Read Lashi AMO 6 Bible Online

AMO 6 - Lashi bible

AMO 6

¹Ziun boem moo nyid pyo: nyid bang: nanu" we"- Samari voo moo gau: nyu: nyid bang: nanu" we"- Israela mung" zeing mo vhujhung: yi nanu" we"- pang" thoug shoug" wa shid mo byumyu" yi zeing: foem: kham: bang: nanu" we"- nanu" gi joem: lo" abye: go".

²Nanu" gi Khalna voomoo" khyoo: yhe: lho: yu" yu" we'. Houg: lho: Hamad voomoo" khyoo: xo' yhi: we'. Philisti mung" mo Gad voomoo" ri yhe: yu" we'. Hau: voomoo" joem gi Yuda mung" yo' Israela mung" tho' moo je ge la". Nyangnu" mung" gi nanu" mung" tho' moo je gyi: la".

³Nanu" gi byo, bei loo" wa da" bidnyid ju" loo wa ga: ziri anau kham: yu nghoid ago". Nghoid loug we' nanu" koid nyid boem da" moo" zoo" gi hau: bidnyid ri daje jhang loo nhang: nyid ago".

⁴Langi: bo da" yhoeb koug tho' moo jhang" to" lho: nuloo: nu" shoo" yo' yang nu" da" shoo" ri zo: nyid zigi re" shid re" gye" nyang: gyoug pho" zi nghoid nyid wa.

⁵Nanu" gi David yhang: ti" jikhoin" lhid" lho: teing she: wigi lid jhoem" yang" nyid boem ziri nanu" vho: ago".

⁶Nanu" gi zabyid yhid: ri khu byeung" sho' sho' kaid shoug lho: ge thang da" nam pyo: xu: yeing yo' ci: yhung: nyid ago". Nghoid loug we' Israela byo, yoin" loo" wa ziri gi ase' koug nghoid ago".

⁷Houg: yoomo nanu" shi" pyoung" she: lo" zi shau" boem wa nghoid. Nanu" da" pui" joem yo' zo: shug pui" joem gi thang lo" byug boem wam bye:.

⁸Myhang: thang ASEING Mangsoo gi hid: su" tid poin" dang: ri tid kaid abye:. Israela byumyu" yi da" nghoid boin: khyoo: ri ngoo ngheing" bye:. Nyangnu" da" langi: bo da" yhoem: moo" joem ri ngoo anau yu". Ngoo gi nyangnu" da" gyi: thang voomoo" zeing yo' houg: moo jo, moo jo, dangain" ri gyivoo joem da" lo, moo ab byid: pyam wa» ga: tid.

⁹Yhoem: daloem: moo yug gi daxi: yug deung nyid nghoid loug we' dangain" gi shid: doem: loo" goo" wa zi nghoid.

¹⁰Shid: loo" su: da" bidnoem shid: pui" seing: gi manggung ri yhoem: khoug: mo dang thu loo" wa. Houg: bidnoem phoo gi yhoem: khoug: moo deung nyid shi" su: ri «Houg: moo nang yo' dage" hang" anyid loo la"» ga: myid: wa. Hau: yug gi «Hang" anyid loo:» ga: tu" wa. Houg: lang" hau" bidnoem phoo gi sam: zoo: nyid we'. ASEING myeing ri nga" eig yug age tid thu loo: lhe"» ga: tid wa.

¹¹ASEING amyeing" byid: kaid lang" gi yhoem: zoo: yhoem: zeing dangain" byo, sain" loo" khari" wa zi nghoid.

¹²Lug moo" boem tho' moo myang: joem gi yo" peug byam yen" wa la". Byu yigi panglai: gyid thoem" ri nujung loo: joem yo' yoothung" su" yo" phug wa la". Nghoid loug we' nanu" gi nyeung veung" tarha" ri myino, bui" nhang: pyam lho: jo, khyoo: rigi shoid khyoo: bui" nhang: pyam boem ago".

¹³Nanu" gi Lodeba voogung ri yo" lhoid yu bye: ga: tid ago". Nanu" tid zigi «Karnaim voomoo" ri yo" lhoid yu wa yhi' yoem: bo» ga: tid phau: nyid ago".

¹⁴Myhang: thang ASEING Mangsoo nyang: gi «Israela yi we"- nanu" da" mungdain: ri zain: seung: yu wa shid re" tungbau goomeing: mo gyidab ri nhang: kaid wa. Houg: zigi nanu" gi moug: zhung: shoid Hamad boem gyoo: khyoo: mo zi moug: thang: shoid Araba gyid zoo: gyung: ju" sho' doin: zeig zo: pyam lo boem wa» ga: tid.