Read Lashi YOELA 1 Bible Online

YOELA 1 - Lashi bible

YOELA 1

¹He: zigi Pethuela da" yuggi zoo: Yoela ri ASEING byid: kaid da" lu dang: nghoid.

²Phoug" mang: zookho' yi we"- tam" gyo: yu" ge'. Yuda mung" byu yi yugkhang" moo" we"- gyo: yu" ge'. Nanu" da" apyaid moo nghoid loug- nanu" da" phoug" phyid" yi da" apyaid moo nghoid loug we' hid: te" zi khanham we" lhung bue" yu" go" lha".

³He: khyoo: nanu" da" zooshang: yiri tid shid we'. Nyangnu" gi nyangnu" da" zooshang: yiri tid kyo" boem wa nghoid. Houg: bang: we' thang: xeig moo bang: ri doem tid kyo" yhe: lo" boem wa nghoid.

⁴Jhenkhyeug joem gi daphung: thang: moo daphung: xo' lho: shivoo: gam joem moo foem: to" ago". Daphung: wigi zo: teung to" ziri daphung: wigi zo: pyam byid: ago".

⁵Yhid: ya: yi we"- so" re" boem lho: ngoug ge'. zabyid yhid: shug mo, we" yoid ngau nyid ge'. Zabyid yhid: aseig ri koid yu wa da" zabyid shi" joem gi phyo' shoin: pyam zi shoug" bye:.

⁶Jhenkhyeug gyi daphung: gi ngoonu" da" mougmyid ri lo zain: yu boem bye:- houg: bang: gi yoem: bo lho: atho' nghab, loo: sho' myo: ago". Nyangnu" da" zei joem gi khangkhyi zei yhang: ti" tho' ago".

⁷Nyangnu" gi ngoonu" da" zabyid nei joem ri phyo' shoin pyam boem lho ngoonu" da" lafoem gam joem ri zo: pyam byid: boem ago". Seig ko' phyu: loo" sho' seig kug ri khyoid pyam byid: ago".

⁸Byumyu" yi we"- myiyi: nu" gi nyang: lo, xo' yu wa da" yuggi nu" shid: wigi ngau yhang: ti" ngau nyid we'.

⁹Noku Yhoem: Moo" khoug: moo: xoin" to' wa shid mo gug zoo: we' ayoo"- zabyid yhid: we' ayoo"- ASEING ri ngei" byid: wa xoin" ci" we' ayo" boem yoomo khainjung yigi koug ngau nyid boem ago".

¹⁰Yoothung" joem gi myid keing: doem nghoid jo, boem bye:- gug yoo joem gi phyo' shoin, pyam zi shau" boem wigi mougmyid gi koug ngau nyid bye:. Zabyid nei joem we' kyoug shid: byoug wigi zhainloin: gam joem we' kyoug shoem: loo" bye:.

¹¹Yoo thung" zei mo, we"- koug ngau nyid ge'. Zabyid khyam: ri yu" coung: nyid mo, we"- ngau nyid loo: we'. Khasu" wim ga: ri sungsoo: yo' yoono,- shivoo: shiloem dangain"- byo, yoin" lo" zi shoug" bye:.

¹²Zabyid nei joem yo' lafoem gam joem we' yhau" loo" bye:. Shigam joem dangain" gi yhau" shid: lo" abye: go". Byu yi da" gau yi ngei pyo: khyoo: ein: zigi bei: lo" byug bye:.

¹³Phoin: tho' moo: xoin" ngei" byid: nyid da" Khainjung yi we"- jid: moo" byimi void lho: ngau nyid ge'. Noku Yhoem: Moo" khyoo: yhe: lho: damyen goin" koug ngau nyid we'. Nanu" da" Mangsoo ri xoin" to' byid: wa da" gug zoo: yo' zabyid yhid: ayoo" loo.

¹⁴Zoo: shug jang" pyam wa shid re" amyeing" khyoo' byid: ge'. phung: foem: wa shid mo khe: zheing" we'. Nanu" da" ASEING Mangso da" Noku Yhoem: Moo" khoug: khyoo:- Yuda byumyu" yi dangain" bang: yo' vhu" shi: bang: ri khe: zheung" kaid lho: nyang: ri mho' yoid we'.

¹⁵Yoem: so' gyi: thang su: wigi phyo' shoin' pyam wa ASEING da" bidnyid gi ju" lo nyid bye:- hau: bidnyid moo gye" gyoug dain ja: bue" loo wa.

¹⁶Ngoonu" da" shivoo: joem ri phyo' shoin' pyam zi shoug" nyid da" uri ngoonu" gi hougsu" za: coem' yu" kaid boem bye:. Ngoonu" da" Mangso Noku Yhoem: Moo" moo ngei pyo: khyoo: ci" we' ajo, loo.

¹⁷Shivoo: myoug: shi" joem gi myid kyug foo: moo kyug shid: loo" bye:- hougmoo: be" too" wa da" gug ajo, loo- gug jhi: akoem joem we' yoem: gyo" loo" bye:.

¹⁸Nu: kyung gi seing" kho" myeung nyid boem- khasu" wim gari nyangnu" shid mo coung" yoo ajo, loo- yang phung: joem we' yau: khe" zi shoug" nyid abye: go".

¹⁹ASEING we"- ngoo gi nang ri yoid mho' nyid khasu" wim gari coung" yoo yo' seiggam joem gi myi: nge" pyam ziyo' dakhyoo" ti"- kyug shid: lo" abye: go".

²⁰Gougnyhoug lam" joem lang" nang ri nyho: yoid nyid ago"- Khasu" wim gari gyid gyung: nu" joem we' kyoug kain" byug bye:.