Read Lashi AMO 5 Bible Online

AMO 5 - Lashi bible

AMO 5

¹Israela byumyu" yi we" Byu shid: ngoug khyang" fang" da" jikhoin" dang: ri ngoo khoin" wa.

²Zoomyi: gyeing" Israela gi jhoid leung loo" bye:. Khanham we' ayo" too' loo: nghoid da:. Nyang: ri myidjang moo she: pyam too" bye: Lang: tu: wa byu hang" aboo loo.

³Yoem: moo" bo thang da" ASEING tid nyid zigi «Israela mo voomoo" davoo gi gyizoo: dakhyeing" ri nhang: kaid nghoid loug we' dashoo: za: date: tau" loo loo: wa. Gootu: davoo mo gi dashoo: yug ri nhang: kaid nghoid loug we' daxi: yug za: date: tau" loo loo: wa» ga: tid.

⁴ASEING gi Israela byumyu" yiri tid nyid «Israela byumyu" yi we" nga" jhang ri" we'. Houg: lang" nanu" gi kangso' shau" dei nyid goo" wa.

⁵Noku coung" nghei wa shid re" Berasheba khyoo: ayhi: goo". Ngoo ri Bethela moo ayhe: shoo: goo". Bethela gi bei: byug wa zi nghoid. Gilgala khyoo: ayhi: goo". Nya: voobyu yigi pyoung" she: lo" zi shoug" wa nheing" khoin" zang" jo, bye:.

⁶ASEING jhang khyoo: yhi: we'. Houg: lang" nanu" gi kangso' shau" dei nyid boem wa. Nanu" ayhe: nghoid rigi Israela byumyu" yi da" atho' moo myi: yo' dakhyoo" ti" nyang: gi jhoid" koid pyam loo wa. Myi: gi Bethela mo da" byu yiri nge" pyam lo lho: hau: myi: ri hang" we" ayo" said pyam wa zi nghoid.

⁷Deingmain" da" khyoo: ri phug se: pyam lho: mung" byu yi nyangnu" da" amyeing" akhang" ri mhoid" jhoem" pyam mo, we" nanu" gi joem: lo" zi shau" boem abye: go".

⁸ASEING gi Kyi: gyo: lakhyoin- Boo" kyi: ga: da" kyi: joem ri phain" so: to". Nyang: gi moug: coid ri bidbang bui" nhang: lho: nyid" dang: gung rilang" myen" moo" bue" loo nhang:. Nyang: gi Panglai: gyid ri khe: yu lho: mougmyid tho' moo foid shoin" kaid nyid. Nya: myeing gi ASEING ga: zi nghoid.

⁹Nyang: gi yoem: so' gyi mo, yo' nyangnu" da" gyikhoug: zung joem ri byo, yoin" loo" nhang: nyid.

¹⁰Nanu" gi atarha" moo" ri koid bang: ri thougtheung pyi: sho: bang: yo' tarha" rung" moo jo, da" dang: tid bang: yugkhang" moo" ri ngheing" nyid ago".

¹¹Nanu" gi sho" jhen: mo, ri doin: zeig zo: lho: nyangnu" da" gug zoo ri lhoid yu ago". Hougsu" nghoid yoomo nanu" gi nanu" zhug to" da" lug yhoem: yung" joem moo ashau" nyid goo" wa. Nanu" sho" to" da" zabyid khyam: mo zabyid yeung ri ashoug" shug loo goo" wa.

¹²Nanu" da" yooboo gi khayhi' gyoug cang bo nyid ziyo' nanu" koid shoid da" youg: moo" khamyoo' myo: jo, ziri ngoo se' nyid. Nanu" gi byugi yiri shen" yhen lho: khougvhoid jhungshug ri yu zo: ziyo' tarha" yung" moo nyangnu" yo" yu eung: da" tarha" deing byeung" khyoo: ri ayo" yu wa khyo" koid nyid ago".

¹³Houg: yoomo houg: yhang: te" da" akhyeing" da" ayo, moo ameing loo sam: zoo: tam" to" zigi yeug su: nghoid.

