Read Lashi HOSEA 6 Bible Online

HOSEA 6 - Lashi bible

HOSEA 6

¹Byumyu" yigi «ASEING jang" khyoo: doem tau" lo" boem shang. Nyang: gi ngoonu" ri dam tab bye:. Nghoid loug we' nyang: gi ngoonu" ri gyeing" nyang: yo" ze: gi byid: wa. Nyang: gi ngoonu" ri dam joem: tab abye:. Nghoid loug we' nyang: gi ngoonu" da" dam joid ri pain" cu' thoeb byid: loo wa anghoid rhe".

²Eig soem" nyid" agyoo: moo nyang: ngoonu" ri yoem: seig kaid byid: wa houg: lho: ngoonu" gi nya: shidkhoin" moo yo" nyid loo wa.

³Ngoonu" gi ASEING ri si' wa shid re" yoem: kaid shang. Nyang: gi nab soin: moug: bo" re" ziyo' dakhyo"- mougmyid mo vo khyo' da" gyu moug: yu: yhang: ti" ngoonu" jhang re" loo wa» ga: tid ago".

⁴Nghoid loug we' ASEING gi «Israela yo' Yuda we" Ngoo gi nanu" yo' ci sen: la". Ngoo ri nanu" wigi jheddab zigi nab soin: mo lang" khyoem' yo' dakhyo" myab myab bei: byug wa. Hau: zigi nyid" ri no' mo byug lo" da" nghain: yo' du: da:.

⁵Houg: yoomo ngoo gi nga" Lapi: yiri dang: kho' ziyo' phyo' shoin' pyam wa da" lu dang: yo' dage nanu" jhang nhang: kaid byid: bye:. Nanu" jang" mo ngoo vho: zigi gyeing: gyeing: sho' sho' zi nghoid.

⁶Ngoo gi nanu" da abei abyo, da" jheddab myid ri vho da:. Nanu" da" gougnyhoug xoin" ri avhoo:. Ngoo nga" byumyu" yi wigi ngoo ri nghe' ngei" xoin" to' byid: tho' nga" byumyu" yi wigi ngoo ri se boem wa zi je vho: da:.

⁷Nghoid loug we' nyangnu" gi Adam yhang: ti" hau: joyoo moo: nyangnu" yo' ngoo koid to" da" dang: theing ri phyo' pyam ago".

⁸Gilead gi akhyeing" shoeb bang: yo' byu said bang: byeung" nyid da" voomoo" nghoid da:.

⁹Khainjung yigi byu dayug ri khyangtoug: koid wa shid re" lhoem: nyid da" byu phung: yo' du da:. Shekhem: mo gyeung" shang: da" joyoo khyoo: yhe: da" khyoogung mo lang" nyangnu" gi byu said moo" koid thu ago". Houg: lho: nyangnu" gi he: akhyeing" ashoeb moo" dangain" ri pa: yhi: koid ago".

¹⁰Ngoo gi Israela moo gyoug dain ja: daja: myang bye:. Nga" byumyu" yigi soolhoo: joem ri no' khyo" nyang: nya: gung ri aco' ajhoid koid pyam ago".

¹¹Houg: lho: nanu" Yuda byumyu" yi shid re" nanu" koid nyid da" moo" yoomo nanu" ri ngo wigi yooboo dam byid: wa ayo, dayo, soin' too" byid: bye:.