Read Lashi AMO 9 Bible Online

AMO 9 - Lashi bible

AMO 9

¹ASEING gi phoin: nam moo yab jo, ziri ngoo myang. Nyang: amyeung" byid: da" dang: khoin" gi «Noku Yhoem: Moo" mo khungvoin zeing vhu" joem ri yoem: kaid baid kaid wigi apoem: ayang: dangain" ziri lei" loo" nhang: wa. Hau: ziri gyau: loo" nhang: lho: mung" byu yi da" vhuloem moo gyo" zeig baja". Nyid deung da" mung" byu yiri ngo wigi meing: zain: jang: moo said pyam wa nghoid. Hang" dayug we' yo" phang: loid loo" wa zi anghoid.

²Nyangnu" gi moovo moug: khyoo: duang: du: gyo" loo" nghoid loug we' ngoo gi nyangnu" ri myeug yu wa zi nghoid. Nyangnu" gi mougkhung: khyoo: phang: do, lo" boem rilang" ngoo gi nyangnu" ri lang: phyed khyo" pyam wa nghoid.

³Nyangnu" gi Kharamela boem vhu" moo lo" gau" jo, nghoid loug we' ngoo gi nyangnu" ri sho: lho: myheung yu wa nghoid. Nyangnu" gi panglai: thoem" thi" moo nga" jang" mo phang: gau" lo" boem nghoid loug nyangnu" ri ngaid wa shid re" main jung: ri amyeung" byid: kaid wa.

⁴Nyangnu" ri nyangnu" da" gyivoo joem wigi myheug she: loo" nghoid loug we' nyangnu" ri shau" said pyam wa shid re" ngoo amyeing" byid: wa. Ngoo gi nyangnu" ri phyo' shoin' pyam wa shid re" myid phyed too" bye:. Ngoo gi nyangnu" ri pang" thoug yu loo: wa zi anghoid» ga: tid.

⁵Yoem: moo" bo myhang: thang ASEING gi mougmyid ri zang" thung" kaid lang" kougshu: nyid boem bye:. Moug: gyab goin" jang" moo Nila gyid gyung: je: lo yu" kain" lo" yu" wim nyid yhang: ti" bue" lo nyid.

⁶ASEING gi nya: yhoem: ri mougkhung: moo zhug to". Myidjang tho' moo gi mougkhung: yo' nghoeb zeung" to". Nyang: gi panglai: gyid ri khe: to' yu lho: mougmyid tho' moo foid khyo' kaid bye:. Nya: myeing gi «ASEING» ga: zi nghoid.

⁷ASEING tid zigi «Israela mung" byu yi we"- ngoo gi nanu" ri myid boin: nyid ziyo' dakhyoo" ti" Etiopi byumyu" yiri we' myid boin: nyid. Ngoo gi nanu" ri Egutu mung" mo shu" yu ziyo' dakhyoo" ti" Philisti byumyu" yiri Kreti mo we' Suri byumyu" yiri Kira mo shu" yu to" zi nghoid.

⁸Ngoo yoem: moo" bo ASEING gi he: myo: thang da" Israela mung" ri zung" yu nyid zi nghoid lho: ngoo gi he: da" mougmyid tho' moo hau: mungdain:” ri phyo' shoin' pyam loo: wa zi nghoid loug we' Yaku da" amyed ashen yiri koem' gi aphyo' shoin' pyam wa.

⁹Ngoo gi amyeing" byid: kaid lho: Israela byumyu" yiri kyang: khyeing mo gug cab' cen: cab' ri khyeing yu yhang: ti" khyeung pyam wa. Nyangnu" ri byumyu" yi da" agung mo khyeung khyo' pyam lho: ce: phoug" adab lo: mo, ri khyen: pyam wa.

¹⁰Nga" da" byumyu" yi mo yooboo dab mo, gi Mangso wigi nyangnu" ri ce: dam dab ju: azang" nhang: wa zi anghoid» ga: tid nyid bang: dangain" gi meing: zain: jang: moo said pyam zi shoug" wa» ga: tid.

¹¹ASEING tid zigi byo, yoin" loo" bye: da" yhoem: yo' du da" David mungdain: ri ngoo doem tu: to' kaid wa da" bidnyid gi ju" loo bye:. Hau: voogung vang khyam: joem ri ngoo doem nyheung pho: lho: doem tu: to" wa. Ngoo gi hau: ziri doem zhug to" lho: goonham' yo' dakhyoo" ti" koid wa nghoid.

¹²Houg: yoomo Israela byumyu" yi Edom moo deung nyid mo, yo' shid phyang" ngoo seung: yu" bye: da" mungdain: joem ri yo" oung: pyam wa nghoid» ga: hidsu" bue" loo nhang: wa ziri ASEING tid nyid.

¹³ASEING tid zigi «Hau: bidnyid joem ju" lo nyid bye:. Gug zoo atho' yham" yu loo: sho' myab myab yug loo nhang: lho: zabyid yeung atho' pyeug yu loo: sho' Zabyid zei: lo wa. Boem joem mo zabyid yeung youg: thu lo wigi bouggung joem mo zabyid yau gyoo" loo wa.

¹⁴Ngoo gi pyoung" shu" lo" shau" da" nga" byumyu" yiri nyangnu" moug: khyoo: doem shu" tau" yu wa. Byo, yoin" loo" bye: da" nyangnu" voomoo" joem ri doem zhug nyid lo boem wa nghoid. Nyangnu" gi zabyid khyam: koid lho: zabyid yhid: shoug" shug boem wa. Nyangnu" gi khyam: koid lho: nyangnu" sho" jang" mo shivoo: shiloem shoug" zo: boem wa zi nghoid.

¹⁵Ngoo gi nga" da" byumyu" yiri nyangnu" ri byid: to" da" mougmyid tho' moo sho" too" wa. Hau: lho: nyangnu" gi hang" ayo" doem phoin:' pyam boem loo: wa». Nanu" da" Mangsoo ASEING gi tid nyid.