¹⁴Nanu" gi kangso' shoug" dei nyid wa shid re" akhyeing" ashoeb moo" zoo" ri to" pyam lho: ge da" moo" ri zei: wa shid re" myid soin' too" we'. Houg: lang" yoem: moo" bo thang da" ASEING gi nanu" tid nyid ziyo' dakhyoo" ti" gyeing" nyang: nanu" jang" moo bo nyid wa zi nghoid.

¹⁵Akhyeing" ashoeb da" khyoo: ri ngheung" lho: ge da" khyoo: ri jheddab nyid we'. Hau: lho: tarha" yung" moo we' tarha" deingmain" khyo" bui" nhang: we'. ASEING gi he: byumyu" mo ashid: loo: nyid deing gyoo" mo, ri nheig to khyeug shi" abe.

¹⁶Yoem: moo" bo da" myhang: thang ASEING tid zigi «Voomoo" mo fu" moo" khyoo: moo kougshu: ngoug thui: ri shoug" gyoo: goo" wa. Ngei byid: lho: khe: to" ngoug vhukung: yi yo' dage" yoo moo" zei: zoo: mo, rilang" gi shid: pui" moo bo ngoug wa shid re" vhukung: lhoung: zi shoug" wa.

¹⁷Zabyid khyam: khang" moo" moo we' ngougmyeing" shu: thui: thu nyid boem wa. Nyangnu" ri ngoo wigi yooboo dam byid: wa nghoid yoomo hid: su" bue" loo wa zi nghoid» ga: ASEING tid too" bye:.

¹⁸ASEING bidnyid ri lang" nyid mo, nanu" shid re" gi khayhi' gyeing" da" gyoug pho" bidnyid nghoid wa lha". Hau" bidnyid gi nanu" shid mo ce: akyu" boo wa lha". Hau: zigi nanu" shid mo moug: boo" anghoid moug: coid za: danghoid wa.

¹⁹Hau: bidnyid gi nanu" shid re" khangkhyi ri gyoug phang: loo" su: gi voem yo' thoung" shoug" go" ziyo' dakhyoo" ti" nghoid wa. Hougsu" anghoid lang" yhoem: khyoo: phang: loo" su: gi xiyam moo lo, yhe: zei: kaid ri lhangmyu lhoem: thei" zi shoug" su: yo' dakhyoo" ti" bui" wa nghoid.

²⁰ASEING da" bidnyid moo gi bidbang ajo, moug: coid teing: no, to" bidnyid za: nghoid. Ce: noem wigi thoin" pang zi we' ajo, loo: teing: za: jha" no, to" da" bidnyid bue" loo wa.

²¹ASEING tid nyid zigi «Ngoo gi nanu" da" laloem lakhoug: pui" joem ri ngheing" bye:. Hau: ziri ngoo avhoo:.

²²Nanu" da" myi: nghe' xoin" yo' zoo: noem xoin" to' byid: ziri ngoo kham: yu loo wa zi anghoid. To' byid: xoin" khyo" ci: re" da" xu: sho' khu: myhu: to" gougnyhoug joem ri we' ngoo lhoem: kham: yu loo: wa zi anghoid.

²³Nanu" da" nupug nujhid ga: da" jikhoin" thui: ri no: pyam loo: we'. Nanu" da" teing baid thui: ri we' ngoo anau gyoo:.

²⁴Hau: gungthid tarha" nyeung veung" khyoo: gi gyid zoo: gyung: su" deing byeung" da" khyoo: gi khanham we' akyoug kain" lo" da" gyid moo" lang su" yau loo" nhang: nyid we'.

²⁵Israela byumyu" yi we" nanu" ri dain" pyoid yoo khyo" zain loem: myid: xi: shu" lo da" uri said ngei" byid: da" xoin" yo' to' byid: da" xoin" joem ri ngoo amho' loo:.

²⁶Hougsu" nghoid loug we' akhid" nanu" gi nanu" da" khokham Sukhod yu phara" soolhoo:- nanu" da" kyi: yu phara"- Kaivan yu phara" ri no' loo" yoomo

²⁷Damasku da" thei: shoid mungdain: khoug: khyoo: nanu" ri pyoung" she: lo" uri hau: soolhoo: joem ri nanu" shoug" dang loo" ca" goo" wa» ga: wigi myhang: thang da" Mangsoo ga: myeing yoo" su: ASEING tid nyid.