Read Lashi AMO 4 Bible Online

AMO 4 - Lashi bible

AMO 4

¹Bashan mo nujung zeing joem yo' dakhyoo" ti" xu: young" boem lho: yoem: neing: mo, ri anghoid akhuang khyo" zoem" khau: wigi myung shoo" bang: ri doin: zeig zo: boem ziyo nanu" da" yhoem: seing: phoo yiri yhid: jang nhang: da" Samari mo myhi' zeing yi nanu" we' he: khyoo: ri tam" gyo: yu" we'.

²Yoem: moo" bo ASEING gi gyeung" shang: su: nghoid yoomo nyang: gi hid: su" dangsoo" byid: da:. «Nanu" ri la nghui" yo' nghue" dang pyam wa da" bidnyid gi ju" loo bye:. Nanu" yu" yu" we'. Nanu" yugkhang" moo" gi wimmyhed mo da" wimdo, yhang: ti" bue" lo" boem wa.

³Nanu" gi jhab thang bug gyam: jo, da" vang khyam: jhab khyo" she: khyoid lo" zi shau" boem wigi houg: mo tu: phyid khyo' pyam zi shau" boem wa zi nghoid.

⁴Yoem: moo" bo thang da" ASEING tid zigi «Israela byumyu"' yi we" Bethela mo gyeung" shang: joyoo khyoo: yhe: lho: yooboo koid ca" ri ye: koid we'. Gilgala khyoo: yhe: lho: nanu" da" yoem: bo thang mo, yooboo yhe: koid ge'. Shid khyoo: ze yhe: lho: nab khang" moo" xoin" ngei" byid: wa shid re" gougnyhoug joem ri ci: re" boem ziyo' soem" nyid" ein: nyid" khang" moo" nanu" da" jonu" xi: boem mo daboem ri byid: we'.

⁵Shid vhu" khyoo: yhe: lho: nanu" da" zooyho' joem ri Mangsoo ri jeju" boin: jhungshug khyo" byid: we'. Hau: lho: nanu" ci: re" ngei" xoin" yo' gootu: khougvhoid jhungshug shid re" phoug: khuang we'. He: zigi nanu" nau zei: ge' da" moo" nghoid.

⁶Ngoo gi nanu" da" voomoo" joem dangain" jang" moo zooyoid phang" khoug ri khyo' kaid nghoid loug we' nanu" gi nga" jhang khyoo: aphug lo boem nghoid ago".

⁷Nanu" da" shivoo: joem gi moug: gyid gye" ca" nyid uri ngoo gi moug: ri toem' too" bye:. Ngoo gi voomoo" davoo moo gi moug: voo nhang: lho: goo" voo moo gi moug: ri avoo nhang:. Yoo dakhyang" moo gi moug: voo byid: lho: goo" khyang" moo gi kyug fo: jo, nhang:.

⁸Voomoo" myoo" sho' mo da" byu yigi gyid shid nyid wigi voomoo" davoo khyoo: gyid shau" kham: yu abe ga: myid byu ziyo' yhe: lo" boem nghoid loug we' houg: moo nyangnu" shid re" shug gyid lang" atham: nghoid ago". Nghoid loug we' nanu" gi nga" jhang khyoo: aphug lo boem nghoid ago".

⁹Ngoo gi nanu" da" shivoo: joem ri kyug shid: loo" nhang: wa shid mo lid lung ri houg nhang: kaid bye:. Nanu" da" shivoo: khyam: yo' zabyid khyam: dangain" nanu" da" lafoem' gam joem yo' zhainloin: gam joem we' jhenkhyeug joem wigi zo: pyam bye:. Nghoid loug we' nanu" gi nga" jhang khyoo: adoem tau" loo shi" nghoid ago".

¹⁰Ngoo gi Egutu mung" moo nhang: kaid da" yoem" noo nanu" jhang khyoo: nhang: kaid byid: bye:. Nanu" da" zoolu: yiri we' meing: zain: jang: moo said pyam byid: wigi nanu" da' myang: joem ri we' yu pyam byid: bye:. Nanu" da" zoem" joem mo shid: mang joem boeb nam nyid yoomo nanu" da" nhoo: moo nam he" jo, nhang: bye:. Nghoid loug we' nanu" gi nga" jhang khyoo: adoem tau" loo shi" nghoid ago".

¹¹Ngoo gi Sodom yo' Gomora voo ri phyo' shoin' pyam yhang: ti" nanu" mo deung nyid mo, gi myikhyoem mo she: thu to" da" myi: zoo" toem' te" zi danghoid lo ago". Nghoid loug we' nanu" gi nga" jhang khyoo: adoem tau" loo shi" nghoid ago» ga: ASEING tid nyid.

¹²Houg: yoomo «Israela byumyu" yi we" ngoo gi nanu" ri yooboo dam kaid lho: wa. Ngoo hidsu" koid wam bye: nghoid yoomo nga" dang: phyed khyoo: thoung" shoug" zoo: wa shid re" xei nyid loo: ge'» ga: tid da:.

¹³Mangsoo gi boem joem ri koid to" lho: lid joem ri phain" so: too" su: nghoid. Nyang: gi nyang: myid soin' to" khyoo: ri xangsu: byu yiri si' nhang: da:. Nyang: gi nyid" khyoug ri myen" bue" loo nhang: da:. nyang: gi myidjang tho' moo myhang: thang khyo" so" lid: lo" da:. Myhang: thang ASEING Mangsoo ga: zigi nya: myeing nghoid nyid.