Read Lashi AMO 3 Bible Online

AMO 3 - Lashi bible

AMO 3

¹Israela bang: we" Egutu mo shu" thu lo da" byumyu" dangain" mo, we" nanu" yo' sen: lho: ASEING tid da" mungdang: ri tam" gyo: yu we'.

²Mougmyid tho' mo byumyu" dangain" jang" moo nanu" ri za: ngoo dasi' yoomo goin coung: lo zi nghoid. Hougsu" nghoid yoomo nanu" da" yooboo joem gi gye" yu" gyoug yu" lhung: sho' nghoid nyid bye:. Houg: yoomo hau: yooboo joem da" gang mo nanu" ri ngoo yooboo dam byid: ca" bye:.

³Byu eig yug gi shoug" goo" wa shid mo asoin' go" to" zi dage" za: gyung: lhoung so" yu" go" la".

⁴Khangkhyi gi siyoo moo shoo" amyang shi" ri lhoung myeing yu" la". Khangkhyi nu" we' khyung: khoug: moo daja: ja: ri ashoug" ngaid ci: shi" ri lhoung myeung yu" la".

⁵Lhid' moo zoo: noem ano" too" shi" ri ngho' lhoung myi" la". Thoung: to" da" lhid gi daja: ja: amyi" ri lhoung beug jo, yu" la".

⁶Voo byu yiri agyoug dain nhang: loo: za: voomoo" khoug: moo gyi khe: da" laboo" lhoung moid yu" boem la". ASEING wigi akoid kaid ri voo khoug: moo yau: khe" kyi" khyeug moo" lhoung thu lo yu" la".

⁷Myhang: thang yoem: moo" bo da" ASEING gi nya: dei zoo: lapi: yiri nyang: myid soin' to" khyoo: ri atoin" shid loo: da ja: ja: lhoung koid thu kaid yu" la".

⁸Khang khyi myeung kaid ri agyug mo, hang" boo wa la". Myhang: thang ASEING tid kaid lang" nya: mungdang: atid fu" kaid loo: za: hang" yo" nyid wa la".

⁹Egutu yo' Ashdod khokham khoo" vang khoug: moo nyid mo, ri tid fu" we'. «Samari bouggung joem tho' moo phung: foem: lho: houg: moo abyoo asain" wim jo, ziyo' youg: noo yooboo moo" shoid vhang: nyid ziri yu" ge'».

¹⁰ASEING tid zigi «He: byumyu" yigi youg: moo" yo' athoug" akhyoug: khyo" lhoid yu da" zi joem ri nyangnu" da" yhoem: moo" joem moo kaid pyeung to" ago". Nyangnu" gi khasu" yo" deingmain" wa zi lang" atho' si' loo nghoid da:.

¹¹Houg: yoomo gyi daphung: gi nyangnu" da" mung" ri re" lheung khoem to" wigi nyangnu" da" gyi zung joem ri phyo' shoin' pyam boem ziyo' nyangnu" da" yhoem: moo" joem ri we' lhoid yu pyam byid: lo boem wa nghoid» ga: tid.

¹²ASEING doem tid zigi «Yang zung" su: gi khangkhyi zo: teung da" yang khyid: eig loem anghoid lang" nukhyab daloem: za: doem shau" yu yhang: ti" akhid" uri la ngi: yhoeb koug joem moo leung jo, da" Samari byu yi mo dajhi' za: ashid: te: nyid deung boem loo wa zi nghoid.

¹³Akhid" tam" gyo: lho: Yaku da" nya: myid: nya: zoo: yiri tid poin" we'» ga: yoem: moo" bo da" ASEING gi tid nyid.

¹⁴Israela byumyu" yiri nyangnu" da" yooboo joem yoomo yooboo dam kaid wa da" bidnyid moo Bethela mo phoin: joem ri we' ngoo phyo' sain" pyam wa. Phoin: loem: khang" moo" mo akhyoug: joem gi gyau: lo" wigi myidjang khyoo: gyoeb gyo" pyam wa.

¹⁵Ngam" yo, ri loung" da" yhoem: joem yo' lung yo, moo loung" da" yhoem: joem ri ngoo phyo' sain" pyam byid: wa. Xang: zei yo' lhoo' yhoung to" da" yhoem: joem dangain" gyoeb gyo" byug wigi yhoem: moo" joem khang" moo" we' phyo' sain" pyam zi shoug" goo" wa» ga: tid to".