egutu moo join koid nyid da" Israela byumyu" yiri khyoid khyu: yu lho: nyangnu" ri zoem: wa shid re" Lapi: dayug nhang: kaid byid: da:.

¹⁴Israela byumyu" yigi ASEING ri nheig khoo" sho' nheig yoo: nhang: lho: nyangnu" gi nyangnu" shoid vhang: da" byu said youg: moo" yoomo shid: wa moin: yi" ago". ASEING ri nyangnu" wigi ngi: yoem" nhang: da" gang mo nyangnu" ri yooboo dam byid: loo wa.