Read Lashi AMO 1 Bible Online

AMO 1 - Lashi bible

AMO 1

¹He: da" mungdang: gi Tekoa voogung mo yang zung" su: Amo da" mungdang: joem nghoid. Yuda mung" moo Uzia khokham bue" lho: Yosha nya: zoo: Yeroboam gi Israela khokham koid nyid uri myid leug aleug shi" da" eig zain moo Mangsoo gi Israela yo' sen: lho: he: khyoo: dangain" ziri Amo ri pang shug bye:.

²Amo tid zigi «ASEING gi Ziun mo wigi thui: zeing yo' yoid nyid. Nya: thui: gi Yerusalem mo thu lo da:. Mhain" nu" yoo gi kyoug lo" lho: Kharmela boem tho' moo vufu" yoo we' yhau" loo" khari" bye:.

³Damasku voo bang: gi pug lho: pug lho: yooboo koid yoomo ngoo ASEING gi gyeing" nyang: yooboo dam byid: loo: wa. Nyangnu" gi Gilead mung" byu yiri akhyi" akhyoid gyi koid shoo" koid nyid boem ago".

⁴Houg: yoomo ngoo gi Hazaela khokham wigi zhug to" da" khokham kho" vang" ri nghe' jhoem" pyam byid: lho: Benhadad khokham da" gyikhoug: zung joem ri nghe' phyo' pyam byid: wa nghoid.

⁵Ngoo gi Damasku da" vang" khoem" duang: ri we' phyo' mhoin' pyam lho: Aven pa: dam moo nyid mo, yo' Beddiden mung" zoug: yiri yu pyam wa. Suri mo byu yi rigi Kira mung" khyoo: thung: byu yiri yhang: ti" shu" lo" zi shoug" nhang: wa» ga: tid.

⁶ASEING tid zigi «Gaza voobyu yigi pug lho: pug lho: yooboo dakoid nyid boem yoomo ngoo gi nyangnu" ri gyeing" nyang: yooboo dam byid: wa. Nyangnu" gi byumyu" damyu" goin" ziri shu" thu yu lho: Edom mung" byu yi jhang join khyo" ung" byid: pyam boem ago".

⁷Houg: yoomo ngoo gi Gaza voogung vang khyam: joem tho' moo myi: ri khyo kaid lho: nya: da" gyikhoug: zung joem ri nghe' phyo' pyam byid: wa.

⁸Ngoo gi Ashdod voomoo" yo' Ashkelon voo mo vhoeb khang" bang: ri yu pyam wa nghoid. Ekron voomoo" ri we' ngoo yooboo dam byid: wa. Hau: lho: deung jo, shi" da" Philisti byumyu" yi dangain" gi shid: lo" boem wa nghoid» ga: tid.

⁹ASEING tid zigi «Turu mung" byu yigi pug lho: pug lho: yooboo ri dakoid nyid boem yoomo ngoo gi nyangnu" ri gyeing" nyang: yooboo dam byid: wa. Nyangnu" gi mung" byu yi dangain" ri Edom mung" khyoo: pyoung" she: lo" ago". Houg: lho: nyangnu" koid to" da" myid veung" thang" cab ri we' acang nghoid ago".

¹⁰Houg: yoomo ngoo gi Turu vang khyam: tho' moo myi: ri khyo kaid lho: nya: da" gyikhoug: zung joem ri we' nghe' pyam byid: wa» ga: tid.

¹¹ASEING tid zigi «Edom mung" byu yigi pug lho: pug lho: yooboo dakoid nyid boem yoomo ngoo gi nyangnu" ri gyeing" gyeing" nyang: yooboo dam byid: wa. Nyangnu" gi nyangnu" da" mang: nhung" Israela yiri khaid zain: lho: nheig khyeug shoo" myen: khyoo: ri atoin" shid nghoid ago". Nyangnu" da" nheig joem: yo: khyoo: gi anoo: atheing: loo: khanham we' nheig atho' shid: loo: nghoid ago".

¹²Houg: yoomo ngoo gi Teman atho' moo myi: ri khyo' kaid lho: Bozra gyikhoug: zung joem ri nghe' khyo' pyam wa» ga: tid.

¹³ASEING tid zigi «Amon voo bang: gi pug lho: pug lho: yooboo ri dakoid nyid boem yoomo ngoo gi nyangnu" ri gyeing" gyeing" nyang: yooboo dam byid: wa. Nyangnu" gi mougmyid ri ce" yu wa shid re" gyi zain: lho: Gilead moug: mo gung lid: ci: da" myhi' zeing yiri voem: doug: yham" kho' pyam byid: boem ago".

¹⁴Houg: yoomo ngoo gi Raba vang khyam: tho' moo myi: ri khyo kaid lho: houg: mo nya: da" gyikhoug: zung joem ri nghe' jhoem" pyam byid: wa nghoid. Houg: gyi zain: nyid da" bidnyid mo yoid nyhoo: thui: thu loo wa ziyo' uglid hau' lo thui: yhang: ti" nheig joem: yo: da" thui: gi damyeung tei" too" wa.

¹⁵Nyangnu" da" khokham yo' nya: da" zoug: koid mo, rigi pyoung" she: lo" zi shau" boem wa nghoid» ga: tid.